މާލެ ސިޓީގެ މޭޔަރަކަށް ޕީއެންސީގެ ޓިކެޓުގައި ވާދަކުރައްވާ ކުރީގެ ޑިފެންސް މިނިސްޓަރު މޭޖާ ޖެނެރަލް (ރިޓަޔާޑް) މޫސާ އަލީ ޖަލީލަކީ މިއަދު ރާއްޖެ ދެކެމުންދާ މިނިވަންކަން ގެނެސްދިނުމަށް ގައުމު ސަލާމަތްކޮށްދިން ބަތަލުންގެ ތެރޭގައި ގުނާލެވޭ ބޭފުޅެއް ކަމަށް އިނގުރައިދޫ ދާއިރާގެ މެމްބަރު، އިބްރާހިމް ފަލާހް ވިދާޅުވެއްޖެއެވެ.

މޫސާ އަލީ ޖަލީލްގެ ކެމްޕެއިން އޮފީސް ހުޅުވަން ބޭއްވި އިވެންޓްގައި ވާހަކަ ދައްކަވަމުން، ޕީއެންސީގެ ފަރާތުން ލޯކަލް ކައުންސިލް އިންތިޚާބަށް މެނޭޖަރެއްގެ ގޮތުގައި ކަނޑައަޅާފައިވާ ފަލާހް ވިދާޅުވީ، ޖަލީލަކީ އިހުލާސްތެރި، ތެދުވެރި އަދި އަމާނާތްތެރި ބޭފުޅެއް ކަމަށެވެ.

ފަލާހު ވިދާޅުވި ގޮތުގައި ޖަލީލަކީ ކޫރުމެއް އަޅުވާލަން ބިއްލޫރިކޮޅެއް ހާކާލިޔަސް އަޅުވާލަން އުނދަގޫވާ ފަދަ ޝަހުސިއްޔަތެކެވެ.

ޖަލީލަކީ ވަރަށް ޒުވާން އުމުރުން ފެށިގެން މިއަދާއި ހަމައަށް މި ދައުލަތުގެ ވަރުގަދަ އެކިއެކި މަގާމުތައް އިހުލާސްތެރިކަމައެކު، ރައްޔިތުން ގަބޫލުކުރާ ފެންވަރަށް ވުރެވެސް މަތިކޮށް އެ މަގާމުތައް ފުރުއްވާފައިވާ ބޭފުޅެއް ކަމަށް ފަލާހް ވިދާޅުވިއެވެ.

ފަލާހު ވިދާޅުވީ މާލެ ސިޓީގެ މޭޔަރުކަމަށް މިވަގުތު ކުރިމަތިލައްވާފައި ތިބި ކެންޑިޑޭޓުންނަށް ބަލާއިރު، ދެބަހެއް ނުވެ ކޮންމެ މީހަކު ވެސް ވޯޓު ފޮއްޓަށް ރަނގަޅު ފާހަގަ ޖަހާފައި ލައްވާނީ ޖަލީލްގެ ނަން ކަމަށެވެ.

އެމްޑީޕީން ދެ ފަހަރެއްގެ މަތިން މާލެ ސިޓީގެ މޭޔަރުކަން ކުރިއިރު، މާލެ ސިޓީގެ ރައްޔިތުންނާއި އެދެވޭ ނަތީޖާއެއް ނެރެދެވިފައި ނުވާ ކަމަށާއި އެކަމާ ފޫހިވެގެން 2021 ގައި ބޭއްވި ލޯކަލް ކައުންސިލް އިންތިހާބުގައި މާލޭގެ މޭޔަރު ކަމަށް ވަރަށް މަތީ އައުލަބިއްޔަތަކުން ރައީސް ޑރ. މުހައްމަދު މުއިއްޒު ހޮވައިދިން ކަމަށެވެ.

ފަލާހު ވިދާޅުވީ ޖަލީލަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފަދައިން އިހުލާސްތެރި ތެދުވެރި ބޭފުޅެއްކަމަށެވެ.

ރައީސް މުއިއްޒުގެ މޭޔަރުކަމުގައި ރައްޔިތުން އުންމީދު ކުރި ވަރަށް ވުރެވެސް ހެޔޮ ބަދަލުތަކެއް މާލެ ސިޓީއަށް ގެނެސް ދެއްވި ކަމަށާއި އޭގެ ސަބަބުން 2023 ވަނަ އަހަރު ރިޔާސީ އިންތިހާބުގައި ރައްޔިތުން އެމަނިކުފާނު ފުރިހަމަ އަގުލަބިއްޔަތަކުން އިންތިޚާބުކޮށްދެއްވި ކަމަށް ފަލާހު ވިދާޅުވިއެވެ.

ފަލާހު ވިދާޅުވީ ޖަލީލަކީ ވެސް ވަރަށް ހިންގުންތެރި، ވަރަށް ވިސްނުންތެރި އަދި ވަރަށް ކުޅަދާނަ ބޭފުޅެއްކަމަށާއި އެއީ ވަރަށް ތެދުވެރި ވަރަށް އިހުލާސްތެރި ބޭފުޅެއްކަމަށެވެ.

މޫސާ އަލީ ޖަލީލަކީ ކޮންމެ ކަމެއް ކުރުމުގައިވެސް ރައްޔިތުންނަށް އެކަމުގެ ލާބަޔާ މަންފާ ކުރާނެ ގޮތަކަށް އެކަން ކުރައްވާނެ ފަލާހު ވިދާޅުވި އެވެ.

މާލޭގެ މޭޔަރު ހޮވަމް ބާއްވާ އިންތިޚާބުގައި މޫސާ އަލީ ޖަލީލްގެ އިތުރުން ދެން ވާދަ ކުރައްވަނީ އިދިކޮޅު އެމްޑީޕީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ މިހާރުގެ ވެސް މޭޔަރު އާދަމް އާޒިމެވެ. ދެން ވާދަ ކުރައްވަނީ ކުރީގެ ޓެންޑާ ބޯޑުގެ މެމްބަރު އިސްމާއިލް ޒަރިޔަންދުއެވެ. އަދި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ފަރާތުން މާލޭގެ މޭޔަރުކަމަށް ކުރިމަތިލައްވާ އަލްއުސްތާޛު ޢަބްދުالله މަޙްޒޫމް މާޖިދުއެވެ.