އިނގިރޭސިވިލާތުގެ އިދިކޮޅު ޕަޓީ، ރިފޯމް ޔޫކޭގެ ލީޑަރު ނައިޖަލް ފަރާޖް, ރާއްޖެ ވަޑައިގެން، ޗާގޯސްއަށް ދަތުރުކުރައްވަން އުޅުމުން އިނގިރޭސި ސަރުކާރުން ޕްރެޝަރުކޮށްގެން ދިވެހި ސަރުކާރުން އެ ކަމަށް ހުރަސްއެޅިކަމުގެ ބުނެ ދެއްކެވި ވާހަކަތައް ދިވެހި ސަރުކާރުން ދޮގުކޮށްފިއެވެ.

ޗާގޯސްގައި އަލުން ވަޒަންވެރިވުމަށް އެތަނަށް ކަނޑުމަގުން ދިއުމަށް މަސައްކަތްކުރާ ޗާގޯސްގެ ބަޔަކަށް ކާބޯތަކެއްޗާއި އެހެނިހެން ޒަރޫރީ ސަމާނު ފޮނުވުމަށް އެހީވުމަށް ފަރާޖް ދާދިފަހުން ރާއްޖެ އައި ދަތުރާ ގުޅޭގޮތުން ދަ ޓެލެގްރާފް ނޫހަށް އޭނާ ދެއްވި އިންޓަވިއުއެއްގައި ވިދާޅުވެފައިވަނީ ޗާގޯސްއަށް އޭނާ ދިއުން ހުއްޓުވުމަށް އިނގިރޭސި ސަރުކާރުން ރާއްޖޭގައި އެދިފައިވާ ކަމަށެވެ.

ފަރާޖްގެ ވާހަކަތަކާއި ގުޅިގެން ސަރުކާރުގެ އޮފިޝަލަކު ވިދާޅުވީ ފަރާޖްގެ ދަތުރަށް ހުރަސް އެޅުމަށް ނުވަތަ ހުއްޓުވުމަށް ދިވެހި ސަރުކާރުން އެއްވެސް މަސައްކަތެއް ކޮށްފައި ނުވާނެ ކަމަށެވެ.

ޗާގޯސްއަކީ އިނގިރޭސީންގެ ބާރުގެ ދަށުގައި އޮތް ތަނަކަށްވާއިރު، އެ ތަނަށް ބަޔަކު އަރައި ފޭބުން ހުއްޓުވުމަށް ކަމެއް ކުރާނަމަ އެ ކަމެއް ކުރާނީ އިނގިރޭސި ސަރުކާރުންކަމަށް ވެސް އޮފިޝަލް ވިދާޅުވިއެވެ.

ޗާގޯސްގެ ފަޅު ރަށެއް ކަމަށްވާ އީލް ޑު ކޮއިންގައި ދާއިމީކޮށް ވަޒަންވެރިވުމަށް މަސައްކަތް ކުރަމުންދާ ޗާގޯސްގެ ހަތަރު މީހަކަށް ބޭނުންވާ ކާބޯތަކެއްޗާއި ބޭސް ފަދަ ޒަރޫރީ ސާމާނު ފޯރުކޮށްދިނުމަށް ދަތުރު ފެށުމަށް ފަރާޖް ރާއްޖެއަށް އައީ މިދިޔަ ހަފްތާގެ ތެރޭގައެވެ.

އެ ތަކެތި ހިފައިގެން ދަތުރުކުރާ ބޯޓު ރާއްޖޭގެ ދެކުނުން ގާތްގަނޑަކަށް 300 މޭލު ބޭރުގައި އޮންނަ އެ ރަށަށް ފުރުމަށް އޮތީ ހަމަޖެހިފައެވެ. ނަމަވެސް މިހާރު އެ ދަތުރުގައި ބައިވެރިނުވުމަށް ފަރާޖް ވަނީ ނިންމާފައެވެ.

ނަވާރަސަތޭކަފަސްދޮޅަހުގެ އަހަރުތަކުގެ ފަހުކޮޅާއި 1970ގެ ކުރީކޮޅު، ޑިއޭގޯ ގާސިއާގައި އަސްކަރީ މަރުކަޒެއް ގާއިމުކުރުމަށް ޓަކައި ޗާގޯސް ޖަޒީރާތަކުން ގާތްގަނޑަކަށް 2،000 އެއްހާ މީހުން ވަނީ ބޭރުކޮށްފައެވެ.

ޗާގޯސްގެ މައްސަލަ މޮރިޝަސް އިން 2018 ވަނަ އަހަރު އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ގެންދިޔަ އެވެ. އަދި 2019 ވަނަ އަހަރުގެ އެ ކޯޓުން އިސްތިޝާރީ ލަފައެއް ނެރެފައިވަނީ ޗާގޯސްގެ ސިޔާދަތީ ބާރު އޮންނާނީ މޮރިޝަސް އަށް ކަމަށެވެ.