ޗެލްސީގެ ހެޑް ކޯޗެއްގެ ގޮތުގައި ލިއަމް ރޮސީނިއާ އިރުޝާދުދިން ފުރަތަމަ ޕްރިމިއާ ލީގު މެޗުގައި، ބްރެންޓްފޯޑް އަތުން އުނދަގޫ މޮޅެއް އެޓީމުން ހޯދައިފިއެވެ.

ފުރަތަމަ ހާފުގައި ޔޮއާއޯ ޕެޑްރޯ ކާމިޔާބުކުރި ބާރު ގޯލާއި، ދެވަނަ ހާފުގައި ކޯލް ޕާމާ ޖެހި ޕެނަލްޓީއާއެކު، މިއީ ޗެލްސީގެ ކޯޗުގެ ގޮތުގައި ރޮސީނިއާ ކުޅުނު ތިން މެޗުން ހޯދި ދެވަނަ މޮޅެވެ.

ނަމަވެސް، މުޅި މެޗަށް ބަލާއިރު ބްރެންޓްފޯޑުން ވަނީ ވަރުގަދަ ކުޅުމެއް ދައްކާފައެވެ. ބޯޅަ ހިފަހައްޓައިގެން ކުޅުމާއި ގޯލަށް ފޮނުވާލި ހަމަލާތަކަށް ބަލާއިރު، ޗެލްސީއަށްވުރެ ބްރެންޓްފޯޑުގެ ތަފާސް ހިސާބުތައް މެޗުގައި ރަނގަޅެވެ.

މެޗު ފެށިގެން ބްރެންޓްފޯޑުން ނުރައްކާތެރި ހަމަލާތަކެއް އުފެއްދިއިރު، ކެވިން ޝޭޑްއަށް ގޯލު ޖަހާނެ ރަނގަޅު ދެ ފުރުސަތެއް ލިބުނެވެ. އެގޮތުން އަމިއްލައަށް ގޯލަށް ފޮނުވާލެވެން އޮތް ފުރުސަތެއްގައި އޭނާ ވަނީ މިކޭލް ޑަމްސްގާޑަށް ބޯޅަ ޕާސްކޮށްލާފައެވެ.

ޗެލްސީން ކުޅުން ރަނގަޅުކޮށް ހަމަލާ އުފައްދަން ފެށިއިރު، ޕާމާ ފޮނުވާލި ބޯޅައެއް ގޯލުގެ ހުރަސް ދަނޑިމަތިން ދިޔައެވެ. އަދި ޕެޑްރޯއަށް ކުރި ފައުލަކާ ގުޅިގެން ޕެނަލްޓީއަކަށް އެދުނު ނަމަވެސް ރެފްރީ އެކަން ގަބޫލެއް ނުކުރިއެވެ. ނަމަވެސް، މެޗުގެ 26 ވަނަ މިނެޓުގައި ޕެޑްރޯ ވަނީ ލަނޑެއް ޖަހައި ޗެލްސީއަށް ކުރިހޯދައިދީފައެވެ.

މި ލަނޑު ފެނިގެންދިޔައީ ބްރެންޓްފޯޑުގެ މައިކަލް ކަޔޯޑޭއަށް ހެދުނު ގޯހެއްގެ ފައިދާ ނަގައި، އެންޒޯ ފެނާންޑޭޒް ތަނަވަސްކޮށްދިން ފުރުސަތެއްގައެވެ. ލިބުނު ބޯޅަ ޕެޑްރޯ ވަނީ ބްރެންޓްފޯޑުގެ ކީޕަރު ކޮއިމިން ކެލެހާ ނުކުމެ ހުއްޓާ ގޯލުގެ ތެރެއަށް ފޮނުވާލާފައެވެ.

ބްރެންޓްފޯޑުން ނަތީޖާ ހަމަހަމަކުރުމަށް ކުރި މަސައްކަތުގައި ޑަމްސްގާޑާއި، ޝޭޑް އަދި މަތިއަސް ޖެންސަންއަށް ރަނގަޅު ފުރުސަތުތަކެއް ލިބުނެވެ. މީގެ ތެރެއިން ޖެންސަން ފޮނުވާލި ބޯޅަ ބީހުނީ ގޯލުގެ ދަނޑީގައެވެ. އަނެއްކޮޅުން ޗެލްސީގެ އަލެހަންދްރޯ ގާނާޗޯއަށް ހުސް ގޯލަކަށް ބޯޅަ ފޮނުވާލަން ލިބުނު ރަން ފުރުސަތެއް އޭނާ ވަނީ ބޭކާރުކޮށްލާފައެވެ.

ދެވަނަ ހާފު ފެށިގެން މާގިނައިރެއް ނުވަނީސް، ޝޭޑްއާ އެކަނި ކުރިމަތިލާން ޖެހުނު ވަގުތު ޗެލްސީގެ ކީޕަރު ރޮބަޓް ސަންޗޭޒް ވަނީ ހުށިޔާރުކަމާއެކު އެ ބޯޅަ ދިފާއުކޮށްފައެވެ.

ބްރެންޓްފޯޑުން މެޗުގެ ފަހުކޮޅު ވަރުގަދައަށް ޕްރެޝަރު ކުރަން ފެށުމުން، ނަތީޖާ ދެމެހެއްޓުމަށްޓަކައި ކޯޗު ރޮސީނިއާ ވަނީ ގާނާޗޯގެ ބަދަލުގައި އެންޑްރޭ ސަންޓޯސް ކުޅެން އަރުވައި، ޑިފެންސް ވަރުގަދަކޮށްފައެވެ.