ރާއްޖެއަށް ބޭސް އިމްޕޯޓުކޮށް ވިއްކޭނީ އެކަމުގެ ހުއްދަ ލިބިގެން ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ.

އެފްޑީއޭއިން މިއަދު ނެރުނު ނޫސްބަޔާނެއްގައި ބުނީ ފާމަސީތަކުގައި އެ އޮތޯރިޓީން ދޫކުރާ ބޭސް ވިއްކުމުގެ ހުއްދަ ނެތި ބޭސް ވިއްކުމާއި ހުއްދަ ނެތް ފާމަސިސްޓުން މަސައްކަތް ކުރަމުންދާކަން ފާހަގަކުރެވޭ ކަމަށެވެ.

އެ އޮތޯރިޓީން ބުނި ގޮތުގައި ބޭސް ވިއްކާ ފިހާރަތަކުގައި މަސައްކަތް ކުރާ މީހުން ތިބެން ޖެހޭނީ އެ މީހުންނަށް ދޫކޮށްފައިވާ އައިޑީ ކާޑު އަޅައިގެނެވެ. އަދި

އެ ނޫން ގޮތަކަށް ބޭހުގެ ވިޔަފާރިކުރާ ފަރާތްތަކާމެދު ހަރުކަށި ފިޔަވަޅު އަޅާނެ ކަމަށް އެފްޑީއޭގެ ބަޔާނުގައި އިންޒާރު ކޮށްފައިވެ އެވެ. އަދި އެ އޮތޯރިޓީން ދޫކުރާ ބޭސް ވިއްކުމުގެ ހުއްދަ ނެތި ބޭސް ވިއްކުމަކީ މަނާ ކަމެއް ކަމުގައި ބުނެފައިވެއެވެ.

އެއާ ޚިލާފަށް މަސައްކަތްކުރާ ތަންތަނާއި މީހުންނާ މެދު ފިޔަވަޅު އަޅާނެ ކަމަށް އިއުލާނުގައި ވެއެވެ.

މީގެ އިތުރުން ބޭސް ގަންނައިރު، އެ ބޭސްފިހާރައިގައި އާންމުކޮށް ފެންނާނެ ގޮތަށް ބޭސް ވިއްކުމުގެ ހުއްދަ ހަރުކޮށްފައި ވޭތޯ ބެލުމަށާއި ބޭސް ވިއްކަން ތިބޭ މީހުން ތިބެނީ އެ އޮތޯރިޓީން ދޫކޮށްފައިވާ އައިޑީ ކާޑު އަޅައިގެންތޯ ކަށަވަރު ކުރުމަށް އެ އޮތޯރިޓީން ވަނީ އިލްތިމާސް ކޮށްފައެވެ.

ގަންނަ ބޭހުގެ މުއްދަތު ހަމަވާ ތާރީހު ބެލުމަށާއި އެ ބޭހެއް ބޭނުންކުރާނެ ގޮތުގެ އިރުޝާދު ރަނގަޅަށް ލިޔެފައި ހުރިތޯ ކަށަވަރު ކުރުމަށް ވެސް އެ އޮތޯއިޓީގެ އެދިފައިވެއެވެ.

މީގެ އިތުރުން އެކަމާ ބެހޭ އިތުރު މައުލޫމާތެއް ބޭނުންވާ ނަމަ، 7200321 އަށް ގުޅުމަށް އެފްޑީއޭއިން އެދިފައިވެ އެވެ.