އިނގިރޭސި ޕްރިމިއާ ލީގުގައި މިރޭ މެންޗެސްޓަރ ސިޓީ އާއި ދެކޮޅަށް މެންޗެސްޓަރ ޔުނައިޓެޑް ކުޅުނު މެޗު 2-0 ގެ ނަތީޖާއަކުން ޔުނައިޓެޑް އިން ކާމިޔާބުކޮށްފިއެވެ.

މެންޗެސްޓަރ ޔުނައިޓެޑްގެ ހެޑް ކޯޗެއްގެ ގޮތުގައި މައިކަލް ކެރިކްގެ ދެވަނަ ދައުރުގެ ފުރަތަމަ މެޗަށް ތައްޔާރުވަމުން ދިޔަ ވަގުތު، އޭނާ ސިފަކުރި ގޮތުގައި އޯލްޑް ޓްރެފޯޑަކީ ޖާދޫވީ މައިދާނެކެވެ.

މެންޗެސްޓަރ ސިޓީއާ ދެކޮޅަށް ޔުނައިޓެޑުން މިހާ ފުރިހަމަ ކުޅުމެއް ދައްކާފާނެ ކަމަށް ގިނަ ބަޔަކު އުންމީދެއް ނުކުރެއެވެ. ޔުނައިޓެޑްގެ ކުޅުން ފެނިފައި، މެޗުގެ ކުރީކޮޅު ޑިއޯގޯ ޑަލޮޓަށް ރަތް ކާޑެއް ދައްކައި ދަނޑުން ފޮނުވާލި ނަމަވެސް، ސިޓީ ބަލިވުމުގެ ފުރުސަތު އޮތް ކަމަށް ޕެޕް ގާޑިއޯލާވެސް ވަނީ އެއްބަސްވެފައެވެ.

މި ހޯދި 0-2 ގެ ކާމިޔާބީއާއެކު، ކެރިކް ބަލިކުރި މަޝްހޫރު ކޯޗުންގެ ލިސްޓަށް ގާޑިއޯލާގެ ނަން މިވަނީ އިތުރުވެފައެވެ. މީގެ ކުރިން އޭނާ ވަނީ އުނާއި އެމެރީ އާއި މިކޭލް އާޓެޓާ ފަދަ ކޯޗުންގެ މައްޗަށް ކުރި ހޯދާފައެވެ. މީގެ އިތުރުން ތޯމަސް ޓުޗެލްގެ ކޯޗުކަމުގައި ކުޅުނު ޗެލްސީއާ ދެކޮޅަށް ކުޅެ މެޗު އެއްވަރުކޮށްފައިވެސް ވެއެވެ.

ދެހާސް ހަ ވަނަ އަހަރު ކުޅުންތެރިއެއްގެ ގޮތުގައި ޔުނައިޓެޑާ ގުޅުނު ދުވަސްވަރު ސަޕޯޓަރުން އޭނާއަށް ހާއްސަކޮށްގެން ހެދި ލަވައިގެ އަޑާއެކު ދަނޑުން ފައިބައިގެން ދިޔައިރު، ކެރިކް ހުރީ އޭނާގެ ކޯޗިން ކެރިއަރުގައި މިހާތަނަށް ކުރިމަތިލީ އެންމެ ކާމިޔާބު އެއް ދުވަހުގެ އުފަލުގައެވެ.

“މިއީ ވަރަށް ފުރިހަމަ ފެށުމެއް، އެކަމާ ދެބަސްވެވޭކަށް ނެތް،" ހިނިތުންވުމަކާއެކު ކެރިކް ބުންޏެވެ.

މެޗުގެ ފުރަތަމަ ހާފުގައި ޔުނައިޓެޑްގެ އަމަދް ޑިއާލޯ އާއި ބްރޫނޯ ފެނާންޑޭޒް ދެ ލަނޑު ޖެހި ނަމަވެސް ވީޑިއޯ ބެލުމަށްފަހު ރެފްރީ ވަނީ އެއީ އޮފްސައިޑް ލަނޑުތަކެއް ކަމަށް ނިންމާފަ އެވެ.

މެޗުގެ 65 ވަނަ މިނިޓުގައި ބްރޫނޯ ފެނާންޑޭޒް ދިން ޕާހަކުން ބްރަޔަން އެމްބުއޭމޯ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.

އަދި އޭގެ 11 މިނިޓު ފަހުން މެތިއުސް ކޫނިއާ ދިން ބޯޅަ އަކުން ޕެޓްރިކް ޑޯގޫ ވަނީ އިތުރު ލަނޑެއް ޖަހާ މެޗުގެ ނަތީޖާ 2-0 އަށް ބަދަލުކޮށްފަ އެވެ.

މި މެޗުގެ ފުރިހަމަ ވަގުތު ހަމަވެ އިންޖަރީ ވަގުތުގެ ކުޅުމުގައި ބަދަލު ކުޅުންތެރިއެއްގެ ގޮތުގައި ކުޅެން އެރި މޭސަން މައުންޓް އިތުރު ލަނޑެއް ޖެހި ނަމަވެސް މި ފަހަރުވެސް ވީޑިއޯ އެސިސްޓެންޓް ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފަ އެވެ.

ބޯޅަ ނެތް ވަގުތުތަކުގައި ޔުނައިޓެޑުން ކުޅުނު 4-4-2 ފޯމޭޝަން ފެނުނީ ވަރަށް ބަދަހިކޮށް، ރޭވުންތެރިކަމާއެކުގައެވެ. ހާއްސަކޮށް އަހުމަދު (އަމަދު) އާއި ޕެޓްރިކް ޑޯގޫގެ ކުޅުން ފާހަގަކޮށްލެވެއެވެ. ހަމަލާ އުފެއްދުމުގައި ޔުނައިޓެޑުން ފެނިގެންދިޔައީ އެ ކްލަބުގެ ޒަމާންވީ ސަގާފަތާ ގުޅޭ، ފޯރިގަދަ ކުޅުމެކެވެ.