ރާއްޖޭގައި އެންމެ ގިނަ އަދަދެއްގެ ބޭސް ފިހާރަ ހިންގަމުންދިޔަ އެސްޓީއޯގެ ހުރިހާ ފާމަސީއެއް، ރާއްޖެއަށް ބޭސް އެތެރެ ކުރުމަށް ސަރުކާރުން އުފެއްދި ހާއްސަ ކުންފުނި " ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް" ގެ ދަށަށް ބަދަލުކުރަން ނިންމައިފި އެވެ.
ޤާނޫނު ނަންބަރު 7/2023 (ކުންފުނީގެ ޤާނޫނު) ގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން "ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް" ގެ ނަމުގައި ސަރުކާރުގެ ކުންފުންޏެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އުފެއްދެވީ މިދިޔަ ސެޕްޓެމްބަރު މަހުއެވެ.
މިއީ ޑޮކްޓަރީ ބޭހާއި، މެޑިކަލް ކޮންޒިއުމަބަލްސްއާއި، މެޑިކަލް އިކުއިޕްމަންޓް ގަނޑުކޮށް ގަނެ ދިވެހިރާއްޖެއަށް އެތެރެ ކުރުމުގެ މަސައްކަތް ފުޅާކޮށް، އެތަކެތި ރާއްޖޭގެ އެކި ހިސާބުތަކަށް ފޯރުކޮށްދިނުމުގެ އެންމެހައި މަސައްކަތް ކުރުމުގެ މަޤުސަދުގައި އުފައްދަވާފައިވާ ކުންފުންޏެކެވެ.
ސަރުކާރުން އުފައްދާފައިވާ ކުންފުނީގެ ދަށަށް އެސްޓީއޯގެ ހުރިހާ ފާމަސީއެއް ބަދަލުކުރުމުގެ މަރުހަލާ އަންނަ ހަފުތާގައި ފަށައި ފެބުރުއަރީ މަހުގެ ދެވަނަ ހަފުތާ ތެރޭ އެ މަސައްކަތް ނިންމަން ޖެހެއެވެ.
އެކި މަރުހަލާތަކަށް ބަހާލައިގެން އެ މަސައްކަތް ކުރާއިރު އަންނަ މަހުގެ 15ގެ ނިޔަލަށް ފާރމަސީތައް ބަދަލުކޮށް ނިމޭނެ ކަމަށް ނިމޭނެއެވެ. މި މަސައްކަތުގެ ދަށުން އެސްޓީއޯގެ 196 ފާރމަސީ ބަދަލު ކުރުމަށް ވަނީ ނިންމާފައެވެ.
އެސްޓީއޯގެ ފާމަސީތައް ބޭސް ކުންފުނީގެ ދަށަށް ބަދަލުކުރުމާއެކު އެ ފިހާރަތަކުގެ އޮޕަރޭޝަނުގައި އުޅުނު ހުރިހާ މުވައްޒަފުންނެއް ބޭސް ކުންފުންޏަށް ބަދަލުވާނެ އެވެ.
ބޭސް ފިހާރަތައް ހިންގުމުގެ އިތުރުން، ރާއްޖެއަށް ކޮންމެހެން ބޭނުންވާ ހުރިހާ ބޭހެއް އެތެރެކުރުމުގެ މަސައްކަތް ވެސް އަލަށް އުފެއްދި ކުންފުނީގެ ދަށަށް ބަދަލުކުރެވިގެންދާނެ އެވެ. ބޭސް ކުންފުނި ހިންގުމަށް މި އަހަރުގެ ބަޖެޓުގައި 107 މިލިއަން ރުފިޔާ ހިމަނާފައިވެ އެވެ.
މީގެ 42 އަހަރު ކުރިން 1984 އިން ފެށިގެން އެ ކުންފުނިން އަންނަނީ ފާމަސީތައް ހިންގަމުންނެވެ.
އެސްޓީއޯގެ ހުރިހާ ބޭސްފިހާރައަކާ، ސްޓޭޓް ފާމަސޫޓިކަލް އެންޑް މެޑިކަލް ސަޕްލައި އިން ހަވާލުވާން ތައްޔާރުވަމުން އަންނައިރު، އެންސްޕާ މެދުވެރިކޮށް ގެންނަ އެބްރޯޑް ޕްރެސްކްރިޕްޝަންތަކާއި ޔޫއެންޑީޕީ ބަލްކް ޕްރޮކިއުމެންޓް ބޭސްތައް ގެނައުމުގެ މަސައްކަތްތައް ވެސް އެ ކުންފުންޏާ ހަވާލުކުރާނެ އެވެ.
