މަސްތުވާތަކެތީގެ ވަބާއަކީ ދިވެހި މުޖުތަމައު ފުނޑުފުނޑުކޮށް، ގައުމުގެ ކުރިމަގު ކަމުގައިވާ ޒުވާނުންގެ ދިރިއުޅުން ބަރުބާދުކުރަމުންދާ ނުރައްކާތެރި ވަބާއެކެވެ. މި ވަބާ މުޖުތަމައުން ފޮހެލުމަށްޓަކައި ސަރުކާރުން ވަނީ ވަރުގަދަ އަޒުމަކާއެކު ހަރުދަނާ ސިޔާސަތެއް އެކުލަވާލާފައެވެ. އެއީ ހަމައެކަނި މަސްތުވާތަކެތި ބޭނުންކުރާ މީހުންގެ ފަހަތުން ދިއުމުގެ ބަދަލުގައި، ރާއްޖެއަށް މަސްތުވާތަކެތި އެތެރެކޮށް، އޭގެ ވިޔަފާރި ފުޅާދާއިރާއެއްގައި ކުރާ "ބޮޑުން" ހޯދައި، އެމީހުން ހުއްޓުވުމެވެ.

މަސްތުވާތަކެތީގެ ވިޔަފާރި ރާއްޖޭގައި އާދަޔާ ހިލާފު ބާރުމިނެއްގައި ފުޅާވަމުން ދިޔައިރު، އެކަން ހުއްޓުވުމަށް މީގެ ކުރިން ހަދާފައި އޮތް މަސްތުވާތަކެއްޗާ ބެހޭ ގާނޫނު އޮތީ އެކަމަށް ނުކުޅެދިފައެވެ. ނަމަވެސް، "އޮޕަރޭޝަން އަލިމަގު" ގެ ނަމުގައި ފުލުހުން ފެށި ހާއްސަ ހަރަކާތަކީ މި ނުބައި ވިޔަފާރީގެ މުގުލުގައި ތިބި މީހުންނަށް އައި ވަރުގަދަ ލޮޅުމެކެވެ.

މި އޮޕަރޭޝަނަކީ ރާއްޖޭގެ ތާރީޚުގައިވެސް ހިންގުނު އެންމެ ކާމިޔާބު އެއް އޮޕަރޭޝަނެވެ. އެއްވަގުތެއްގައި 100 އަށް ވުރެ ގިނަ ތަންތަން ބަލައި ފާސްކޮށް، 500 އަށް ވުރެ ގިނަ ފުލުހުން މި ހަރަކާތުގައި ބައިވެރިވިއެވެ.

މި އޮޕަރޭޝަނުގެ ތެރެއިން ހައްޔަރުކުރެވުނު 119 މީހުންނަކީވެސް ސީދާ މަސްތުވާތަކެތީގެ ވިޔަފާރީގައި އުޅޭ މީހުންނެވެ. އޭގެ ތެރޭގައި ވިޔަފާރީގެ ހުރިހާ ފަންތިއެއްގެ މީހުން ހިމެނެއެވެ. ފުލުހުން ވަނީ މަސްތުވާތަކެތި އެތެރެކޮށް އެތަކެތީގެ ވިޔަފާރިކޮށްގެން ހޯދާ ފައިސާ ލޯންޑާ ކުރާ ނެޓްވޯކެއް ހުއްޓުވައި، ގާނޫނީ ފިޔަވަޅު އަޅަން މާލެ އާއި ގއ. އަތޮޅުގައި ހާއްސަ މަސައްކަތްތަކެއް ކޮށްފައެވެ.

މުޅި ރާއްޖެއަށް ފުޅާކުރި މި އޮޕަރޭޝަނުގައި 105 ތަނެއް ފާސްކޮށް، 29.6 ކިލޯގެ ޑްރަގް ހޯދާފައިވެއެވެ. އަދި ހައްޔަރުކުރި މީހުންގެ ތެރެއިން 61 މީހަކު ޑްރަގަށް ޕޮޒިޓިވްވިއިރު، އެމީހުންގެ އެކައުންޓުތަކުގައި 300 މިލިއަނަށް ވުރެ ގިނަ ރުފިޔާ ދައުރުކޮށްފައިވާކަން ވަނީ ހާމަވެފައެވެ.

މި ނުރައްކާތެރި ވިޔަފާރީގެ އަސްލު އޮތީ ރާއްޖެއިން ބޭރުގައެވެ. މެލޭޝިއާ އާއި ތައިލެންޑް ފަދަ ގައުމުތަކުގައި ތިބެގެން ރާއްޖެއަށް ޑްރަގްސް ފޮނުވާ ދިވެހިން އެބަތިއްބެވެ.

މިގޮތުން މެލޭޝިއާގައި ތިބެގެން އެއާ ކާގޯ އަދި ސީ ކާގޯ މެދުވެރިކޮށް، އަވަނާއި ތެލި ފަދަ ބަދިގެ ސާމާނުގައި މަސްތުވާތަކެތި ފޮރުވައިގެން އެތެރެކުރާ ތިން ދިވެހިން ފުލުހުން ވަނީ ފާހަގަކޮށްފައެވެ. މީގެ އިތުރުން، މާލެ ތެރޭގައި ހިންގާ ޑްރަގު ކެފޭތައް ހުއްޓުވުމަށް ކުރިން ހުރި ހުރަސްތައް ނައްތާލައި، ފުލުހުންނަށް މިހާރު ވަނީ ގާނޫނީ އާ ބާރުތަކެއް ލިބިފައެވެ.

ނިމިދިޔަ އަހަރަކީ މަސްތުވާތަކެއްޗާ ދެކޮޅަށް ކުރި މަސައްކަތުގައި މުހިންމު ނަތީޖާތަކެއް ފެނުނު އަހަރެކެވެ. ގާނޫނަށް ގެނައި ތާރީޚީ ބަދަލާއެކު، ރާއްޖެއަށް މަސްތުވާތަކެތި އެތެރެކުރާ މީހުންނަށް މިހާރު އޮތީ މަރުގެ އަދަބެވެ.

ސުޕްރީމް ކޯޓުގެ ފަނޑިޔާރުން އިއްތިފާގު ނުވާ ހާލަތެއްގައިވެސް، ކުށް ސާބިތުވެއްޖެނަމަ އޮތީ އުމުރު ދުވަހުގެ ޖަލު ހުކުމެކެވެ. ގާނޫނުގައި މިހާރު އުމުރު ދުވަހުގެ ޖަލު ހުކުމަކީ ކުރިން އޮތް 25 އަހަރެއް ނޫނެވެ. އެއީ އެ މީހަކު މަރުވަންދެން ޖަލުގައި އޮތުމެވެ. މަސްތުވާތަކެތި ޓްރެފިކް ކުރާ މީހުންނަށްވެސް އޮތީ ހަމަ މި އަދަބެވެ.

ކުރީގައި މަސްތުވާތަކެތީގެ ބޮޑުން ސިޔާސީ ނުފޫޒު ބޭނުންކޮށްގެން މާފު ހޯދައި، އަލުން މުޖުތަމައަށް ނުކުމެ، ފުލުހުންނާއި ވަކީލުންގެ ކުރިމަތީގައި ފަހުރުވެރިކަމާއެކު ހިނގަމުން ދިޔަ ދުވަސްތައް މިހާރު މިވަނީ މާޒީވެފައެވެ. "އޮޕަރޭޝަން އަލިމަގު" އަކީ މަސްތުވާތަކެތީގެ ވިޔަފާރިކުރާ މީހުންނަށް އޮތް ބޮޑު ބިރެކެވެ. އަދި މިއީ މި ވަބާއިން ދިވެހި ގައުމު ސަލާމަތްކުރުމަށް އެޅުނު ވަރަށް ވަރުގަދަ ފިޔަވަޅެކެވެ.