އާދީއްތަ ދުވަހު ކުވެއިތުގެ އެއަރ ޑިފެންސް ސިސްޓަމުން ދިން ހަމަލާތަކެއްގައި، އެމެރިކާގެ "އެފް-15 އީ ސްޓްރައިކް އީގަލް" މަރުކާގެ ތިން ބޯޓެއް އޮޅުމަކުން ވައްޓާލާފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކޮށްފިއެވެ.

އެކްސް މެދުވެރިކޮށް ނެރުނު ބަޔާނެއްގައި ސެންޓްކޮމް އިން ބުނީ، މި ހާދިސާގައި ބޯޓުތަކުގައި ތިބި ހަ ފަޅުވެރިންވެސް ސަލާމަތުން ބޯޓުން ފުންމާލާފައިވާ ކަމަށާއި، އެ އެންމެން މިހާރު ފެނިފައިވާއިރު އެމީހުންގެ ހާލު ރަނގަޅު ކަމަށެވެ.

ކުވެއިތުން މި ހާދިސާ ހިނގާފައިވާކަން ގަބޫލުކޮށްފައިވާ ކަމަށާއި، މިހާރު ކުރިއަށްދާ އޮޕަރޭޝަންތަކުގައި ކުވެއިތުގެ ދިފާއީ ބާރުތަކުން ދެމުންދާ އެހީތެރިކަމާއި އެއްބާރުލުމަށް ޝުކުރު އަދާކުރާ ކަމަށްވެސް އެ ބަޔާނުގައިވެއެވެ.

"މި ހާދިސާ ހިނގަން މެދުވެރިވި ސަބަބު ދަނީ ތަހުގީގު ކުރަމުން. އިތުރު ތަފްސީލު ލިބުނު ވަރަކުން ހާމަކުރަމުންދާނެ،" ސެންޓްކޮމްގެ ބަޔާނުގައި އިތުރަށް ބަޔާންކޮށްފައިވެއެވެ.

މި ހާދިސާ ހިނގާފައިވަނީ "އޮޕަރޭޝަން އެޕިކް ފިއުރީ" ގެ ދަށުން އެމެރިކާގެ ތިން ބޯޓު ކުވެއިތުގެ ވައިގެ ސަރަހައްދުން ދަތުރުކުރަމުން ދަނިކޮށް، އެކުވެރި ބާރުތަކުން ދިން ހަމަލާއެއްގައެވެ.

އިރާނުގެ މަތިންދާބޯޓުތަކާއި، ބެލިސްޓިކް މިސައިލް އަދި ޑްރޯން ހަމަލާތަކެއް ކުރިމަތިވެ، ވަރުގަދަ ކުރިމަތިލުންތަކެއް ހިނގަމުންދިޔަ ވަގުތެއްގައި، ކުވެއިތުގެ ދިފާއީ ނިޒާމަށް އޮޅުމެއް އަރައި، އެމެރިކާގެ މި ބޯޓުތަކަށް ހަމަލާދީ ވައްޓާލެވުނީއެވެ.

ބޯޓުގައި ތިބި ހަ މީހުންވެސް ވަނީ ކާމިޔާބުކަމާއެކު ސަލާމަތްކުރެވިފައެވެ. ކުވެއިތު ސަރުކާރުން ވަނީ މި ހާދިސާގެ ޒިންމާ ނަގައި، ހިނގައިދިޔަ ކަންތަކަށް އިއުތިރާފުވެފައެވެ. އެމެރިކާގެ އަސްކަރިއްޔާއިން ވަނީ މި ދަނޑިވަޅުގައި ކުވެއިތުގެ އަސްކަރިއްޔާއިން ދައްކުވައިދިން އެއްބާރުލުމަށްޓަކައި އެ ގައުމަށް ތައުރީފުކޮށްފައެވެ.

އީރާނުން އިސްރާއީލާއި އެމެރިކާއާއި ގުޅުން އޮންނަ އަސްކަރީ މަރުކަޒުތަކަށް ދެމުން އަންނަ ހަމަލާތަކަކީ މިދިޔަ މަހުގެ 28 ވަނަ ދުވަހު އެމެރިކާއާއި ގުޅިގެން އިސްރާއީލުން އީރާނަށް ދިން ހަމަލާތަކުގެ ބަދަލުހިފުމުގެ ގޮތުން ދެމުން އަންނަ ހަމަލާތަކެވެ.

އެގޮތުން އެ ހަމަލާގެ ބަދަލު ހިފުމުގެ ގޮތުން އިސްރާއީލަށް ސީދާ ހަމަލާތަކެއް ފޮނުވާލާފައިވާއިރު، އީރާނުން ދަނީ މެދުއިރުމަތީގެ ގައުމުތަކުގެ ތެރެއިން އެމެރިކާގެ އަސްކަރީ މަރުކަޒުތައް ގާއިމުކޮށްފައިވާ އަރަބި ގައުމުތަކުގައި ހުންނަ އެ މަރުކަޒުތަކަށް ހަމަލާތައް އަމާޒު ކުރަމުންނެވެ.