ސަރުކާރު ހިންގާ ޕާޓީ ޕީއެންސީގެ ބުންވަރަކީ ރައީސް މުޢިއްޒުގެ މުރާލިކަން ކަމަށް، ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

އާދަމް ޝަރީފް ވިދާޅުވީ މާލޭގައި ކުރިއަށްގެންދާ ދޮރުން ދޮރަށް ހަރަކާތްތަކުގައި ރައީސް މުޢިއްޒު ބައިވެރިވެވަޑައިގެންނެވުމަކީ، އެ ޕާޓީގެ އެއްބައިވަންތަކަމާއި ރައީސްގެ މުރާލިކަން ފެނިގެންދާ ކަމެއްކަމަށެވެ.

ޕީއެންސީއަކީ އަންހެނުންގެ ހިއްސާ އޮންނަން ޖެހޭނެކަން ޤަބޫލުކޮށް، މަގުދައްކައިދީގެން އަންހެނުންނަށް ފުރުޞަތުތައް ފަހިކޮށްދޭ ޕާޓީއެއް ކަމަށް އާދަމް ޝަރީފް ވިދާޅުވިއެވެ.

އާދަމް ޝަރީފް ވިދާޅުވި ގޮތުގައި ކުރިއަށް އޮތް އިންތިޚާބުގައި ފެނިގެންދަނީ ޕީއެންސީއަށް 80 އިންސައްތަ ކާމިޔާބުވާތަނެވެ. ހެއްކެއްގެ ގޮތުގައި އޭނާ ދެއްކެވީ އިންތިޚާބަކާ ނުލައި 70 އަށް ވުރެ ގޮނޑި އެ ޕާޓީއަށް ލިބިފައިވުމެވެ.

މީގެ އިތުރުން އާދަމް ޝަރީފް ވިދާޅުވީ ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ޕީއެންސީއަށް ވޯޓުލާންޖެހޭ ސަބަބަކީ ސަރުކާރުގެ ސިޔާސަތުތައް ފަސޭހައިން ތަންފީޒުކުރުން ކަމަށެވެ.

ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ސަރުކާރު ހިންގާ ޕާޓީ ޕީއެންސީން މާލޭގެ ދާއިރާތަކަށް ކުރިމަތިލައްވާފައިވާ ކެންޑިޑޭޓުންނަށް ކެމްޕެއިން ކޮށްދެއްވަން "ދޮރުންދޮރަށް" ޕްރޮގްރާމް ރައީސް ޑރ. މުހައްމަދު މުއިއްޒު ވަނީ ފައްޓަވާފައެވެ.

އެގޮތުން ޕީއެންސީގެ ލީޑަރުގެ ހައިސިއްޔަތުން ރައީސް މުއިއްޒު ވަނީ މާފަންނު ހުޅަނގު ދާއިރާގެ ބައެއް ގެތަކަށް ޒިޔާރަތް ކުރައްވައި ގިނަ ބަޔަކާ ބައްދަލުކުރައްވާފައެވެ.

ރައީސްގެ އަރިހުގައި ބައެއް މިނިސްޓަރުންނާއި ޕީއެންސީގެ ލީޑަޝިޕްގެ ބޭފުޅުންނާއި އެ ޕާޓީގެ ޓިކެޓުގައި މާލޭގެ ދާއިރާތަކަށް ވާދަކުރައްވާ ކެންޑިޑޭޓުންނާއި ރައްޔިތުންގެ މަޖިލިހުގައި ޕީއެންސީ ތަމްސީލް ކުރައްވާ ބައެއް މެމްބަރުން ގޭގެ އަށް ވަޑައިގަތެވެ.

މީގެ އިތުރުން އެ ޕާޓީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާފައިވާ މޫސާ އަލީ ޖަލީލް ވެސް ރައީސް މުއިއްޒުގެ އަރިހުގައި ގޭގެ އަށް ވަޑައިގެން ކެމްޕެއިން ކުރެއްވި އެވެ.