ފަލަސްތީނުގެ ގައްޒާއަށް ކުރިމަތިވި ގަދަ ފިނި މޫސުމުގެ ތޫފާނެއްގައި، އިސްރާއީލުން ހިންގަމުންދާ ނަސްލު ނައްތާލުމުގެ ހަނގުރާމައިގައި ގެއްލުން ލިބިފައިވާ އިމާރާތްތައް ވެއްޓި، މަދުވެގެން ފަސް މީހަކު މަރުވެފައިވާ ކަމަށް ސިއްހީ އޮފިޝަލުން ބުނެފިއެވެ.

އިސްރާއީލުން ދެ އަހަރަށްވުރެ ގިނަ ދުވަސްވަންދެން ދިން ނުރައްކާތެރި ބޮން އެޅުމުގެ ހަމަލާތަކާއި، އިންސާނީ އެހީ ފޯރުކޮށްދިނުމަށް ހުރި ހުރަސްތަކުގެ ސަބަބުން ގައްޒާގެ ދިރިއުޅުމުގެ ހާލަތު އޮތީ ނުރައްކާތެރި ފައްތަރެއްގައެވެ.

އޮކްޓޫބަރު 10 އިން ފެށިގެން ހަނގުރާމަ ހުއްޓާލުމުގެ އެއްބަސްވުމެއް އޮތް ނަމަވެސް، ފިނި މޫސުމުގެ ތޫފާންތަކުން ރައްކާތެރިވާނެ ފަދަ ހިޔާވަހިކަމެއް ފަލަސްތީނުގެ ރައްޔިތުންނަށް ލިބިފައި ނުވާ ކަމަށް އެހީދޭ ޖަމާއަތްތަކުން ބުނެއެވެ.

އަންގާރަ ދުވަހުގެ ތޫފާނުގައި މަރުވި މީހުންގެ ތެރޭގައި ދެ އަންހެނުންނާއި، އަންހެން ކުއްޖަކާއި ފިރިހެނަކު ހިމެނޭ ކަމަށް ގައްޒާގެ އެންމެ ބޮޑު ހޮސްޕިޓަލް ކަމަށްވާ އަލްޝިފާ ހޮސްޕިޓަލުން ވަނީ ކަށަވަރުކޮށްދީފައެވެ. މީގެ އިތުރުން، ގަދަ ފިންޏާ ހެދި ކުޑަކުދިންނާއި ދޮށީ އުމުރުގެ މީހުން މަރުވެފައިވާ ކަމުގެ ރިޕޯޓުތައް ވެސް ލިބެމުންދެއެވެ.

ގައްޒާގެ ހެލްތު މިނިސްޓްރީން ބުނި ގޮތުގައި، ގަދަ ފިންޏަށް ކެތްނުކުރެވިގެން އެއް އަހަރުގެ ފިރިހެން ކުއްޖަކު ރޭގެ ވަގުތެއްގައި ވަނީ މަރުވެފައެވެ. އަދި އެކަށީގެންވާ ހިޔާވަހިކަމެއް ނެތުމުގެ ސަބަބުންނާއި ގަދަ ފިންޏާ ހެދި ހޯމަ ދުވަހުގެ ރޭ ވެސް އިތުރު ދެ ކުދިން މަރުވެފައިވާ ކަމަށް އަލްޖަޒީރާ އެރެބިކް އިން ރިޕޯޓުކޮށްފައިވެއެވެ.

އދ. ގެ އިންސާނީ އެހީއާ ބެހޭ އޮފީހުން ހާމަކުރި ގޮތުގައި، އަންގާރަ ދުވަހު އައި ތޫފާނުގައި ސަތޭކައަށްވުރެ ގިނަ ފޭލިގެއާއި ވަގުތީ ހިޔާތައް ވަނީ ވަޔާ ބުރައިގެން ގޮސް ނުވަތަ ބޮޑެތި ގެއްލުންތަކެއް ލިބިފައެވެ.

ގައްޒާ ސިޓީގެ އައްސޭރިފަށުގެ ސަރަހައްދެއްގައި ހުރި ފޭލިގެއެއްގެ މައްޗަށް 8 މީޓަރު (26 ފޫޓު) އުސް ފާރެއް ވެއްޓި، އެއް އާއިލާއަކަށް ނިސްބަތްވާ ތިން މީހަކު ވަނީ މަރުވެފައެވެ. މަރުވި މީހުންގެ ތެރޭގައި 72 އަހަރުގެ މުޙައްމަދު ހަމޫދާއާއި، އޭނާގެ 15 އަހަރުގެ ކާފަ ދަރިފުޅުގެ އިތުރުން ޅީދަރިފުޅު ހިމެނެއެވެ. މި ހާދިސާގައި އިތުރު ފަސް މީހަކަށް އަނިޔާވެފައިވާ ކަމަށް އަލްޝިފާ ހޮސްޕިޓަލުން މައުލޫމާތު ދެއެވެ.