މާލެ ސިޓީގެ މޭޔަރަކަށް ޕީއެންސީގެ ޓިކެޓުގައި ވާދަކުރައްވާ ކުރީގެ ޑިފެންސް މިނިސްޓަރު މޭޖާ ޖެނެރަލް (ރިޓަޔާޑް) މޫސާ އަލީ ޖަލީލަކީ ރައީސް ޑރ. މުހައްމަދު މުއިއްޒުގެ ދުވެލީގައި މަސައްކަތް ކުރައްވާނެ ބޭފުޅަކަށް ވާނެ ކަމަށް ނައިބު ރައީސް ހުސައިން މުހައްމަދު ލަތީފް ވިދާޅުވެއްޖެއެވެ.

ޖަލީލުގެ ކެމްޕެއިން އޮފީސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ނައިބް ރައީސް ވިދާޅުވީ، މާލެ ސިޓީއަށް މިވަގުތު އެންމެ ބޭނުންވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ތަރައްޤީގެ ސްޕީޑާ އެއްހަމައެއްގައި މަސައްކަތް ކުރެއްވޭނެ ޤާބިލު މޭޔަރެއް ކަމަށެވެ.

ނައިބު ރައީސް ވިދާޅުވީ ރައްޔިތުންނަށް ބޭނުންވާ ކަންކަން ކުރުމަށް ކަންކަމަށް ހުރަސް އަޅައިގެން، ޖަވަބު ދާރީ ކުރުވުމުގެ ނަމުގައި މަސައްކަތް ކުރާނެ ބޭފުޅެއް މޭޔަރަކަށް ހޮވުމުގެ ބޭނުމެއް ކަމަށާއި އޭގެ ބަދަލުގައި ހޮވަންވީ ރައިސް ޑރ. މުހައްމަދު މުއިއްޒުގެ ހިދުމަތާއި، އެމަނިކުފާނުގެ ދުވެއްޔާ އެއްވަރަށް އެހީތެރިވެދޭނެ ބޭފުޅެއް ކަމަށެވެ.

ރައްޔިތުން މިއަދު އިޚްތިޔާރު ކުރަންވީ ޤައުމު ދެކެ ލޯބިވާ، އަދި ސަރުކާރުން ކުރިއަށް ގެންދާ ތަރައްޤީގެ މަޝްރޫޢުތަކަށް އެހީތެރިވެދޭނެ ވެރިން ކަމަށާއި ތަރައްޤީގެ މަސައްކަތްތަކަށް ހުރަސްއަޅައި ދަތިކުރާނެ ބަޔަކު ރައްޔިތުން ބޭނުން ނުވާކަމަށް ނައިބު ރައީސް ވިދާޅުވިއެވެ.

ނައިބު ރައީސް ވިދާޅުވީ ކައުންސިލްތަކުގެ ދައުރަކަށް ވާންވާނީ ސަރުކާރާ ގުޅިގެން ރައްޔިތުންނަށް ޚިދުމަތް ފޯރުކޮށްދިނުމަށް މަގުފަހިކޮށްދިނުން ކަމަށާއި އަދި ރައީސް ޑރ. މުޢިއްޒު ވެސް ބޭނުންފުޅުވަނީ އެގޮތަށް މަސައްކަތް ކުރައްވާނެ ބޭފުޅުން ކަމަށެވެ.

މާލެއަކީ ރާއްޖޭގެ އެންމެ ގިނަ ބަޔަކު ޒިޔާރަތްކުރާ ތަން ކަމަށްވާއިރު، ހައްލުކުރަންޖެހޭ ގިނަ މައްސަލަތަކެއް އެބަހުރި ކަމަށާއި އޭގެ ތެރޭގައި ތޮއްޖެހުމާއި ކާރުބާރު ބޮޑުވުމުގެ މައްސަލަތަކާއި، އަމާންކަމާއި ސުލްހަ މަސަލަސްކަން ޤާއިމުކުރުން ހިމެނޭ ކަމަށް ނައިބު ރައީސް ވިދާޅުވިއެވެ.

ނައިބު ރައީސް ވިދާޅުވި ގޮތުގައި މާލެއަކީ ހިނގާބިނގާވެ އުޅުމަށާއި ދުއްވުމަށް ފަސޭހަ، ވަކި ހަމަތަކާއި އުސޫލުތަކެއް ހިފެހެއްޓިފައިވާ އަމާން ތަނަކަށް ހަދަންޖެހެއެވެ.

"މި ސިޓީގައި މައްސަލަތައް ކިތަންމެހާވެސް ގިނަ، ކާރުބާރު ބޮޑު، އަޅުގަނޑުމެންގެ މާލެ ރައްޔިތުން އަމާންކަމާއި ސުލްހަ މަސަލަސްކަމާއެކު އުޅެވޭނެ ފަސްގަނޑަކަށް މި ފަސްގަނޑު ވާން އެބަ ޖެހޭ" ނައިބު ރައީސް ވިދާޅުވިއެވެ.

ދިވެހި އަސްކަރިއްޔާގައި 30 އަހަރަށްވުރެ ގިނަ ދުވަހު ހިދުމަތް ކުރައްވުމަށްފަހު ފެބްރުއަރީ، 2012 ގައި އަސްކަރީ ހިދުމަތުން މޫސާ އަލީ ޖަލީލް ރިޓަޔާ ވެވަޑައިގެންނެވިއެވެ. އަދި އޭގެ ފަހުން ކުރީގެ ރައީސް ޔާމީންގެ ވެރިކަމުގައި ޑިފެންސް މިނިސްޓަރުކަންވެސް ކުރެއްވި މޫސާ އަލީ ޖަލީލަށް ވަނީ ނޮވެމްބަރު، 2024 ގައި ނިޝާން އަސްކަރީ ވެރިކަމުގެ އިއްޒަތް އަރުވައިފަ އެވެ.

މާލޭގެ މޭޔަރު ހޮވަމް ބާއްވާ އިންތިޚާބުގައި މޫސާ އަލީ ޖަލީލްގެ އިތުރުން ދެން ވާދަ ކުރައްވަނީ އިދިކޮޅު އެމްޑީޕީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ މިހާރުގެ ވެސް މޭޔަރު އާދަމް އާޒިމެވެ. ދެން ވާދަ ކުރައްވަނީ ކުރީގެ ޓެންޑާ ބޯޑުގެ މެމްބަރު އިސްމާއިލް ޒަރިޔަންދުއެވެ. އަދި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ފަރާތުން މާލޭގެ މޭޔަރުކަމަށް ކުރިމަތިލައްވާ އަލްއުސްތާޛު ޢަބްދުالله މަޙްޒޫމް މާޖިދުއެވެ.