އިރާނުގެ މުޒާހަރާތަކުގައި މަރުވި މީހުންގެ އަދަދާ މެދު އެމެރިކާގެ ރައީސް ޑޮނަލްޑް ޓްރަމްޕާއި އދ. ގެ މާހިރުން ކަންބޮޑުވުން ފާޅުކުރުމުން، ހެކި ހުށަހެޅުމަށް އިރާނުން ގޮވާލައިފިއެވެ.

އިރާނުގައި މިދިޔަ މަހު ކުރި މުޒާހަރާތަކުގައި އެތައް ހާސް ބަޔަކު މަރުވި މައްސަލައިގައި، އެމެރިކާގެ ރައީސް ޑޮނަލްޑް ޓްރަމްޕާއި އިންސާނީ ހައްގުތަކާ ބެހޭ މާހިރުން ފާޑުވިދާޅުވުމުން، އެ މަރުތަކުގެ ޒިންމާ އިރާނު ސަރުކާރުންވަނީ އަލުން "ޓެރަރިސްޓުން" ގެ ބޮލުގައި އަޅުވައިފައެވެ.

އިރާނުގެ ޚާރިޖީ ވަޒީރު އައްބާސް އަރާގްޗީ ހޮނިހިރު ދުވަހު ވިދާޅުވީ، "ފަހުގެ ޓެރަރިސްޓް އޮޕަރޭޝަންތަކުގެ ޝިކާރައަކަށްވި" 3,117 މީހުންގެ ލިސްޓެއް ސަރުކާރުން އާންމުކޮށްފައިވާ ކަމަށެވެ. މީގެ ތެރޭގައި ސަލާމަތީ ބާރުތަކުގެ 200 އެއްހާ މީހުން ހިމެނޭ ކަމަށް އޭނާ ވިދާޅުވިއެވެ.

މީގެ ކުރިންވެސް، އެ ލިސްޓުގައި ހިމެނޭ 690 މީހުންނަކީ އެމެރިކާ އާއި އިސްރާއީލުން ޚަރަދުކޮށް ހަތިޔާރު ދީފައިވާ "ޓެރަރިސްޓުން" ކަމަށް ވިދާޅުވެފައިވާ އަރާގްޗީ، އެކްސްގައި ކުރެއްވި ޕޯސްޓެއްގައި ވިދާޅުވީ، ސަރުކާރުގެ ތަފާސްހިސާބުތަކާ މެދު އެއްވެސް ފަރާތަކުން ސުވާލު އުފައްދާ ނަމަ އެކަމުގެ ހެކި ހުށަހެޅުމަށެވެ.

އަރާގްޗީ މިހެން ވިދާޅުވެފައި މިވަނީ، އިރާނުގެ މުޒާހަރާތަކުގައި 32,000 މީހުން މަރުވެފައިވާ ކަމަށް އެމެރިކާގެ ރައީސް ނޫސްވެރިންނަށް މައުލޫމާތު ދެއްވިތާ މަދު ގަޑިއިރުތަކެއްގެ ތެރޭގައެވެ. ރައީސް ޓްރަމްޕް އިތުރަށް ވިދާޅުވީ، އިރާނުގެ ދީނީ ވެރިކަމުގެ ދަށުން އެ ގައުމުގެ ރައްޔިތުން އުޅެމުންދަނީ ނަރަކައެއް ފަދަ ހާލަތެއްގައި ކަމަށެވެ.

އިރާނުގެ ނިއުކްލިއަރ މަޝްރޫއާ ގުޅޭގޮތުން ވޮޝިންޓަނާއެކު "އިންސާފުވެރި" އެއްބަސްވުމަކަށް ދިއުމަށް ބާރުއެޅުމުގެ ގޮތުން، އިރާނުގެ ޚާރިޖީ ވަޒީރު ދަނީ އެމެރިކާގެ އެކި މީޑިއާތަކާ ވާހަކަދައްކަވަމުންނެވެ.

އިރާނާއި އެ ސަރަހައްދުގައި ހަނގުރާމައެއް ފެށިދާނެ ކަމުގެ ބިރު ބޮޑުވަމުންދާއިރު، ސާބިއާއިން ވަނީ އެ ގައުމުގެ ހުރިހާ ރައްޔިތުން ވަގުތުން އިރާނުން ފޭބުމަށް ހޮނިހިރު ދުވަހު ގޮވާލާފައެވެ. މިއީ މިފަދަ އިރުޝާދެއް ދިން އެންމެ ފަހުގެ ގައުމެވެ.

އެމެރިކާގައި ހުންނަ ހިއުމަން ރައިޓްސް އެކްޓިވިސްޓް ނިއުސް އެޖެންސީ އިން ބުނާ ގޮތުގައި، މުޅި ގައުމުގައި ކުރި މުޒާހަރާތަކުގައި 7,000 އަށްވުރެ ގިނަ މީހުން މަރުވިކަން އެ ފަރާތަށް ވަނީ ކަށަވަރު ކުރެވިފައެވެ. އަދި އިތުރު 12,000 އެއްހާ މަރުގެ މައްސަލަ ތަހުގީގު ކުރަމުންދާ ކަމަށްވެސް އެ ޖަމާއަތުން ބުނެއެވެ.