މިދިއަ އަހރުގެ ޑިސެމްބަރު މަހު ބޭސްފަރުވާގެ އެހީގެ ގޮތުގައި ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) މެދުވެރިކޮށް 54 މިލިއަނަށްވުރެ ގިނަ ރުފިޔާ ސަރުކާރުން ހޭދަކޮށްފައިވާކަން ތަފާސް ހިސާބުތަކުން ދައްކައިފިއެވެ.

އެންސްޕާއިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން، ބޭސްފަރުވާގެ އެކިކަންކަމަށް ޚަރަދުކޮށްފައިވާ 54 މިލިއަންގެ ތެރެއިން ބޮޑު ހޭދައެއް ކޮށްފައިވަނީ ރާއްޖޭން ފަރުވާ ހޯދުމަށެވެ.

އެގޮތުން ރާއްޖޭގެ އަމިއްލަ ހޮސްޕިޓަލްތަކުން ފަރުވާ ހޯދުމަށް 35 މިލިޔަން ރުފިޔާ ޚަރަދުކޮށްފައިވެއެވެ. އަދި ރާއްޖޭން ބޭރުން ފަރުވާ ހޯދުމަށް 18.8 މިލިއަން ރުފިޔާ ވަނީ ހޭދަކޮށްފައެވެ.

ތަފާސް ހިސާބުތަކުން ފެންނަ ގޮތުގައި އެންސްޕާގެ ދަށުން އެންމެ ގިނަ މީހުންނަށް ހޭދަކޮށްފައިވަނީ ދީފަވަނީ ކަށީގެ ބަލިތަކަށެވެ.

މީގެ އިތުރުން ކަށީގެ ބަލިތަކާއި ގުޅިގެން 146 މީހަކާއި ވިހެއުމާ ގުޅޭ ކަންކަމުގައި 145 މީހަކާއި މައިބަދަ އާއިނަރުގެ ބަލިތައް 137 މީހެއްގެ އިތުރުން ނޭވާލާ ނިޒާމުގެ ބަލިތައް ފަރުވާ ހޯދި 123 މީހަކަށް އެންސްޕާ އިން ހޭދަކޮށްފައިވެއެވެ.

އޭގެ އިތުރުން ލޮލުގެ ބަލިތަކާއި ގުޅިގެން 122 މީހަކާއި ކުޑަކަމުދާ ނިޒާމު އަދި ކިޑްނީގެ ބަލިތަކާއި ގުޅިގެން 117 މީހަކާއި ކަރުންމަތީގެ ބަލިތަކުގައި 113 މީހެއްގެ އިތުރުން ކެންސަރު ބައްޔާ ގުޅިގެން 101 މީހަކާއި އަންހެނުންގެ ބަލިތަކާއި ގުޅިގެން 90 އަދި ހިތުގެ ބަލިތަކަށް 85 މީހަކަށް ބޭސްފަރުވާގެ އެހީގެ ގޮތުގައި ހޭދަކޮށްފައިވެއެވެ.

މީގެއިތުރުންވެސް އިތުރު 12 ބާވަތުގެ ބައްޔަށް ފަރުވާ ދިނުމަށް، 420 މީހުންނަށް ވަނީ އެހީތެރިކަން ފޯރުކޮށްދީފިއެވެ.

އަމިއްލަ ހޮސްޕިޓަލްތަކުގެ ތެރެއިން ޓްރީޓޮޕް ހޮސްޕިޓަލް އަދި އޭޑީކޭއިން ފަރުވާހޯދި 473 މީހުންނަށް އެހީތެރިކަން ދީފަވެއެވެ. މި ދެ ހޮސްޕީޓަލުން ހޯދި ފަރުވާއަށް 6.4 މިލިޔަން ރުފިޔާ ވަނީ ހޭދަކޮށްފައެވެ.

އެއީ ޓްރީޓޯޕްއިން ފަރުވާ ހޯދި 302 މީހުންނަށް ކޮށްފައިވާ 3.5 މިލިޔަން ރުފިޔާގެ ޚަރަދާއި، އޭޑީކޭއިން ފަރުވާ ހޯދި 171 މީހުންނަށް ކޮށްފަވާ 2.8 މިލިޔަން ރުފިޔާގެ ޚަރަދެވެ.

މީގެއިތުރުން އެސިސްޓިވް ޑިވައިސްތައް ހޯދުމަށް 3 މިލިޔަން ރުފިޔާގެ އެހީތެރިކަން ވަނީ ދީފައެވެ.