އެމެރިކާއާއި އިސްރާއީލުން އީރާނުގެ 131 ސަރަޙައްދަކަށް ދެމުންގެންދާ ވަރުގަދަ ވައިގެ ހަމަލާތަކުގައި މިހާތަނަށް މަދުވެގެން 555 މީހުން ޝަހީދުވެފައިވާ ކަމަށް އީރާނުގެ ރެޑް ކްރެސެންޓް ސޮސައިޓީން ހާމަކޮށްފިއެވެ.

މި ހަމަލާތައް ކުރިއަށްދަނީ މެދުއިރުމަތީގައި ހުރި އެމެރިކާއާއި އިސްރާއީލުގެ މަސްލަހަތުތަކަށް އީރާނުން ބަދަލުހިފުމުގެ ހަމަލާތައް ދެމުންދާ ދަނޑިވަޅެއްގައެވެ.

މެހެރު ނިއުސް އެޖެންސީން ރިޕޯޓްކޮށްފައިވާ ގޮތުގައި، ހޯމަ ދުވަހުގެ ހެނދުނު އީރާނުގެ ދެކުނުގެ ފާރްސް ޕްރޮވިންސަށް ދިން ހަމަލާތަކުގައި އެކަނިވެސް 35 މީހުން ވަނީ މަރުވެފައެވެ. މީގެ އިތުރުން ތެހެރާންގެ ނީލޫފަރު މައިދާނަށް ދިން ހަމަލާއެއްގައި 20 އަށްވުރެ ގިނަ މީހުން މަރުވެފައިވާ ކަމަށްވެސް އެ އެޖެންސީން ބުނެފައިވެއެވެ.

ފާރްސް ނިއުސް އެޖެންސީން ބުނި ގޮތުގައި، ސަނަންދަޖް ސިޓީގެ ޕޮލިސް ސްޓޭޝަން ކައިރީގައި ހުރި އާންމުން ދިރިއުޅޭ އިމާރާތްތަކަކަށް އަމާޒުކޮށް ދިން ހަމަލާތަކުގައި ދެ މީހަކު މަރުވެ، އިމާރާތްތައް ވަނީ ބިމާ ހަމަވެފައެވެ. ތަސްނީމް ނިއުސް އެޖެންސީން ރިޕޯޓްކުރި ގޮތުގައި އެމެރިކާއާއި އިސްރާއީލުގެ ފައުޖުތަކުން އެ ސިޓީގެ އާބާދީ ބޮޑު ސަރަޙައްދުތަކަށް ހަ މިސައިލް ހަމަލާ ފޮނުވާލާފައިވެއެވެ.

އިންޓަނޭޝަނަލް އެޓޮމިކް އެނާޖީ އެޖެންސީ އަށް އީރާނުން ކަނޑައަޅާފައި ހުންނަވާ ސަފީރު ރިޒާ ނަޖަފީ ވިދާޅުވި ގޮތުގައި، އާދިއްތަ ދުވަހު އެމެރިކާއާއި އިސްރާއީލުން ވަނީ އީރާނުގެ ނަޠަންޒް ނިއުކްލިއަރ މަރުކަޒަށްވެސް ހަމަލާދީފައެވެ.

އީރާނުގެ ވެރިރަށް ތެހެރާނުން އަލްޖަޒީރާއަށް މަޢުލޫމާތު ދިން ތައުހީދު އަސަދީ ބުނި ގޮތުގައި، އެންމެ ފަހުން ދިން މި ހަމަލާތަކުން މަސްރަޙުގެ ނުރައްކާތެރިކަން ހާމަވެއެވެ. އަދި ކަރްމަންޝާހް ސިޓީގެ ބައިނަލްއަޤުވާމީ ވައިގެ ބަނދަރު ކައިރިން ބޮޑެތި ދުމުގެ އަސަރު ފެންނަ މަންޒަރުތައް ހިމެނޭ ވީޑިއޯތައް އަލްޖަޒީރާއިން ވަނީ ކަށަވަރުކޮށްފައެވެ.

މީގެ އިތުރުން، ހޮނިހިރު ދުވަހު އިސްރާއީލުން މިނާބްގައި ހުންނަ އަންހެން ކުދިންގެ ސްކޫލަކަށް ދިން ހަމަލާގައި ޝަހީދުވި މީހުންގެ އަދަދު 180 އަށް އަރާފައިވާ ކަމަށް އީރާނުގެ ކަމާބެހޭ ފަރާތްތަކުން ވަނީ ހާމަކޮށްފައެވެ.