ކުރިއަށް އޮތް ލޯކަލް ކައުންސިލްތަކުގެ އިންތިހާބު ކާމިޔާބު ކުރަން އިދިކޮޅުން ނުކުންނަ އެމްޑީޕީއަކީ އާވިސްނުމެއް ނެތް ގައުމު ފުޑާލި ބައެއް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ސަރުކާރު ހިންގާ ޕާޓީ ޕީއެންސީގެ މާފަންނު އުތުރު ދާއިރާގެ ކެމްޕެެއިން ޖަގަހަ ހުޅުވަން ބޭއްވި ރަސްމިއްޔާތުގައި ވާހަކަ ދައްކަވަމުން ސައީދު ވިދާޅުވީ ގައުމު އަލުން ބިނާކޮށް، ގައުމު ކޮޅަށް ޖަހާނެ ކަމަށް ބުނެ އިދިކޮޅުން ނިކުންނަނީ މި ގައުމުގެ އިގުތިސާދު ފުންވަޅުގަނޑަކަށް ވައްޓާލި މީހުން ކަމަށެވެ.

ސައީދު ވިދާޅުވީ އެމްޑީޕީގެ އިސް ސަފުން އަދިވެސް ފެންނަނީ އޭރު އިގުތިސާދަށް ގެއްލުން ދިން ބޭފުޅުން ކަމަށާއި ސޮވަރިން ޑިވެލޮޕްމަންޓު ފަންޑުގައި ހުރި 200 މިލިއަން ޑޮލަރު ދެ މިލިއަން ޑޮލަރަށް ދަށްކުރީ އެންމެ ފަހުން ވެރިކަން ކުރި އެމްޑީޕީގެ ސަރުކާރުންނެވެ.

ސައީދު ވިދާޅުވީ، ރައީސް މުއިއްޒު މި ގައުމު ތަރައްގީ ކުރާނެ ގޮތުގެ ތަސައްވުރު ނުވަތަ ވައުދުތައް މީގެ ކުރިއާ ހިލާފަށް، ހުރިހާ ވައުދެއް ފޮތެއްގެ ސިފައިގައި ޕްރިންޓް ކުރައްވާފައިވާ ކަމަށާއި އެ ފޮތް ކައުންސިލްތަކަށް ފޯރުކޮށްދީފައިވާ ކަމަށެވެ.

ސައީދު ވިދާޅުވީ، އިންތިހާބެއް އަންނަނީ ރައްޔިތުންގެ ތަސައްވުރަކަށް، ރައްޔިތުން އިތުބާރު ކުރި ތަސައްވުރަކަށް އިތުރަށް އެންޑޯޒްމެންޓެއް ހޯދަން ކަމަށާއި އެއީ ޑިމޮކްރަސީގަ އެކަން އޮންނަ ގޮތް ކަމަށެވެ. އެހެން އެކަން އަންނައިރު، ވިސްނާލަން ޖެހެނީ ވޯޓު ދޭއިރު އެބޭފުޅުންނާއި ވާދަ ކުރާ ފަރާތުން، އެ އަމަލު، އެމީހުންނަށް ބާރު ލިބުނު އިރުގަ ކޮށްފަ އޮތް ގޮތަކީ ކޮބައިކަން ކަމަށް ސައީދު ވިދާޅުވިއެވެ.

ސައީދު ވިދާޅުވި ގޮތުގައި އެމްޑީޕީން ކުރާ ކަމަކީ ހަތަރެއް ނުވަތަ ފަސް ބަޔަކަށް ބެހިގެން ތިބެ 2028 ގެ ރިޔާސީ އިންތިހާބަށް އެ ޕާޓީން ނެރޭނެ ކެންޑިޑޭޓެއްގެ ވާހަކަ ދެއްކުމެވެ.

އިދިކޮޅު އެމްޑީޕީގައި އައު ވިސްނުމެއް ނެތް ކަމަށާ އިންތިޚާބަކުން އެ ޕާޓީއަށް ފުރުސަތު ދޭންޖެހޭ ސަބަބެއް ނެތް ކަމަށް ސައީދު ވިދާޅުވިއެވެ.

އެމްޑީޕީއަށް ރައްޔިތުން ފުރިހަމަ ބާރު ދިން ކަމަށާ ނަމަވެސް އެބާރު ލިބުމުން ކަންކަން ވީގޮތް ހަނދާން ނެތޭހާ ދުވަސް ނުވާ ކަމަށެވެ. އެމްޑީޕީގެ ފަސް އަހަރުގެ ވެރިކަން ނިމިގެންދިޔައިރު ދައުލަތުގެ ރިޒާވް ގައި 15 ދުވަހު ކާބޯތަކެތި ގަންނާނެ ފައިސާ ނެތް ކަމަށް ސަޢީދު ވިދާޅުވި އެވެ. އަދި ޑިމޮކްރެޓިކް ނިޒާމަށް އެ ޕާޓީން އިސްވެ ދިން ގެއްލުން ފެންނަން އެހުރީ ކަމުގައި ވިދާޅުވި އެވެ.

މިނިސްޓަރު ވިދާޅުވީ ރައީސް މުޢިއްްޒުގެ ވެރިކަމުގެ ދެ އަހަރު ނިމުނުއިރު ދައުލަތުގެ ރިޒާވްގައި 1.1 ބިލިއަން ޑޮލަރު އެބަހުރި ކަމަށެވެ. އަދި ކައުންސިލްތައް ބާރުވެރިކުރުވާ އަންހެނުންގެ ތަަރައްޤީއަށް މަސައްކަތް ކުރާ ކޮމެޓީތަކަށް ޤާނޫނީ ބާރުވެރިކަން ހޯއްދަވައިދެއްވާފައިވާ ކަމަށް ވިދާޅުވި އެވެ.