ހުމާއި އަރިދަފުސް ރޯގާއަށް ހާއްސަ ފްލޫ ކްލިނިކެއް އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ގާއިމުކޮށްފި އެވެ.

އުމުރާގެ އަޅުކަމުން އެނބުރި އަންނަ ފަރާތްތަކަށް ޚާއްޞަކޮށް ޤާއިމުކުރި ފްލޫ ކްލިނިކެއް އަންނަ ފަރާތްތަކުން ފުރަތަމަ ދާން ޖެހޭނީ އީ.އާރް ޓްރައިޖަށެވެ.

އައިޖީއެމްއެޗް އިން ބުނީ އަލަށް ގާއިމުކުރި ފްލޫ ކްލިނިކުން ޑޮކްޓަރަށް ދެއްކުމާއި ލޭގެ ސާމްޕަލް ނެގުމުގެ ހިދުމަތް ކޮންމެ ދުވަހެއްގެ ހެނދުނު 10:00 އިން ރޭގަނޑު 22:00 އަށް ހޮސްޕިޓަލުގެ ކޮންސަލްޓޭޝަން ރޫމް ނަންބަރު 10 އިން ލިބޭނެ ކަމަށެވެ.

އެގޮތުން ކިއުބީ ޓޯކެން ސިސްޓަމްއިން ފުލޫ ކުލިނިކުގެ ޓޯކެން ނަމްބަރެއް ނެގުމަށްފަހު، ފުލޫ ކްލިނިކަށް ނުވަތަ އިމަޖެންސީ ރޫމަށް ވަޑައިގަތުމަށް ޓްރައޭޖްއިން އިރުޝާދު ދޭނެ ކަމަށް އައިޖީއެމްއެޗް އިން ބުނެއެވެ.

މި ދުވަސްވަރު ޢުމްރާގެ އަޅުކަމަށްފަހު ގިނަ ބަޔަކު އަނބުރާ ރާއްޖެ ދަނީ އަންނަމުނެވެ. އަދި ކޮންމެ އަހަރަކުވެސް މިފަދަ ދުވަސްވަރުތަކުގައި ނޭވާލުމުގެ ނިޒާމުން ފެތުރޭ ބަލިތައް އިތުރުވެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މިދިޔަ މަހު އަރިދަފުސް ރޯނގާ ޖެހިގެން 28،619 މީހުން ޑޮކްޓަރަށް ދައްކާފައިވެ އެވެ. މިދިޔަ މަހު ބޭރަށް ހިންގައިގެން 2،931 މީހުން ޑޮކްޓަރަށް ދައްކި އެވެ.

އެޗްޕީއޭ އިން އާންމުކޮށްފައިވާ ތަފާސް ހިސާބުތަކުން ފެންނަ ގޮތުގައި މިދިޔަ ޑިސެމްބަރުގައި ރޯގާ ޖެހިގެން ރިޕޯޓް ކުރި އަދަދު ކުރީ އަހަރުގެ ޑިސެމްބަރު މަހާ އަޅާބަލާއިރު ދަށް ނަމަވެސް ޑެންގީ ޖެހުނު މީހުންގެ އަދަދު ވަރަށް ބޮޑަށް އިތުރެވެ.

ތަފާސް ހިސާބުތަކަށް ބަލާއިރު މިދިޔަ މަހު 413 ޑެންގީ ކޭސް ރިޕޯޓް ކޮށްފައިވާއިރު 2024 ވަނަ އަހަރުގެ ޑިސެމްބަރު މަހު ރިޕޯޓް ކޮށްފައިވަނީ އެ ބަލީގެ އެންމެ 70 ކޭސް އެވެ. އެހެންކަމުން މިއީ 490 ޕަސެންޓް އިތުރުވުމެކެވެ.

މިދިޔަ ޑިސެމްބަރުގައި ރޯގާ ޖެހިގެން ރިޕޯޓްކުރީ 28،619 މީހުންނެވެ. އަދި އޭގެ ކުރީ އަހަރުގެ ޑިސެމްބަރުގައި ވެސް އެ އަދަދު ހުރީ 30،590ގަ އެވެ.  އެހެންކަމުން ކުރީ އަހަރުގެ ޑިސެމްބަރު މަހާ އަޅާބަލާއިރު ވެސް މިދިޔަ ޑިސެމްބަރު މަހު ރޯގާގެ ކޭސްތައް މަދެވެ.

ރާއްޖޭގައި ޑެންގީ ހުން އިތުރުވަމުން އަންނާތީ، ރައްކާތެރިވުމަށް, އެޗްޕީއޭއިން މިދިޔަ މަހު ވަނީ އިރުޝާދު ވެސް ދީފައެވެ. އެހެންކަމުން މަދިރީގެ ކިބައިން ރައްކާތެރިވުމާއި، މަދިރި މަދުކުރުމަށް ކުރެވެން ހުރި މަސައްކަތްތައް ކުރުމަށް އެ އެޖެންސީއިން ވަނީ އިލްތިމާސްކޮށްފައެވެ.

އެޗްޕީއޭގެ ހިސާބުތައް ދައްކާ ގޮތުން، ޑިސެމްބަރުގައި އިންފްލުއެންޒާއަށް 560 ޓެސްޓެއް ހެދި އެވެ. އޭގެ ތެރެއިން 152 މީހަކު އެ ބައްޔަށް ޕޮޒިޓިވް ވެފައިވެ އެވެ.

ބޭރަށް ހިންގުމުގެ ކޭސްތަކަށް ބަލާއިރު ވެސް މިދިޔަ އަހަރުގެ ނޮވެންބަރު މަހަށް ވުރެން ޑިސެމްބަރު މަހު ވަނީ ކޭސްތައް ދަށަށް ގޮސްފައެވެ. ނޮވެންބަރުގައި 4102 މީހަކަށް އެ ބަލި ޖެހިފައިވާއިރު ޑިސެމްބަރު މަހު އެ ބަލި ޖެހިގެން ރިޕޯޓް ކޮށްފައިވަނީ 2931 ކޭސްއެވެ.