ލިލްއާ ދެކޮޅަށް ކުޅުނު މެޗުގައި އުސްމާން ޑެމްބެލޭ ކާމިޔާބުކޮށްދިން ދެ ލަނޑާއެކު، ފަސޭހަކަމާއެކު މޮޅުވެ ޕެރިސް ސެއިންޓް ޖާމަން (ޕީ.އެސް.ޖީ) އިން އަލުން ފްރެންޗް ލީގުގެ އެއްވަނައަށް ޖެހިލައިފިއެވެ.

މި މެޗުގެ ކުރީކޮޅު ފްރެންޗް ފޯވާޑް ޑެމްބެލޭ ވަނީ އޭރިއާ ބޭރުން ފޮނުވާލި ހިތްގައިމު ހަމަލާއަކުން ލަނޑެއް ޖަހައި ޓީމަށް ކުރިހޯދައިދީފައެވެ. އަދި މެޗުގެ 60 މިނެޓު ފަހަނައެޅިތަނާހެން، އޭރިއާ ތެރެއިން ގޯލްކީޕަރުގެ ބޯމަތިން ފޮނުވާލި މޮޅު ހަމަލާއަކުން އޭނާ ވަނީ ޕީ.އެސް.ޖީގެ ދެވަނަ ލަނޑު ކާމިޔާބުކޮށްދީފައެވެ. މެޗުގެ އިތުރު ވަގުތުގެ ތެރޭގައި ލިލްގެ ޑިފެންސަށް ހެދުނު ގޯހެއްގެ ފައިދާ ނަގައި ބްރެޑްލީ ބާކޯލާ ވަނީ ޕީ.އެސް.ޖީގެ ތިންވަނަ ލަނޑު ޖަހައިދީފައެވެ.

މިދިޔަ ސީޒަނުގެ ބެލޮންޑޯ އެވޯޑް ހާސިލްކުރި ޑެމްބެލޭއަށް މި ސީޒަނުގައި އަނިޔާގެ ސަބަބުން ގިނަ މެޗުތަކެއް ވަނީ ގެއްލިފައެވެ.

ޕީ.އެސް.ޖީގެ ކޯޗު ލުއިސް އެންރީކޭ ބުނި ގޮތުގައި، އުމުރުން 28 އަހަރުގެ ޑެމްބެލޭގެ ފަރާތުން މޮޅު ކުޅުމެއް ފެނުނު ނަމަވެސް، ކުޅުމުގެ އެހެން ދާއިރާތަކުން އޭނާ އަދި އިތުރަށް ކުރިއަރަން ޖެހެއެވެ.

"އެންމެންވެސް ބުނާނީ އުސްމާންއަކީ އެންމެ މޮޅު ކުޅުންތެރިޔާއޭ. އެކަމަކު އަހަރެންގެ ނަޒަރުގައި އެއީ އަދި އެންމެ ރަނގަޅު ގޮތެއް ނޫން. ޑިފެންސް ކުރުމުގައި އޭނާގެ އެންމެ މޮޅު ކުޅުން އަދި ފެންނަން އެބައޮތް،" އެންރީކޭ ބުންޏެވެ.

މި މޮޅާއެކު ޕީ.އެސް.ޖީ އޮތީ ތާވަލުގެ ދެވަނައިގައި އޮތް ލެންސަށްވުރެ ދެ ޕޮއިންޓް ކުރީގައެވެ. ނަމަވެސް، ހޮނިހިރު ދުވަހު އޮޒެއާ އާ ދެކޮޅަށް ކުޅޭ މެޗުން ލެންސް މޮޅުވެއްޖެނަމަ، އަލުން އެ ޓީމަށް ތާވަލުގެ އެއްވަނަ ލިބޭނެއެވެ.