ބޯފެނާއި އެނޫންވެސް ލުއި ބުއިންތައް ހުސްކުރި ޕްލާސްޓިކް ފުޅިތަކުގައި ކާބޯތަކެތި ބަންދުކޮށް ދެވަނަ ފަހަރަށް ވިޔަފާރީގެ ގޮތުގައި ބޭނުން ނުކުރަން މޯލްޑިވްސް ފުޑް އެންޑް ޑްރަގް އޮތޯރިޓީ އެމްއެފްޑީއޭ އިން އަންގައިފިއެވެ.
އެމްއެފްޑީއޭއިން މިއަދު ކުރި އިއުލާނެއްގައި ބުނީ ކާބޯތަކެތީގެ ވިޔަފާރިކުރާ މީހުން، ބޯފެނާއި ލުއި ބުއިންތައް ހުސްކޮށްފައިވާ ފުޅިތަކުގައި ކާބޯތަކެތި ބަންދުކޮށް ވިޔަފާރީގައި ބޭނުންކުރަމުންދާކަން އެ އޮތޯރިޓީއަށް ފާހަގަކުރެވިފައިވާ ކަމަށެވެ.
އެމްއެފްޑީއޭގެ އިއުލާނުގައި ބުނެފައިވަނީ ފެނާއި ލުއިބުއިންތައް ބަންދުކޮށްފައި ހުންނަ ފުޅިތަކަކީ އެއްފަހަރު ބޭނުންކޮށްފައި އުކާލާގޮތަށް ތައްޔާރުކޮށްފައިވާ ފުޅިތަކެއްކަމަށެވެ.
އެގޮތުން ވަކިވައްތަރެއްގެ ޕްލާސްޓިކެއްކަމުގައިވާ ޕޮލިއެތިލީން ޓެރަތަޔަލޭޓް ނުވަތަ ޕެޓްއިން ތައްޔާރުކޮށްފައިވާ ފުޅިތަކެއްކަމަށާއި އެއްފަހަރަށްވުރެ ގިނައިން މިބާވަތުގެ ޕްލާސްޓިކް ބޭނުންކުރުމަކީ ރައްކާތެރިކަމެއް ނޫންކަމަށް އިއުލާނުގައި ބުނެފައިވެއެވެ.
ނަމަވެސް، ބާޒާރުގައި ތަފާތު ބާވަތްތަކުގެ ބުއިންތައް އޭގެ ފުޅީގައި ބަންދުކުރާކަން ފާހަގަވެފައިވާ ކަމަށް ވެސް އެމްއެފްޑީއޭއިން ބުންޏެވެ.
އެކަމުގެ ސަބަބުން، ފުޅިން ޕްލާސްޓިކްގެ އަސަރު ކާބޯތަކެއްޗަށް ފޯރައި، އިންސާނުންގެ ސިއްހަތަށް ނޭދެވޭ އަސަރުކުރުމުގެ ފުރުސަތު އޮންނާނެ ކަމަށް އެ އޮތޯރިޓީން ބުންޏެވެ.
