އިންޑޮނޭޝިއާގައި 11 މީހުންނާއެކު ދަތުރުކުރަނިކޮށް ޚަބަރެއްނުވެ ގެއްލުނު ބޯޓުގެ ބައިތައް އެޤައުމުގެ ސަލާމަތީ ބާރުތަކުން ހޯދައިފިއެވެ.

މި ބޯޓު ވެއްޓިފައިވަނީ އިންޑޮނޭޝިއާގެ ސުލަވެސީ ރަށުގެ ފަރުބަދަމަތީ ސަރަހައްދަކަށް ތިރިކުރަން އުޅުމުގެ ތެރޭގައި، މޫސުން ގޯސްވެ ވިލާގަނޑެއްގެ ތެރޭގައި ޖެހިގެން ކަމަށް ބެލެވެއެވެ. އިންޑޮނޭޝިއާގެ މައި ރަށް ކަމަށްވާ ޖާވާގެ ޔޮގްޔަކާޓާ އިން ފުރައިގެން ސައުތު ސުލަވެސީގެ ވެރިރަށް މަކަސާރަށް ދަތުރުކުރަނިކޮށް، ހޮނިހިރު ދުވަހު ރާޑަރުން ގެއްލުނު މި ކުޑަ ބޯޓުގެ ބައިތައް ފެނިފައިވަނީ އާދީއްތަ ދުވަހުއެވެ.

މަކަސާގެ ސާޗް އެންޑް ރެސްކިއު އޮފީހުގެ އިސްވެރިޔާ މުހައްމަދު އާރިފް އަންވަރު މީޑިއާތަކަށް މަޢުލޫމާތު ދެއްވަމުން ވިދާޅުވީ، އާދީއްތަ ދުވަހު ހެނދުނު އެއާފޯސްގެ ހެލިކޮޕްޓަރެއްގައި ކުރި މަސައްކަތުން ބުލޫސަރައުންގް ފަރުބަދައިގެ ޖަންގަލި ތެރެއިން ބޯޓުގެ ކުޑަދޮރެއް ކަމަށް ބެލެވޭ އެއްޗެއް ފެނިފައިވާ ކަމަށެވެ. އެއަށްފަހު އެއްގަމު މަގުން ކުރި މަސައްކަތުން، ބޯޓުގެ މައިގަނޑު ބައިތަކާއި ބޯޓުގެ ފަހަތު ބައި ފަރުބަދައިގެ އުތުރު ފަރާތުން ފެނިފައިވާ ކަމަށް އޭނާ ވިދާޅުވިއެވެ.

"ބޯޓުގެ މައިގަނޑު ބައިތައް ފެނުމުން، ބޯޓު ހޯދަން ކުރާ މަސައްކަތް ކުރަންޖެހޭ ސަރަހައްދު ވަރަށް ބޮޑަށް ހަނިވެ، މުހިންމު ކުރިއެރުމެއް ވަނީ ލިބިފައި، މިހާރު އަހަރެމެންގެ ޓީމުތަކުން އެންމެ އިސްކަމެއް ދެނީ ބޯޓުން ދަތުރުކުރި މީހުން ހޯދުމަށް. ހާއްސަކޮށް ދިރިތިބި ބަޔަކު އުޅޭތޯ ބެލުމަކީ އަހަރެމެންގެ މިވަގުތުގެ އަމާޒު" އަންވަރު ވިދާޅުވިއެވެ.

އިންޑޮނޭޝިއާ އެއާ ޓްރާންސްޕޯޓުން އޮޕަރޭޓްކުރާ 'އޭ.ޓީ.އާރު 42-500' މަރުކާގެ މި ބޯޓު އެންމެ ފަހުން ރާޑަރަށް ފެނިފައިވަނީ ސައުތު ސުލަވެސީގެ ފަރުބަދަމަތީ ސަރަހައްދެއް ކަމަށްވާ މާރޯސްގެ ލިއަންގް-ލިއަންގް ސަރަހައްދުންނެވެ. މި ބޯޓުގައި ތިބީ 8 ފަޅުވެރިންނާއި، އެޤައުމުގެ މިނިސްޓްރީ އޮފް މެރިން އެފެއާޒް އެންޑް ފިޝަރީޒްގެ 3 އޮފިޝަލުންނެވެ.