ފާއިތުވެދިޔަ ތިން އަހަރު ދުވަހުގެ ތެރޭގައި ރާއްޖޭގެ އެކި ހޮސްޕިޓަލްތަކާއި ސިއްޙީ ޚިދުމަތް ފޯރުކޮށްދޭ ތަންތަނުން ނަފްސާނީ ބަލިތަކަށް 70,000 އަށްވުރެ ގިނަ މީހުން ފަރުވާ ހޯދާފައިވާކަމަށް ނޭޝަނަލް މެންޓަލް ހެލްތު ޑިޕާޓްމަންޓުން ހާމަކޮށްފިއެވެ.

ދައުލަތުގެ މީޑިއާގެ ޕްރޮގްރާމެއްގައި ނޭޝަނަލް މެންޓަލް ހެލްތު ޑިޕާޓްމަންޓާ ގުޅޭ މައުލޫމާތުތައް ހިއްސާ ކުރައްވަމުން، އެ ޑިޕާޓްމަންޓުގެ ސޯޝަލް ސާވިސް ކޯޑިނޭޓަރު އައިޝަތު ޝުހުޒާ ވިދާޅުވި ގޮތުގައި، މާލެ ސަރަހައްދުގެ ހޮސްޕިޓަލްތަކާއި އަތޮޅުތެރޭގެ ރީޖަނަލް ހޮސްޕިޓަލްތަކުން ލިބިފައިވާ ހިސާބުތަކަށް ބަލާއިރު، ފާއިތުވީ ތިން އަހަރު ރާއްޖޭގެ އެކި ކަންކޮޅުތަކުން 70,000 އަށްވުރެ ގިނަ މީހުން ނަފްސާނީ މައްސަލަތަކުގައި ފަރުވާ ހޯދާފައިވާ ކަމަށެވެ.

ވޭތުވެދިޔަ 3 އަހަރުގެ ތެރޭގައި ރާއްޖޭގެ ރީޖަނަލް ހުރިހާ ހޮސްޕިޓަލްތަކާއި ގްރޭޓާ މާލޭގައި ހުރި ޕްރައިވެޓް ހޮސްޕިޓަލްތަކާއި ހުރިހާ ހޮސްޕިޓަލްތަކެއް ލައިގެން މިހާތަނަށް 70,000 އަށް ވުރެ ގިނަ މީހުން ފަރުހޯދާފައިވޭ." ޝުހުޒާ ވިދާޅުވިއެވެ.

ޝުހުޒާ ވިދާޅުވީ ރާއްޖޭގައި ނަފްސާނީ ދުޅަހެޔޮކަމުގެ ހާލަތަށް ބަލާއިރު ކޮންމެ 20 މީހަކުން އެކަކީ އަމިއްލަ ނަފްސަށް ގެއްލުން ދޭ ހިޔާލު އަންނަ ނަފްސާނީ ބަލިމަޑުކަން ތަހައްމަލުކުރަމުން އަންނަ މީހެއް ކަމަށެވެ. އަދި މިއީ ކަންބޮޑުވާ މިންވަރެއް ކަމަށާއި އެ މައްސަލަތައް ހައްލުކުރުމަށް ޖަމިއްޔާ ޖަމާއަތްތަކާއި އަމިއްލަ ފަރުދުންނާއި ގުޅިގެން ސަރުކާރުން މަސައްކަތް ކުރަމުން އަންނަ ކަމަށެވެ.

މި ޕްރޮގްރާމްގައި ވާހަކަ ދައްކަވަމުން ޞިއްޙީ ވުޒާރާގެ ނައިބު އައިމިނަތު އިސްމާއިލް ވިދާޅުވީ ރާއްޖޭގައި ނަފްސާނީ އެކި ކަންކަމުގައި ތަފްޞީލީ ދިރާސާއެއް މިހާތަނަށް ހެދިފައިނުވި ނަމަވެސް ހޮސްޕިޓަލްތަކުގެ ތަފާސްހިސާބުތަކާއި 2022 ވަނަ އަހަރު ހަދާފައިވާ ގެޕްސް ދިރާސާއިން ދައްކާގޮތުން ރާއްޖޭގައި ކޮންމެ 5 މީހަކުން އެކަކީ ޑިޕްރެޝަން އަލާމަތްތައް ފެންނަ މީހެއްކަމަށެވެ.

އައިމިނަތު އިސްމާއިލް ވިދާޅުވީ އަމިއްލަ ނަފްސަށް ގެއްލުން ދިނުމުގެޚިޔާލު ހުންނަ މީހުންވެސް ފާހަގަކުރެވޭ ކަމަށް އެދިރާސާއިން ހާމަވާ ކަމަށާއި އެގޮތުން މި އަދަދުތަކަށް ބަލާއިރު މިއީ ކަންބޮޑުވާންޖެހޭ މިންވަރެއް ކަމަށެވެ.

އައިމިނަތު އިސްމާއިލް ވިދާޅުވީ ދުނިޔޭގެ ނިސްބަތުން ބެލިކަމުގައިވީނަމަވެސް ނަފްސާނީ ޞިއްޙަތުގެ ދާއިރާއަކީ ޚިދުމަތްތެރިން މަދު ދާއިރާއެއްކަމަށާއި އެހެންކަމުން މިދާއިރާއިން މީހުން ބިނާކުރުމަށް މަސައްކަތް ކުރަމުންދާކަމަށްވެސް ނައިބު ވަޒީރު ވިދާޅުވިއެވެ.

"މިދާއިރާއަކީ ދުނިޔޭގައިވެސް އޭގެ އެކްސްޕާޓްސް ވަރަށް މަދު ދާއިރާއެއް. މިހާރު ރާއްޖެއިން ކިހިނެތްތޯ މިދާއިރާގައި ފަންނުވެރިން އިތުރުކުރެވޭނީ." އައިމިނަތު އިސްމާއިލް ވިދާޅުވިއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ނަފްސާނީ ދުޅަހެޔޮކަމަށް ހާއްސަ އިސްކަމެއް ދެއްވަމުންދާއިރު، ނަފްސާނީ ބަލިތަކުގެ ފަރުވާގެ ހުރިހާ ހަރަދެއް މިހާރު ވަނީ އާސަންދައިގެ ދަށުން ލިބޭނެ އިންތިޒާމު ހަމަޖައްސާފައެވެ.