ޖެހިޖެހިގެން ކުޅުނު ހަތަރު މެޗުގައި ފަސްވަނަ ލަނޑު ކާމިޔާބުކޮށް، ވިނީޝިއަސް ޖޫނިއާ އޭނާގެ ހުނަރު ދެއްކި ނަމަވެސް، އޮސަސޫނާ އަތުން 2-1 އިން ރެއާލް މެޑްރިޑް ބަލި ވެއްޖެއެވެ. މި ނަތީޖާއާއެކު، ލަލީގާ ތާވަލުގެ ކުރި ހޯދުމަށް ބާސެލޯނާއަށް ވަނީ ރަނގަޅު ފުރުސަތެއް ފަހިވެފައެވެ.
މި މެޗުން މޮޅުވެގެން ތާވަލުގެ އެއްވަނައިގައި ފަސް ޕޮއިންޓުގެ ލީޑެއް ނެގުމަށް ރެއާލްއިން އުންމީދު ކުރި ނަމަވެސް، މެޗުގެ ފުރަތަމަ ހާފުގައި އަންޓޭ ބުޑިމިއަރ ކާމިޔާބުކުރި ޕެނަލްޓީއާއި، މެޗު ނިމެން ގާތްވެފައި ވަނިކޮށް ރައުލް ގާސިއާ ޖެހި ލަނޑާއެކު، ކޯޗު އަލްވާރޯ އަރްބެލޯއާއަށް ވަނީ ލީގުގައި ހަ މެޗަށްފަހު ފުރަތަމަ ފަހަރަށް ބައްޔާ ކުރިމަތިލާން ޖެހިފައެވެ.
ޗެމްޕިއަންސް ލީގުގައި ބެންފީކާއާ ދެކޮޅަށް ކުޅުނު މެޗުގައި ނަސްލީ ތަފާތުކުރުންތަކާ ކުރިމަތިލާންޖެހުނު ކަމަށް ބުނެ ވިނީޝިއަސް ޝަކުވާކޮށްފައިވާ ދަނޑިވަޅެއްގައި، އޭނާ ވަނީ މެޗުގެ 73 ވަނަ މިނެޓުގައި ލަނޑެއް ޖަހައި ނަތީޖާ ހަމަހަމަކޮށްދީފައެވެ. ނަމަވެސް، ބްރެޒިލްގެ މި ފޯވާޑަށް މެޗުގެ ފުރަތަމަ ހާފުގައި މާ އެދެވޭ ކުޅުމެއް ނުދެއްކުނުއިރު، އެ ހާފުގައި ރެއާލްގެ ގޯލަށް އިތުރު ނުރައްކާތަކެއްވެސް ކުރިމަތިވިއެވެ.
އެގޮތުން، ބުޑިމިއަރ ފޮނުވާލި ނުރައްކާތެރި ހަމަލާއެއް ގޯލްކީޕަރު ތިބޯ ކޯޓުއާ ހުޝިޔާރުކަމާއެކު ދިފާއުކުރިއިރު، އޭގެ ކުޑައިރުކޮޅެއް ފަހުން ބުޑިމިއަރ ބޮލުން ފޮނުވާލި ހަމަލާއެއް ގޯލުގެ ދަނޑީގައި ވަނީ ޖެހިފައެވެ.
ފުރަތަމަ ހާފުގެ ފަހުކޮޅު، ބުޑިމިއަރ ޕެނަލްޓީ އޭރިއާ ތެރެއަށް ވެއްޓުމުން ރެފްރީ އަލެހަންދްރޯ ކުއިންޓޭރޯ ގޮންޒާލޭޒް އޭނާއަށް ރީނދޫ ކާޑެއް ދެއްކި ނަމަވެސް، ވީ.އޭ.އާރް ބެލުމަށްފަހު އެނގުނީ ކޯޓުއާގެ ފައި ބުޑިމިއަރގެ ފައިގައި ޖެހިފައިވާ ކަމެވެ. އެއާއެކު ރެފްރީ ޕެނަލްޓީއެއް ދޭން ނިންމިއިރު، ބުޑިމިއަރ ވަނީ ފަސޭހަކަމާއެކު އެ ޕެނަލްޓީ ގޯލުގެ ތެރެއަށް ފޮނުވާލާފައެވެ.
މެޗުގެ 64 ވަނަ މިނެޓުގައި ޓްރެންޓް އެލެގްޒެންޑަރ-އާނޯލްޑް ކުޅެން އެރުވުމާއެކު ރެއާލްގެ ކުޅުން ރަނގަޅުވެގެންދިޔައެވެ. އޭނާ ކުޅެން އެރިތާ ކުޑަވަގުތުކޮޅެއްގެ ތެރޭގައި ވިނީޝިއަސްއަށް ލަނޑު ޖަހާނެ ރަނގަޅު ފުރުސަތެއް ތަނަވަސްކޮށްދިން ނަމަވެސް، ވިނީޝިއަސް ފޮނުވާލި ހަމަލާ އޮސަސޫނާގެ ޑިފެންޑަރުން ވަނީ ހުއްޓުވާފައެވެ.
މި ބައްޔާއެކުވެސް، ބާސެލޯނާއަށްވުރެ އެއް މެޗު އިތުރަށް ކުޅެގެން ރެއާލް މެޑްރިޑް އަދިވެސް އޮތީ ދެ ޕޮއިންޓުގެ ލީޑަކާއެކު ތާވަލުގެ އެއްވަނައިގައެވެ.
