މަތީ ތަޢުލީމު ޙާސިލުކުރަމުންދާ ދަރިވަރުންނަށް ސްޓޫޑެންޓް ލޯންގެ ގޮތުގައި މިދިޔަ އަހަރު ވަނަ 548 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށް ތަފާސް ހިސާބުތަކުން ދައްކައިފިއެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާ އިން އާންމުކޮށްފައިވާ ވުޒާރާގެ ތަފާސް ހިސާބުތަކަށް ބަލާއިރު މިދިޔަ އަހަރު ޖުމުލަ 596 ދަރިވަރުންނަށް 548 މިލިއަނަށްވުރެ ގިނަ ފައިސާ ސްޓޫޑަންޓް ލޯނުގެ ގޮތުގައި ދޫކޮށްފައިވެއެވެ.

ވޭތުވެދިޔަ ދެ އަހަރުގެ ތަފާސް ހިސާބުތަކުން ފާހަގަވާ ގޮތުގައި  2024 ވަނަ އަހަރާއި 2025 ވަނަ އަހަރު ސްޓޫޑެންޓް ލޯނުގެ ގޮތުގައި ދައުލަތުން ވަނީ 1.24 ބިލިއަނަށްވުރެ ގިނަ ރުފިޔާ ޚަރަދުކޮށްފައެވެ. އެގޮތުން 2025 ވަނަ އަހަރު 596 ދަރިވަރުންނަށްވަނީ ލޯނު ހަމަޖައްސައިދީފައެވެ. އަދި މިވީ 2 އަހަރުގެ ތެރޭގައި 1438 ދަރިވަރުންނަށްވަނީ ލޯނު ފޯރުކޮށްދީފައެވެ.

ސަރުކާރުންވަނީ ސްޓޫޑެންޓް ލޯނުގެ ދަށުން އެކުއްޖަކު ބޭނުން ޤައުމަކުން ކިޔެވުމުގެ އިންތިޒާމު ހަމަޖައްސަވާފައެވެ. އެހެންނަމަވެސް މިފުރުސަތުގައި މަތީ ތަޢުލީމު ޙާސިލުކުރުމުގެ ފުރުސަތު ދެނީ ރާއްޖެއަށް އެންމެ ބޭނުންވާ ދާއިރާތަކަށް ބަލައިގެންނެވެ.

މިވަގުތު ރާއްޖެ އާއި ރާއްޖެއިން ބޭރުގެ 36 ގައުމެއްގައި 1،740 ދަރިވަރުން ތައުލީމު ހާސިލް ކުރަމުން އަންނައިރު، އޭގެ ތެރޭގައި ހިމެނެނީ 1،072 އަންހެން ދަރިވަރުންނާއި 668 ފިރިހެން ކުދިންނެވެ.

ދެ އަހަރު ލޯނަށް ދޫކުރި ފައިސާގެ ތެރެއިން 548.16 މިލިއަން ރުފިޔާ ދޫކުރީ މިދިޔަ އަހަރު އެވެ. އެއީ 237 ފިރިހެން ދަރިވަރުންނާއި 359 އަންހެން ދަރިވަރުންނަށެވެ. މިދިޔަ އަހަރު 660 ދަރިވަރުން ދަސްވެނިވެފައިވެ އެވެ. އެއީ 368 އަންހެން ދަރިވަރުންނާއި 292 ފިރިހެން ދަރިވަރުންނެވެ.

ފުރަތަމަ ޑިގްރީ (ބެޗްލާސް ޑިގްރީ) ހަދާ ދަރިވަރުންގެ ކޯސް ފީ ދައުލަތުން ދައްކާ ގޮތަށް ނިމިދިޔަ އެމްޑީޕީ ސަރުކާރުން ފެށި ހިލޭ ޑިގްރީ ޕްރޮގްރާމުގެ ދަށުން މިދިޔަ އަހަރުގެ ނިޔަލަށް 6،640 ދަރިވަރުން ދަސްވިނިވިފައިވެއެވެ.

ހިލޭ ޑިގްރީގެ ދަށުން ދަސްވެނިވި 6،640 ދަރިވަރުންގެ ތެރެއިން 4،370 ދަރިވަރުންނަކީ އަންހެން ދަރިވަރުންނެވެ. ބާކީ 2،270 ދަރިވަރުންނަކީ ފިރިހެން ދަރިވަރުންނެވެ.