ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި، ސަރުކާރު ހިންގާ ޕީއެންސީގެ ފަރާތުން މައްޗަންގޮޅީ މެދު ދާއިރާއަށް ކުރިމަތިލައްވާފައިވާ ކެންޑިޑޭޓުންނަށް ތާއީދު ހޯއްދެވުމަށް ބޭއްވި ”ދޮރުން ދޮރަށް“ ހަރަކާތުގައި ރައީސް ޑރ. މުއިއްޒު ބައިވެރިވެވަޑައިގެންފިއެވެ.

ރައީސް މުޢިއްޒު މައްޗައްގޮޅީ މެދު ދާއިރާއަށް ވަޑައިގަތުމުން އަމަނިކުފާނަށް މަރުޚަބާ ދެންނެވީ އެ ދާއިރާގެ ރައްޔިތުންގެ މަޖިލީހުގެ މެންބަރު  އަހުމަދު ޟަމީރެވެ.

މި ހަރަކާތުގައި ރައީސްގެ އަރިހުގައި ސަރުކާރުގެ ބައެއް މިނިސްޓަރުންނާއި، ޕީއެންސީގެ ލީޑަޝިޕްގެ އިސް ބޭފުޅުންގެ އިތުރުން ރައްޔިތުންގެ މަޖިލިހުގައި އެ ޕާޓީ ތަމްސީލް ކުރައްވާ ބައެއް މެންބަރުން ބައިވެރިވެވަޑައިގެންނެވިއެވެ.

މީގެއިތުރުން، ލޯކަލް ކައުންސިލް އިންތިހާބުގައި ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ ކެންޑިޑޭޓު މޫސާ އަލީ ޖަލީލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސަކަށް ވާދަކުރައްވާ އައިޝާ އަލައިކާ އަދި މާލެ ސިޓީ ކައުންސިލަށާއި އަންހެނުންގެ ކޮމިޓީއަށް ވާދަކުރައްވާ ޕީއެންސީ ކެންޑިޑޭޓުން ބައިވެރިވެވަޑައިގެންނެވިއެވެ.

ޕީއެންސީން މައުލޫމާތު ދީފައިވާ ގޮތުގައި، ކުރިއަށް އޮތް ދުވަސްތަކުގައި ވެސް ރައީސުލްޖުމްހޫރިއްޔާ މާލޭގެ އެކި އަވަށްތަކުގެ ގޭގެއަށް ވަޑައިގެން، ޕާޓީގެ ކެންޑިޑޭޓުންނަށް ތާއީދު ހޯއްދެވުމުގެ މަސައްކަތްޕުޅު ކުރިއަށް ގެންދަވާނެއެވެ. މިއީ އިންތިހާބަށް ތައްޔާރުވުމުގެ ގޮތުން ޕާޓީގެ ސަފުތައް ވަރުގަދަކުރުމަށް ކުރިއަށްގެންދާ މުހިންމު ހަރަކާތެކެވެ.

ލޯކަލް ކައުންސިލް އިންތިހާބުގެ ކުރިން ކައުންސިލްގެ 28 ގޮނޑިއަކާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ 41 ގޮނޑިއެއް ޕީއެންސީއަށް ވަނީ ކަށަވަރުވެފައެވެ.

މި އިންތިހާބުގައި ޖުމްލަ 294,937 މީހުންނަށް ވޯޓުލުމުގެ ހައްގު ލިބިގެންވެއެވެ. އިންތިހާބަށް ގާތްގަނޑަކަށް 80 މިލިއަން ރުފިޔާ ހަރަދުވާނެ ކަމަށް އިލެކްޝަންސް ކޮމިޝަން (އީސީ) އިން މީގެކުރިން ވަނީ ހާމަކޮށްފައެވެ.