އީރާނާ މެދު ގެންގުޅޭ ސިޔާސަތުގައި ޑޮނަލްޑް ޓްރަމްޕްގެ އަމާޒަކީ "ކާމިޔާބު ހޯދުން" ކަމަށް އޭނާ ވިދާޅުވެއެވެ. ނަމަވެސް، އަމިއްލަ ދިފާޢުގައި މަސައްކަތްކުރަމުންދާ އީރާނުގެ ފިކުރީ ވެރިކަމުގެ ނިޒާމާ ދެކޮޅަށް އެމެރިކާއަށް ފަސޭހަ ކާމިޔާބީއެއް ލިބޭނެ މަގެއް ނެތް ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ދެހާސް ވިހި ވަނަ އަހަރު އެމެރިކާއިން އީރާނުގެ އިސް ޖެނެރަލް ގާސިމް ސުލައިމާނީ އަވަހާރަކޮށްލުމުންނާއި، އެ ޤައުމުގެ ނިއުކްލިއަރ މަރުކަޒުތަކަށް ދިން ޙަމަލާތަކަށް އީރާނުން ދިން ރައްދު ރަމްޒީ ކަމަކަށް ވީނަމަވެސް، އެ ޤައުމުގެ މަރުކަޒީ ސަރުކާރަށް އަމާޒުކޮށްދޭ އެއްވެސް ޙަމަލާއަކަށް އީރާނުން ވަރުގަދަ ރައްދެއް ދޭނެ ކަމަށް ބެލެވެއެވެ.
އީރާނުގެ ރޫޙާނީ ލީޑަރު އަލީ ޚާމަނާއީ އާއި އެހެނިހެން އިސް ވެރިންނަށް އަމާޒުކޮށް ޙަމަލާދީ، ވެރިކަން ވައްޓާލަން ކުރާ މަސައްކަތް ނާކާމިޔާބުވެ، އޭގެ ސަބަބުން މަސްރަޙު އިތުރަށް ގޯސްވުމުގެ ފުރުޞަތު އެބައޮތެވެ. އަދި އެމެރިކާއިން އީރާނާ ދެކޮޅަށް ކުރާ ދިގުދެމިގެންދާ ހަނގުރާމައަކީ އެމެރިކާއަށާއި މުޅި ސަރަޙައްދަށް ވެސް ބޮޑެތި ގެއްލުންތަކަކާއި ބޮޑު ޚަރަދެއް ހިނގާނެ ކާރިސާއަކަށް ވެގެންދާނެއެވެ.
ސްޓިމްސަން ސެންޓަރުގެ ފެލޯ ބާބަރާ ސްލޭވިން ވިދާޅުވި ގޮތުގައި، މިހާރު ހުރި ހުރިހާ އިޚްތިޔާރުތަކަކީ ވެސް ނުރައްކާތެރި ކަންކަމެވެ. ވަކި ގޮތަކަށް ޢަމަލުކުރުމުން ނުކުމެދާނެ ނަތީޖާއެއް ދެނެގަތުމަކީ ދަތި ކަމެއް ކަމަށާއި، ޚާއްޞަކޮށް އީރާނުގެ ވެރިކަމުގެ ނިޒާމަށް ނުރައްކާވާކަން އިޙްސާސް ކުރެވިއްޖެ ނަމަ، އެ ސަރަޙައްދުގައި ތިބި އެމެރިކާ ސިފައިންނާއި އެމެރިކާގެ ބައިވެރިންނަށް އަމާޒުކޮށް އީރާނުން ވަރަށް ބިރުވެރި ޙަމަލާތަކެއް ދީފާނެ ކަމަށް އޭނާ ލަފާކުރެއެވެ.
މި އަހަރުގެ ކުރީކޮޅުން ފެށިގެން އީރާނުގައި ސަރުކާރާ ދެކޮޅަށް ކުރަމުންދާ މުޒާހަރާތަކާ ގުޅިގެން، މުޒާހަރާގެ ބައިވެރިން ސަރުކާރުން މަރާ ނަމަ، އެ ޤައުމަށް އަސްކަރީ ގޮތުން ނުފޫޒު ފޯރުވާނެ ކަމުގެ އިންޒާރު ޓްރަމްޕް ވަނީ ދެއްވާފައެވެ.
