ރާނާއެކު ވިޔަފާރީގެ މުއާމަލާތްތައް ކުރާ ޤައުމުތަކުން އެމެރިކާއަށް އެތެރެކުރާ މުދަލުން %25 ގެ ޓެރިފް (އިމްޕޯޓް ޑިއުޓީ) އެއް ނަގާނެކަމަށް ރައީސް ޑޮނަލްޑް ޓްރަމްޕް އިޢުލާން ކުރައްވައިފިއެވެ. ޓްރަމްޕް

މި ފިޔަވަޅު އަޅުއްވާފައިވަނީ އީރާނުގައި ސަރުކާރާ ދެކޮޅަށް ކުރަމުންދާ މުޒާހަރާތައް ހުއްޓުވުމަށް އެޤައުމުގެ ސަރުކާރުން ބާރުގެ ބޭނުންކޮށް، ގިނަ ބަޔަކު މަރާލުމާ ގުޅިގެންނެވެ.

މީގެ ކުރިންވެސް ރިޕޯޓްކޮށްފައިވާ ފަދައިން، އީރާނާއެކު ވިޔަފާރީގެ ގުޅުން ބާއްވާ ޤައުމުތަކުން އަންނަ މުދަލުން %25 ގެ ޓެކްސްއެއް ނަގާނެކަން ޓްރަމްޕް ވަނީ ކަށަވަރުކޮށްދެއްވާފައެވެ.

ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރޫތް ސޯޝަލް" ގައި އޭނާ ވިދާޅުވީ، މި ނިންމުމަށް "ވަގުތުން އަމަލުކުރަން ފަށާނެ" ކަމަށާއި، މިއީ އެންމެ ފަހުގެ ނިންމުން ކަމަށެވެ.

އީރާނަކީ މިހާރުވެސް އެމެރިކާގެ ހަރުކަށި ދަތިކުރުމުގެ ފިޔަވަޅުތަކާ ކުރިމަތިލަމުންދާ ޤައުމެކެވެ. މީގެ ސަބަބުން އެޤައުމުގެ ފައިސާގެ އަގު ވަރަށް ބޮޑަށް ވެއްޓި، އިންފްލޭޝަން މަތިވުމުގެ ސަބަބުން ކާބޯތަކެތީގެ އަގު ވަނީ %70 އަށްވުރެ މައްޗަށް އުފުލިފައެވެ.

އީރާނަށް އެތެރެކުރާ މުދަލުގެ ތިންބައިކުޅަ އެއްބަޔަކީ ކާބޯތަކެތި ކަމަށްވާއިރު، އަލަށް މި އިޢުލާންކުރި ޓެރިފްތަކުގެ ސަބަބުން ކުރިމަތިވާ އިތުރު ހުރަސްތަކާއެކު، ކާބޯތަކެތި ލިބުން ދަތިވެ، ތަކެތީގެ އަގުތައް އަތްނުފޯރާ ފަށަށް ދިއުމުގެ ބިރު ވަނީ ބޮޑުވެފައެވެ.

އީރާނުގެ އެންމެ ބޮޑު ވިޔަފާރި ބައިވެރިއަކީ ޗައިނާއެވެ. އޭގެ އިތުރުން އިރާޤު، ޔުނައިޓެޑް އަރަބް އެމިރޭޓްސް، ތުރުކީ އަދި އިންޑިއާއަކީވެސް އީރާނާއެކު ފުޅާދާއިރާއެއްގައި ވިޔަފާރިކުރާ ޤައުމުތަކެވެ.

މި ޓެރިފްތަކުގެ ސަބަބުން އެމެރިކާ އާއި ޗައިނާއާ ދެމެދު އޮތް ނުތަނަވަސްކަން އިތުރަށް ގޯސްވެ، ވިޔަފާރީގެ އައު ކުރިމަތިލުންތަކަކަށް މަގުފަހިވެގެންދާނެ ކަމަށް ބެލެވެއެވެ. ޚާއްޞަކޮށް، ޗައިނާއަކީ މިހާރުވެސް ދަތިކުރުމުގެ ފިޔަވަޅު އަޅާފައިވާ އީރާނުގެ ތެޔޮ އެންމެ ގިނައިން ގަންނަ އެއް ޤައުމެވެ.

މީގެ އިތުރުން، އީރާނަށް އަސްކަރީ ހަމަލާއެއް ދިނުމާ މެދުވެސް ޓްރަމްޕް ގެންދަވަނީ ވިސްނަވަމުންނެވެ. އޭނާ ވިދާޅުވި ގޮތުގައި މުޒާހަރާގެ ބައިވެރިންނާ ދެކޮޅަށް އީރާނުން ބޭނުންކުރަމުންދާ އަނިޔާވެރި އަމަލުތަކަކީ އެމެރިކާގެ "ރަތް ރޮނގު" ހުރަސްކުރަން ފެށުމެވެ.

ރައީސް ޓްރަމްޕަކީ އޭނާގެ ޚާރިޖީ ސިޔާސަތުތައް ކުރިއެރުވުމަށްޓަކައި އެހެން ޤައުމުތަކަށް ބިރުދެއްކުމުގެ ވަސީލަތެއްގެ ގޮތުގައި ތަކުރާރުކޮށް ޓެރިފްގެ ބޭނުންކުރައްވާ ބޭފުޅެކެވެ. މިފަދަ ނިންމުންތަކުގެ ޤާނޫނީ ސައްހަކަމާ މެދު އެމެރިކާގެ ސުޕްރީމް ކޯޓުން ވަރަށް އަވަހަށް ގޮތެއް ނިންމާނެ ކަމަށް ބެލެވެއެވެ.