މާލޭ މަގެއްގެ މަތީގައި އެމްބިއުލާންސަށް ޖާގަނުދީ މުދާ ހުސްކުރަން މަޑުކޮށްގެން އޮތް ޕިކަޕުގެ ޑްރައިވަރު ޖޫރިމަނާކޮށް ލައިސަންސް ހިފަހައްޓައިފިއެވެ.

ސޯޝަލް މީޑިއާގައި އަމިއްލަ މީހަކު އާންމުކޮށްފައިވާ ވީޑިއޯއަކުން ފެންނަ ގޮތުން، ޕިކަޕުގެ ފަހަތުގައި އޮވެ އެމްބިއުލާންސުން ސައިރެން އަޅަމުން ދިޔައިރު ވެސް ޕިކަޕު ހުއްޓައިގެން އޮތީ މުދާ ބާލާށެވެ.

އެ ވީޑިއޯ ހިއްސާކުރި ފަރާތުން ބުނި ގޮތުގައި މިއަދު ހެނދުނު 10:30 ހާއިރު އެ ޕިކަޕުން މަގު ބްލޮކްކޮށްގެން ގިނައިރުތަކެއް ވަންދެން އޮތެވެ. އަދި ވީޑިއޯ އިން ފެންނަ ގޮތުގައި އެމްބިއުލާންސް އަށް ދުއްވާލާނެ ފުރުސަތު ލިބުނީ އެ މަގުގައި އެވަގުތު ތޮއްޖެހިފައި އޮތް އެހެން އުޅަނދުތަކަށް ވެސް ކުރިއަށް ދުއްވާލަން ފުރުސަތު ލިބުމުންނެވެ.

މި ވީޑިއޯ އާންމުވުމާއި ގުޅިގެން ޓްރާންސްޕޯޓް މިނިސްޓްރީން ބުނީ އެކަމުގައި ފިޔަވަޅު އަޅަން ޖެހޭ ނަމަ އެކަން ކުރާނެ ކަމަށެވެ.

ފުލުހުން ބުނީ އެމްބިއުލާންސަށް ޖާގަ ނުދީ މަގު ބްލޮކްކުރި ޕިކަޕް ޑްރައިވަރު ފުލުހަށް ހާޒިރުކޮށް 750ރ. އިން ޖޫރިމަނާކޮށް ލައިސަންސް ހިފަހައްޓާފައިވާ ކަމަށެވެ.

ފުލުހުން އެ މައްސަލަ ދެން ފޮނުވާނީ ޓްރާންސްޕޯޓް މިނިސްޓްރީއަށް ކަމަށާއި ޑްރައިވަރާ މެދު އަމަލުކުރާނެ ގޮތެއް ނިންމާނީ މިނިސްޓްރީގެ ކޮމެޓީއަކުން އެ މަސައްސަލަ ބެލުމަށް ފަހުގައި ކަމަށް ފުލުހުންގެ އިދާރާއިން ބުނެއެވެ.

މީގެ ކުރިން އައްޑޫ ސިޓީގައި އެމަޖެންސީގައި ދަތުރުކުރި އެމްބިއުލާންސަށް ޖާގަ ނުދިނުމުގެ ސަބަބުން އެކްސިޑެންޓުވެފައިވެއެވެ. އަދި ރައީސް އޮފީސް ކައިރިން އަނބުރާލަން އުޅުނު އެމްބިއުލާންސަކަށް އެ މަގުން ދުއްވަމުންދިޔަ ވެހިކަލްތައް މަގު ނުދެއްކި މައްސަލައެއް ވެސް ފެންމަތިވި އެވެ.