އާންމުކޮށް ގިނަ ބަޔަކު މޫދަށް އެރުމަށްޓަކައި ގޮސް މާފަންނު ރަސްފަންނު މޫދުން ތޫނު އިތާތަކެއް ފެނިއްޖެއެވެ.
އާންމުންގެ ސަމާލު ކަމަށް މިކަން ގެންނަވައި ގިޔާސުއްދީން ސްކޫލުގެ ކުރީގެ ޕްރިންސިޕަލް އަލީ މުސްތަފާ އޭނާގެ ފޭސްބުކްގައި ކުރެއްވި ޕޯސްޓުގައި ވަނީ ރަސްފަންނު މޫދުގައި ގިނަ އަދަދަކަށް ތޫނު އިތާ އެބަ ހުރި ކަމަށާއި އެހެންވެ ސަމާލުވުމަށް އެދިފަ އެވެ.
އެގޮތުން އެ ޕޯސްޓްގައި އިތާތައް އެންމެ ގިނައިން ހުރި ސަރަހައްދު އޭނާ ވަނީ ފާހަގަކޮށްދެއްވާފައެވެ. އެ ފޮޓޯގައިވާ ގޮތުން އިތާ އެންމެ ގިނައިން ޖަމާވެފައި އޮތީ ރަސްފަންނުގެ ރެސްޓޯރަންޓުގެ މޫދާ ދިމާލަށެވެ.
މުސްތަފާ ވަނީ އޭނާ އެ ސަރަހައްދުން ނަގާފައިވާ ބައެއް އިތާތަކުގެ ފޮޓޯތައް ވެސް އާންމުކުރައްވާފައެވެ. އޭނާ ފާހަގަކުރެއްވި ގޮތުގައި މިއީ ކޮޅު ވަރަށް ތޫނުކޮށް ހުންނަ އެއްޗެކެވެ.
މި ބާވަތުގެ އިތާ އާންމުކޮށް ހުންނަނީ މޫދުގެ ވެލިގަނޑުގެ ތެރެއަށް ވަރަށް ބޮޑަށް ވަދެފައި ކަމަށާއި، ބޭރަށް ފެންނަން ހުންނަނީ އޭގެ ވަރަށް ކުޑަ މިންވަރެއް ކަމަށް އޭނާ ވިދާޅުވިއެވެ.
މުސްތަފާ ވިދާޅުވީ އިތާތައް ހުރީ މޫދުގެ ވެލިގަނޑުގެ ތެރެއަށް ވަރަށް ބޮޑަށް ވަދެފައި ކަމަށެވެ. އެއީ ވަރަށް ތޫނުކޮށް ހުންނަ އެއްޗަކަށް ވާތީ، މޫދުގެ ވެލިގަނޑުމަތިން ހިނގާއިރު އެއަށް އެރި ފައި ކަނޑައިގެން ހިނގައިދާނެ ކަމަށެވެ.
"ހިކިފައި އޮންނައިރު ވަރަށް ގިނަ ބަޔަކު މިތަނުން ހިނގައި އުޅޭނެ. އެހެންވީމަ، ހުސް ފަޔާ އުޅޭ ނަމަ، ތަންކޮޅެއް ސަމާލުވޭ"
މި އިތާގެ މަހަކީ ކެއުމަށް ބޭނުންކުރެވޭ އެއްޗެއްކަން ފާހަގަކުރައްވައި މުސްތަފާ ވިދާޅުވީ، މޫދަށް އެރޭ މީހުން މި އިތާތައް ނަގަމުންދާ ނަމަ އެ ސަރަހައްދުން އިތާ މަދުވެ، މޫދަށް އެރޭ މީހުންނަށް އޮތް ނުރައްކާ ކުޑަކުރެވޭނެ ކަމަށެވެ.
