ކުރިއަށް ކައުންސިލް އިންތިޚާބުގައި މާލޭ ސިޓީގެ މޭޔަރުގެ ގޮތުގައި ހޮވައިފި ނަމަ 24 ގަޑިއިރު ހުންނާނީ ރައްޔިތުންގެ ހިދުމަތުގައި، މާލެއަށް ހިތްގައިމު، އާ ޒަމާނެއް ހޯދައިދެއްވުމުގައި ކަމަށް ކުރީގެ ޑިފެންސް މިނިސްޓަރު މޫސާ އަލީ ޖަލީލު ވިދާޅުވެއްޖެ އެވެ.

ކުރިއަށް އޮތް ލޯކަލް ކައުންސިލް އިންތިހާބުގައި މާލޭ ސިޓީގެ މޭޔަރުކަމަށް ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޓިކެޓުގައި ވާދަކުރައްވާ މެޖާ ޖެނެރަލް (ރިޓަޔާޑް) މޫސާ އަލީ ޖަލީލުގެ ރަސްމީ ކެމްޕޭން ޖަގަހަ ހުޅުވަން ބޭއްވި ހަފްލާގައި ވާހަކަ ދައްކަވަމުން ޖަލީލް ވިދާޅުވީ 2011 ވަނަ އަހަރު ކައުންސިލްތައް އުފެދުނު ފަހުން 10 އަހަރު ފާއިތުވިއިރު ވެސް މާލެ ރައްޔިތުން ބޭނުންވާ ކަންކަން މާލޭ ސިޓީ ކައުންސިލްގެ އޭރުގެ މޭޔަރުންނަށް ނުކުރެވުނު ކަމަށެވެ.

ޖަލީލު ވިދާޅުވީ މޭޔަރަކު ލައިގެން ސިޓީ ކައުންސިލު ހިންގުމުގެ ނިޒާމަށް މާލެ ހިންގަން 2011 ވަނަ އަހަރު ފެށުނު ފަހުން ދިހަ ވަރަކަށް އަހަރު ފާއިތުވީ މާލޭ ރައްޔިތުންނަށް ކައުންސިލުން އާރުލާ އެކަށީގެންވާ ހިދުމަތްތަކެއް ނުދެވި ކަމަށެވެ.

ކައުންސިލުގެ ހިންގުމުގެ ކަންކަން ބަދަލުކުރެއްވީ 2022 ވަނަ އަހަރު މިހާތަނަށް މާލޭ ރައްޔިތުން އެންމެ ގިނަ ވޯޓު ދީގެން މާލެ ސިޓީގެ މޭޔަރުކަމަށް އިންތިހާބުކުރި މޭޔަރު މިހާރުގެ ރައީސް ޑރ. މުހައްމަދި މުއިއްޒު މޭޔަރު ކަމުގައި ކަމަށް ޖަލީލް ވިދާޅުވިއެވެ.

"މާލޭ ރައްޔިތުން ބޭނުންވާ ގޮތަށް ކަންކަން ހިނގަން ފެށީ 2021 ވަނަ އަހަރުން ފެށިގެން މާލޭގެ މޭޔަރު ކަމަށް ރައްޔިތުންގެ އެންމެ ގިނަ ވޯޓުން މިހާތަނަށް އިންތިހާބުކުރި ހިދުމަތްތެރި ޒުވާން މޭޔަރު ރައީސް މުއިއްޒު އެ މަގާމުގައި ހުންނެވި 2 އަހަރާއި 5 މަހާއި ދުވަސްކޮޅުގެ ތެރޭގައި" ޖަލީލް ވިދާޅުވިއެވެ.

މީގެ އިތުރުން ޖަލީލް ވިދާޅުވީ މާލޭގެ މޭޔަރު ކަމަށް ވާދަކުރައްވަނީ މާލޭގެ މޭޔަރު ކަމުގެ މަގާމުގައި ރައީސް މުއިއްޒު ކުރެއްވި މަސައްކަތް އިންފާރެއްގެ ގޮތުގައި ބައްލަވައިގެން ކަމަށެވެ. އަދި ހިދުމަތުން ރިޓަޔާ ކުރެއްވިޔަސް ކަންކަން ކުރާނެ ހިތްވަރާއި ތަޖުރިބާ އެބަހުރި ކަމަށް އޭނާ ވިދާޅުވިއެވެ.

ޖަލީލު ވިދާޅުވީ މިހާތަނަށް ހަވާލުވި ކޮންމެ މަސްއޫލިއްޔަތެއްގައި ވެސް އޭނާ އިސްކުރައްވާފައިވާނީ ގައުމުގެ މަސްލަހަތާއި ރައްޔިތުންނަށް ލާބަ އާއި މަންފާ ލިބޭ މަގު ކަމަށެވެ. އަދި މާލޭގައި ހުރި މައްސަލަތަކާއި، ރައްޔިތުންގެ ކަންބޮޑުވުންތައް އެނގިވަޑައިގަންނަވާ ކަމަށާއި، އެ ކަންކަން އެނގިހުރެ ޚިދުމަތުން ނުފިލައި، މޭޔަރު ކަމަށް ވާދަކުރައްވަނީ އެ ކަންކަން ހައްލުކޮށް މާލޭ ރައްޔިތުންގެ ހިތްތައް ފަތަހަކުރައްވަން ކަމަށް ވެސް ޖަލީލް ވިދާޅުވިއެވެ.

ގައުމީ ޚިދުމަތުގެ މުޅި ހަޔާތުގައި ވެސް ކަންކަމާ ކުރިމަތިލީ، ފަސް ބެލުމެއް ނެތި ހިތްވަރާއި، ތެދުވެރިކަމާ އެކު ކަމަށާއި މާލޭގެ ރައްޔިތުން، މާލޭއަށް ގެންނަން އެދޭ ބަދަލުތައް ވަރަށް ރަނގަޅަށް އެނގިވަޑައިގަންނަވާ ކަމަށް ޖަލީލް ވިދާޅުވިއެވެ.

"ގައުމީ ހިދުމަތުގައި ރެއާ ދުވާލު ވަރަށް ބުރަކޮށް މަސައްކަތްކުރި، ވަރަށް ހިތްވަރާ އެކު އެތައް ގުރުބާނީއެއްވި މީހެއްގެ ހައިސިއްޔަތުން އަޅުގަނޑު ހިތާހިތާ ކުރެވުނު އެއް ސުވާލަކީ ރައްޔިތުންނަށް ހިދުމަތްކުރަމުންދާ ރިޓަޔާވެފައި ހުރި މީހަކު މިހާރު ވީ ގެއަށް ވަދެ ފިލަންހޭ،" ޖަލީލް ވިދާޅުވިއެވެ.

ދިވެހި އަސްކަރިއްޔާގައި 30 އަހަރަށްވުރެ ގިނަ ދުވަހު ހިދުމަތް ކުރައްވުމަށްފަހު ފެބްރުއަރީ، 2012 ގައި އަސްކަރީ ހިދުމަތުން މޫސާ އަލީ ޖަލީލް ރިޓަޔާ ވެވަޑައިގެންނެވިއެވެ. އަދި އޭގެ ފަހުން ކުރީގެ ރައީސް ޔާމީންގެ ވެރިކަމުގައި ޑިފެންސް މިނިސްޓަރުކަންވެސް ކުރެއްވި މޫސާ އަލީ ޖަލީލަށް ވަނީ ނޮވެމްބަރު، 2024 ގައި ނިޝާން އަސްކަރީ ވެރިކަމުގެ އިއްޒަތް އަރުވައިފަ އެވެ.

މާލޭގެ މޭޔަރު ހޮވަމް ބާއްވާ އިންތިޚާބުގައި މޫސާ އަލީ ޖަލީލްގެ އިތުރުން ދެން ވާދަ ކުރައްވަނީ އިދިކޮޅު އެމްޑީޕީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ މިހާރުގެ ވެސް މޭޔަރު އާދަމް އާޒިމެވެ. ދެން ވާދަ ކުރައްވަނީ ކުރީގެ ޓެންޑާ ބޯޑުގެ މެމްބަރު އިސްމާއިލް ޒަރިޔަންދުއެވެ. އަދި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ފަރާތުން މާލޭގެ މޭޔަރުކަމަށް ކުރިމަތިލައްވާ އަލްއުސްތާޛު ޢަބްދުالله މަޙްޒޫމް މާޖިދުއެވެ.