އިރާނުގެ މުޒާހަރާތަކުގައި "އެތައް ހާސް ބަޔަކު މަރުވުމުގެ" ފަހަތުގައި ވަނީ އެމެރިކާއާއި އިސްރާއީލާ ގުޅުންހުރި ފަރާތްތައް ކަމަށް އެގައުމުގެ ރޫހާނީ ލީޑަރު އާޔަތުﷲ އަލީ ޚާމަނާއީ ވިދާޅުވެއްޖެއެވެ.

ޚާމަނާއީ ވިދާޅުވީ އިރާނުގައި ސަރުކާރާ ދެކޮޅަށް ކުރަމުންދާ މުޒާހަރާތަކުގައި އެތައް ހާސް ބަޔަކު މަރާލުމުގެ ޒިންމާ އުފުލަންޖެހޭނީ އެމެރިކާއާއި އިސްރާއީލާ ގުޅުންހުރި ފަރާތްތަކުން ކަމަށެވެ.

ދެ ހަފުތާއަށްވުރެ ގިނަ ދުވަހަށް ދެމިގެންދިޔަ މި ހަމަނުޖެހުންތަކުގައި ބޮޑެތި ގެއްލުންތަކެއް ދީ، އެތައް ހާސް ބަޔަކު މަރާލާފައިވަނީ އިސްރާއީލާއި އެމެރިކާގެ މަދަދުލިބޭ ގުރޫޕުތަކުން ކަމަށް ހޮނިހިރު ދުވަހު ޚާމަނާއީ ވިދާޅުވިއެވެ.

މި ހަމަނުޖެހުންތަކުގައި އެ ދެ ގައުމުގެ ސީދާ ބައިވެރިވުން އޮތް ކަމަށް ތުހުމަތު ކުރައްވަމުން، އެމެރިކާގެ ރައީސް ޑޮނަލްޑް ޓްރަމްޕަކީ "ކުށްވެރިއެއް" ގެ ގޮތުގައި އޭނާ ސިފަކުރެއްވިއެވެ.

އިރާނުގެ ދައުލަތުގެ މީޑިއާއިން ރިޕޯޓުކޮށްފައިވާ ގޮތުގައި، އިރާނާ ދެކޮޅަށް އެންމެ ފަހުން ހިންގި މި ހަރަކާތްތައް ތަފާތުވަނީ، މީގައި އެމެރިކާގެ ރައީސް އަމަލީގޮތުން ބައިވެރިވެވަޑައިގެންފައިވާތީއެވެ.

އިރާނުގެ ކަމާބެހޭ ފަރާތްތަކުން ދަނީ މި ހަމަނުޖެހުންތަކުގެ އިލްޒާމު ބޭރުގެ ބާރުތަކުގެ ބޮލުގައި އަޅުވަމުންނެވެ. ވަކިން ހާއްސަކޮށް، އެގައުމުގެ ވާދަވެރި އިސްރާއީލާއި އެމެރިކާއިން އިރާނުގެ ހަމަޖެހުން ނަގާލުމަށް ރާވައިގެން ކަންކަން ކުރަމުންދާ ކަމަށް އެފަރާތްތަކުން ތުހުމަތުކުރެއެވެ.

އިރާނުން ބޭރުގައި ހަނގުރާމައެއް ފެށުމަށް ބޭނުންނުވާ ކަމަށާއި، ނަމަވެސް މިކަމުގެ ޒިންމާ އުފުލަންޖެހޭ ފަރާތްތަކަށް ހައްގު އަދަބު ދޭނެ ކަމުގެ އިންޒާރު ޚާމަނާއީ ދެއްވިއެވެ. "އަހަރެމެން ގައުމު ހަނގުރާމައެއްގެ ތެރެއަށް ނުވައްދާނަން، އެކަމަކު ގައުމުގެ އެތެރެއިންނާއި ބޭރުން މި ޖަރީމާ ހިންގި ކުށްވެރިންނަށް އަދަބު ނުދީއެއް ދޫނުކުރާނަން،" އޭނާ ވިދާޅުވިއެވެ.

މަރުވި މީހުންގެ ރަސްމީ އަދަދެއް އަދި ކަށަވަރުވެފައި ނުވި ނަމަވެސް، އެމެރިކާގައި ހަރަކާތްތެރިވާ އިންސާނީ ހައްގުތަކަށް މަސައްކަތްކުރާ ޖަމިއްޔާއެއް ކަމަށްވާ 'ހަރާނާ އިން ބުނާ ގޮތުގައި މި މުޒާހަރާތަކުގައި 3,000 އަށްވުރެ ގިނަ މީހުން ވަނީ މަރުވެފައެވެ. މިހާތަނަށް އިރާނުގެ އޮފިޝަލުން އިއުތިރާފުވެފައިވަނީ ސަލާމަތީ ބާރުތަކުގެ މެންބަރުން ހިމެނޭހެން އެތައް ސަތޭކަ ބަޔަކު މަރުވެފައިވާ ކަމަށެވެ.