މި ސީޒަން ނިމެންދެން މެންޗެސްޓަރ ޔުނައިޓެޑްގެ ވަގުތީ ހެޑް ކޯޗުގެ މަގާމަށް އެ ކްލަބުގެ ކުރީގެ ކުޅުންތެރިޔާ މައިކަލް ކެރިކް އައްޔަންކޮށްފިއެވެ.

ކެރިކްގެ އެސިސްޓަންޓް ކޯޗަކަށް ހުންނާނީ އިނގިރޭސި ގައުމީ ޓީމުގެ ކުރީގެ އެސިސްޓަންޓް ކޯޗު ސްޓީވް ހޮލެންޑެވެ. މީގެ އިތުރުން ޖޮނަތަން ވުޑްގޭޓް، ޖޮނީ އެވަންސް އަދި ޓްރެވިސް ބިނިއަން ވެސް އޭނާގެ ކޯޗިން ޓީމުގައި ހިމެނޭނެއެވެ.

ޔުނައިޓެޑްގެ ކުރީގެ މިޑްފީލްޑަރު، އުމުރުން 44 އަހަރުގެ ކެރިކް ވަނީ 2021 ވަނަ އަހަރު އޮލޭ ގަނާ ސޯލްޝެއާ މަގާމުން ވަކިކުރުމާ ގުޅިގެން ވެސް ވަގުތީ ގޮތުން ތިން މެޗުގައި ޔުނައިޓެޑަށް އިރުޝާދުދީފައެވެ. އަންނަ ހޮނިހިރު ދުވަހު މެންޗެސްޓަރ ސިޓީއާ ދެކޮޅަށް ކުޅޭ ޕްރިމިއާ ލީގުގެ ޑާބީ މެޗުގައި އޭނާ ފުރަތަމަ ފަހަރަށް ޓީމަށް އިރުޝާދުދޭން ބެންޗުން ފެންނާނެއެވެ.

ޔުނައިޓެޑުން ރޫބެން އަމޯރިމް މަގާމުން ވަކިކުރީ 14 މަސް ދުވަހު ޓީމާ ހަވާލުވެ ހުރުމަށްފަހު މިދިޔަ ޖެނުއަރީ މަހުގެ 5 ވަނަ ދުވަހުއެވެ. އޭގެ ފަހުން ކުޅުނު ދެ މެޗުގައި ޓީމަށް އިރުޝާދުދިނީ ވަގުތީ ގޮތުން ހަވާލުވެ ހުރި ޑަރެން ފްލެޗަރެވެ.

"އަލުން އެނބުރި ކްލަބާ ގުޅުމަކީ ބަޔާންކުރަން ދަތި، އުފާވެރި އިހުސާސެއް. މިއީ ވަރަށް ބޮޑު މަސްއޫލިއްޔަތެއް އަދި ލިބުނު ވަރަށް ބޮޑު ޝަރަފެއް. އަޅުގަނޑުމެން ބޭނުންވަނީ ކްލަބަށްޓަކައި ރަނގަޅު މަސައްކަތްތަކެއް ކޮށްދޭން،" ކްލަބުގެ 'އިންސައިޑް ކެރިންގްޓަން' ޕޮޑްކާސްޓަށް ދިން އިންޓަވިއުއެއްގައި ކެރިކް ބުންޏެވެ.

ކެރިކް އިތުރަށް ބުނީ މެޗުތަކުން މޮޅުވުމަށްޓަކައި ބައެއް ފަހަރު ކުޅުމުގެ ވައްޓަފާޅިއަށް ބަދަލު ގެންނަން ޖެހުނު ނަމަވެސް، އޭނާ ބޭނުންވަނީ ފޯރިގަދަ، ޕޮޒިޓިވް އަދި ސަޕޯޓަރުން ބަލާހިތްވާ ފަދަ ކުޅުމެއް ޓީމުން ފެނިގެންދިއުމަށެވެ.

ކެރިކް ވަނީ މިދިޔަ ބުރާސްފަތި ދުވަހު ޔުނައިޓެޑްގެ އިސްވެރިންނާ ބައްދަލުކޮށް، ޓީމާ މެދު އޭނާ ގެންގުޅޭ ތަސައްވަރު ހިއްސާކޮށްފައެވެ. އެ ބައްދަލުވުމުގައި ކްލަބުގެ ޗީފް އެގްޒެކެޓިވް އޮމާރު ބަރާޑާ އާއި ޑައިރެކްޓަރ އޮފް ފުޓްބޯލް ޖޭސަން ވިލްކޮކްސް އަށް ކެރިކްގެ ވިސްނުންތަކާއި ރޭވުންތައް ކަމުގޮސްފައިވާ ކަމަށް މައުލޫމާތު ލިބެއެވެ.