ޕެނަލްޓީއަކާއި ރަތް ކާޑެއްގެ ނިންމުމާ ގުޅިގެން ބޮޑެތި ބަހުސްތަކެއް އުފެދުނު މި މެޗުގައި، ފަހަތުން އަރައި 10 ކުޅުންތެރިންނާއެކު ކުޅެމުންދިޔަ ކްރިސްޓަލް ޕެލަސް ބަލިކޮށް، މެންޗެސްޓަރ ޔުނައިޓެޑުން އިނގިރޭސި ޕްރިމިއާ ލީގު ތާވަލުގެ ތިންވަނަ މަގާމަށް ކުރިއަށް ޖެހިލައިފިއެވެ.

އޯލްޑް ޓްރެފޯޑްގައި ކުޅުނު މި މެޗުގެ ހަތަރުވަނަ މިނެޓުގައި މެކްސެންސް ލަކްރޮއިސް ޖެހި ލަނޑާއެކު، ޕެލަސްއިން ޖެހިޖެހިގެން ތިންވަނަ މޮޅެއް ހޯދުމުގެ އުންމީދުގައި އޮއްވައި، މެޗުގެ އޮއިވަރު ބަދަލުވީ ދެވަނަ ހާފުގައި ލަކްރޮއިސް، ބްރެޒިލްގެ ފޯވާޑް މެތިއަސް ކޫންހާ އަށް ހުރަސްއެޅި ހިސާބުންނެވެ. ކޫންހާގެ ގައިގައި ލަކްރޮއިސް ފުރަތަމަ އަތްލީ އޭރިއާ ބޭރުން ކަމަށް ވިޔަސް، އޭނާ އޭރިއާ ތެރެއަށް ވަން އިރުވެސް ލަކްރޮއިސް ހުރީ އޭނާ ހިފަހައްޓައިގެންނެވެ.

ކޫންހާ ވެއްޓުމާ ގުޅިގެން ރެފްރީ ކްރިސް ކަވަނާ، ވީއޭއާރް ބެލުމަށްފަހު ނިންމީ ޔުނައިޓެޑަށް ޕެނަލްޓީއެއް ދިނުމަށެވެ. އަދި ލަނޑު ޖަހަން ލިބުނު ސާފު ފުރުސަތަކަށް ހުރަސްއެޅުމުން ލަކްރޮއިސްއަށް ރަތް ކާޑު ދައްކައި ދަނޑުން ފޮނުވާލިއެވެ.

މެޗުގެ 57 ވަނަ މިނެޓުގައި ބްރޫނޯ ފެނާންޑޭޒް ޕެނަލްޓީ ކާމިޔާބުކޮށް ނަތީޖާ ހަމަހަމަކޮށްދިން އިރު، އޭގެ އަށް މިނެޓު ފަހުން ބްރޫނޯ ނެގި ހުރަހަކުން ބެންޖަމިން ސެސްކޯ ބޮލުން ޖެހި ލަނޑާއެކު ޔުނައިޓެޑަށް ފުރަތަމަ ފަހަރަށް މެޗުގެ ކުރިހޯދައިދިނެވެ.

މިއީ ސްލޮވީނިއާގެ މި ފޯވާޑް ޖެހިޖެހިގެން ލަނޑު ޖެހި ތިންވަނަ މެޗެވެ. އަދި ފަހުގެ އަށް މެޗުގައި އޭނާ ވަނީ ހަތް ލަނޑު ކާމިޔާބުކޮށްފައެވެ.

ޔުނައިޓެޑްގެ ކުރީގެ ކީޕަރު ޑީން ހެންޑަސަން ވަނީ ކަސެމީރޯ އާއި ބަދަލު ކުޅުންތެރިޔާ އަމަދު ޑިއާލޯ ފޮނުވާލި ނުރައްކާތެރި ހަމަލާތަކެއް ހުށިޔާރުކަމާއެކު ދިފާއުކޮށް، ޔުނައިޓެޑްގެ ލީޑު އިތުރަށް ފުޅާވިޔަ ނުދީ ހިފަހައްޓާފައެވެ.

މި ނަތީޖާއާއެކު، މައިކަލް ކެރިކްގެ އިރުޝާދުގެ ދަށުން ޔުނައިޓެޑް ކުޅުނު ހަތް މެޗުގެ ތެރެއިން ހަ މެޗުން މޮޅުވެ، އެއް މެޗު އެއްވަރުވެފައިވާ އިރު، ލަނޑުގެ ތަފާތުން އެޓީމު ވަނީ އެސްޓަން ވިލާ ފަހަތަށް ޖައްސާލުމަށްފަހު ތާވަލުގެ ތިންވަނަ މަގާމަށް ޖެހިލާފައެވެ.