ލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން ފުރަތަމަ ފަހަރަށް ބޭއްވި ރާއްޖެ ސުޕާ ލީގުގެ ޗެމްޕިއަންކަން ލ. މާބައިދޫއިން ހޯދައިފިއެވެ.

މުބާރާތުގެ ޗެމްޕިއަންކަން މާބައިދޫއިން ހޯދީ، ފައިނަލުގައި ލ. ގަމުގެ މައްޗަށް 2-3 ސެޓުން ކުރިހޯދައިގެންނެވެ.

މެޗުގެ ފުރަތަމަ ސެޓު ވާދަވެރި ކުޅުމަކަށްފަހު 21-25 އިން ގަމު ޓީމު ކުރި ހޯދުމުން މެޗުގެ ފޯރި އިތުރަށް ވަރުގަދަ ވެގެންދިޔައެވެ.

ޓައި ބްރޭކް ސެޓުން ނަތީޖާ ނެރެންޖެހުނު މި މެޗު ވެގެންދިޔައީ އާދަޔާ ޚިލާފު ވާދަވެރި މެޗަކަށެވެ.

މި މެޗުގައި، ގަމުން ފުރަތަމަ ސެޓު، 21-15 އިން ގެންދިޔަ އެވެ. ދެ ވަނަ ސެޓުގައި މާބައިދޫން ކުޅުން ރަނގަޅުކޮށް، 25-17 އިން ސެޓު ގެންދިޔަ ނަމަވެސް، ދެން ކުޅުނު ސެޓުގައި ގަމުން އަނެއްކާ ވެސް ކުރިހޯދައި، 20-25 އިން ސެޓު ގެންދިޔަ އެވެ. މާބައިދޫ މޮޅުވީ، ހަތަރު ވަނަ ސެޓާއި ފަސް ވަނަ ސެޓު ގެންގޮސްގެންނެވެ. އެ ޓީމުން މި ސެޓުތައް ގެންދިޔައީ، 26-24 އަދި 15-10 އިންނެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވުނީ މާބައިދޫގެ އައިމިނަތު އަރީޝާއެވެ.

އަންހެން ޑިވިޝަނުގައި އިއްޔެ ހަވީރު ކުޅުނު ތިން ވަނަ ހޮވި މެޗުން ކ. ހުރާ އިން ވަނީ 3-2 ސެޓުން، ށ، ފުނަދޫ ބަލިކޮށްފަ އެވެ. މި މެޗުގެ ސެޓުތައް ދިޔައީ، 24-26، 23-25، 25-16، 25-22 އަދި 13-15 އިންނެވެ.

މި މުބާރާތުގައި ޖުމްލަ 8 ޓީމު ބައިވެރިވެފައިވެއެވެ. މުބާރާތުގެ ޑްރީމް ޓީމުގައި ހިމެނެނީ، މާބައިދޫން އައިމިނަތު އަރީޝާ، އައިމިނަތު މާނާ ނާޒިމް އަދި ޖޫޒާން އެވެ. އަދި، ގަމުން ހައްވާ ނާޒިމާ، ހައްވާ ރާޝިދާ ހިމެނޭއިރު، ށ. ފުނަދޫގެ އައިމިނަތު ޝަހާ ޝާމިން އަދި ހުރާގެ މާސާ ފާރޫގް ވެސް ހިމެނެ އެވެ.

މުބާރާތުގެ އެންމެ މޮޅު ކޯޗަކީ މާބައިދޫގެ ކޯޗު އަހުމަދު އަދީލް (ބޭބެ) އެވެ. އެންމެ މޮޅު ކުޅުންތެރިއަކަށް އެ ޓީމުގެ ފާތިމަތު ޖޫޒާން ޒަރީރު ހޮވުނުއިރު، އުންމީދީ ކުުޅުންތެރިއަކީ، ހުރާގެ އައިޝަތު ޔުމްނު ޝާހިދު އެވެ. އަދި، އެންމެ މޮޅު ބިދޭސީ ކުޅުންތެރިއަކީ ގަމުގެ މިންކްވަން މިސް ވިޕާޑާ އެވެ.