ދިވެހިރާއްޖެއަށް މަސްތުވާ ތަކެތި އެތެރެކޮށް އޭގެ ވިޔަފާރިން ހޯދާ ފައިސާ ލޯންޑާ ކުރުމުގެ ތުހުމަތުގައި ގއ. އަތޮޅުން ހައްޔަރުކުރި މީހުންގެ އެކައުންޓުތަކުގައި 300 މިލިއަނަށް ވުރެ ގިނަ ރުފިޔާ ދައުރުކުރި ކަމަށް ފުލުހުން ބުނެފިއެވެ.
ފުލުހުން ނެރުނު ނޫސްބަޔާނެއްގައި ބުނީ ހައްޔަރުކުރި ހަތަރު މީހުންނަކީ މަސްތުވާތަކެތީގެ ވިޔަފާރިކުރުމާއި މަނީ ލޯންޑަރިންގެ އަމަލުތައް ހިންގާ ނެޓްވޯކެއްގައި އިސްކޮށް ހަރަކާތްތެރިވާ ކަމަށް ތުހުމަތުކުރެވޭ މީހުން ކަމަށެވެ. އަދި މި ނެޓްވޯކުގައި އިސްކޮށް ހަރަކާތްތެރިވާ ފަރާތްތަކަށް އަމާޒުކޮށް ފުލުހުން ޚާއްސަ ތަހުގީގެއް ފަށާފައިވަނީ ނިމުނު އަހަރުގެ މާޗު މަހު ކަމަށް ވެސް ފުލުހުން ބުންޏެވެ.
މި އޮޕަރޭޝަންގައި ހައްޔަރުކޮށްފައިވާ ހަތަރު މީހުންނަކީ،
ފުލުހުންގެ ބަޔާނުގައި ބުނެފައިވާ ގޮތުގައި މިދިޔަ ފަސް އަހަރުގެ ތެރޭގައި އެ ނެޓްވޯކް މެމްބަރުންގެ ބޭންކު އެކައުންޓުތަކުގައި 300 މިލިއަނަށް ވުރެ ގިނަ ރުފިޔާ އާއި ހަތަރު ލައްކަ އަށް ވުރެ ގިނަ ޑޮލަރު ދައުރު ކޮށްފައިވާ ކަން ފާހަގަ ކުރެވިފައިވެއެވެ.
މީގެ ތެރެއިން މަދީހުގެ ބޭންކު އެކައުންޓުތަކުގައި 17 މިލިއަނަށް ވުރެ ގިނަ ރުފިޔާ ދައުރު ކޮށްފައިވެ އެވެ. ފަސް އަހަރުގެ ދުވަހުގެ މުއްދަތުގެ ތެރޭގައި އޭނާގެ އެކައުންޓަށް މުސާރައިގެ ގޮތުގައި ޖަމާވެފައިވަނީ 430،000ރ. ކަމަށް ފުލުހުން ބުންޏެވެ.
ޝައްފާޙް ލަޠީފް ގެ ބޭންކް އެކައުންޓުތަކުގައި 6 މިލިއަނަށްވުރެ ގިނަ ރުފިޔާ ދައުރު ކޮށްފައިވާއިރު އެ މުއްދަތުގައި އޭނާގެ ބޭންކް އެކައުންޓަށް މުސާރައިގެ ގޮތުގައި ޖަމާވެފައިވަނީ 371،635.36ރ ކަމަށް ފުލުހުން ބުނެފައިވެއެވެ.
މީގެ އިތުރުން އަހުމަދު އަނާމް އިބްރާހީމްގެ ބޭންކު އެކައުންޓުތަކުގައި 38 މިލިއަނަށް ވުރެ ގިނަ ރުފިޔާ ދައުރު ކޮށްފައިވީ ނަމަވެސް އެ މުއްދަތުގެ ތެރޭގައި އޭނާގެ އެކައުންޓަށް މުސާރައިގެ ގޮތުގައި ޖަމާވެފައިވަނީ 271،000ރ. ކަމަށް ފުލުހުން ބުނެއެވެ.
މި މައްސަލައިގެ ތަހުގީގަށް، ކޯޓު އަމުރެއްގެ ދަށުން މިހާތަނަށް 13 ފަރާތެއްގެ 53 ބޭންކު އެކައުންޓު ފްރީޒް ކުރެވިފައިވާ ކަމަށްވެސް ފުލުހުން ބުނެފައިވެއެވެ.
މި ނެޓްވޯކުގައި އިސްކޮށް ހަރަކާތްތެރިވާ މީހުންނަށް އަމާޒުކޮށް، ހާއްސަ ތަހުގީގެއް ފެށީ މިދިޔަ އަހަރުގެ މާޗު މަހުގައެވެ. ތަހުގީގުން ފުލުހުންނަށް އެނގިފައިވާ ގޮތުގައި އެ ނެޓްވޯކުން 2015 ވަނަ އަހަރުން ފެށިގެން ދަނީ ޑްރަގް ޓްރެފިކް ކުރަމުންނެވެ.
މި ނެޓްވޯކް އިސްވެ ހިންގާ މީހާ އާއި އަދި އޭނާގެ ދަށުން މަސްތުވާތަކެތި ވިއްކައި، ވިޔަފާރިކޮށް، މަނީލޯންޑާ ކުރުމުގައި އެކި ގޮތްގޮތުން ހަރަކާތްތެރިވާ 19 މީހަކު ފުލުހުންގެ ތަހުގީގަށް ދެނެގަނެވިފައިވާ ކަމަށާ ފުލުހުން ބުނެއެވެ.
