ޓެރިފްތަކާ ގުޅޭގޮތުން އެމެރިކާގެ ސުޕްރީމް ކޯޓުން ނެރުނު ހުކުމާ ގުޅިގެން އެގައުމުގެ ރައީސް ޑޮނަލްޑް ޓްރަމްޕް ފަނޑިޔާރުންނަށް ވަރަށް ބޮޑަށް ފާޑުވިދާޅުވެއްޖެއެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ދެވަނަ ދައުރުގައި ކުރިމަތިވި އެންމެ ބޮޑު އެއް ހުރަހަކީ، އެމަނިކުފާނުގެ ސަރުކާރުން ބައިނަލްއަގުވާމީ ފެންވަރުގައި ކަނޑައެޅި ޓެރިފްތައް ސުޕްރީމް ކޯޓުން ބާތިލުކުރުމެވެ. މި ނިންމުމާ ގުޅިގެން ޓްރަމްޕް ވަނީ އެ ހުކުމް ނެރުއްވި ސުޕްރީމް ކޯޓުގެ ހަ ފަނޑިޔާރުންނަށް އަމާޒުކޮށް، އާދަޔާ ހިލާފު ޒާތީ ގޮތަކަށް ވަރަށް ބޮޑަށް ފާޑުވިދާޅުވެފައެވެ.

ހުކުރު ދުވަހު ކޯޓުން ނެރުނު މި ހުކުމަކީ "ވަރަށް ބޮޑަށް މާޔޫސްވާ" ނިންމުމެއް ކަމަށް ޓްރަމްޕް ވިދާޅުވިއެވެ. އަދި އަޣުލަބިއްޔަތު ރައުޔުގައި ބައިވެރިވި ފަނޑިޔާރުންނަކީ "އިންތިހާއަށް ލަދުގަންނަން ޖެހޭނެ" ބައެއް ކަމަށާއި، "ރަނގަޅު ގޮތް ނިންމުމުގެ" ހިތްވަރު އެ ބޭފުޅުންގެ ކިބައިގައި ނެތް ކަމަށް ވިދާޅުވެ، ދައުލަތުގެ ބާރެއް ކަމުގައިވާ ޝަރުއީ ދާއިރާއަށް ޓްރަމްޕް ވަނީ ވަރުގަދަ ހަމަލާއެއް ދެއްވާފައެވެ.

ސިޔާސީ އާދަކާދަތަކަށް ބެލުމެއްނެތި، އޭނާގެ ބާރުތަކަށް ގޮންޖަހާ ފަރާތްތަކަށް އާންމުކޮށް ފާޑުވިދާޅުވާ ބޭފުޅެއްގެ ގޮތުގައި ޓްރަމްޕް މަޝްހޫރު ނަމަވެސް، މިފަހަރުގެ ފާޑުކިޔުންތަކަކީ އާދަޔާ ހިލާފު ހަރުކަށި ބަސްމަގަކުން ދެއްވި ފާޑުކިޔުންތަކެކެވެ.

ހުކުމް އިއްވިތާ މަދު ގަޑިއިރުތަކެއްގެ ތެރޭގައި ވައިޓް ހައުސްގައި ބޭއްވި ނޫސްވެރިންގެ ބައްދަލުވުމެއްގައި ޓްރަމްޕް ވިދާޅުވީ، "ކޯޓުގެ ބައެއް މެންބަރުންނާ މެދު އަޅުގަނޑު ލަދުގަނޭ. ގައުމަށް އެންމެ ރަނގަޅު ގޮތް ނިންމުމުގެ ހިތްވަރު ނެތުމުން އެ ބޭފުޅުންނާ މެދު އިންތިހާއަށް ލަދުގަނޭ،" މިފަދައިންނެވެ.

ކޯޓުގެ މި ހުކުމުގައި ބުނެފައިވަނީ، އެއްވެސް ގައުމަކާ ދެކޮޅަށް ބޮޑެތި ޓެރިފްތައް ކަނޑައެޅުމުގެ ޒާތީ ބާރެއް ރައީސުންނަށް ލިބިގެން ނުވާ ކަމަށެވެ. މި ނިންމުމާ މެދު ޓްރަމްޕް ވާހަކަ ދެއްކެވީ އެއްވެސް ފަސްޖެހުމެއް ނެތި ސީދާ އިބާރާތުންނެވެ.

ހަމައެއާއެކު، ޓްރަމްޕްގެ ޓެރިފް ކަނޑައެޅުމުގެ ބާރު ދެމެހެއްޓުމަށް ވޯޓު ދެއްވި ތިން ފަނޑިޔާރުން ކަމަށްވާ، ކްލެރެންސް ތޯމަސް، ސެމިއުލް އެލީޓޯ އަދި ބްރެޓް ކަވަނޯއަށް އޭނާ ވަނީ ވަރަށް ބޮޑަށް ތައުރީފު ކުރައްވާފައެވެ. މީގެ ތެރެއިންވެސް، އޭނާގެ ފުރަތަމަ ދައުރުގައި އައްޔަން ކުރެއްވި ފަނޑިޔާރު ކަވަނޯއަށް ޓްރަމްޕް ވަނީ ހާއްސަ ސަމާލުކަމެއް ދެއްވާފައެވެ.

އެމެރިކާގެ ރައީސް ޑޮނަލްޑް ޓްރަމްޕް އެކި ޤައުމުތަކުން އެތެރެކުރާ މުދަލުން ނެގުމަށް ކަނޑައަޅުއްވާފައިވާ ބޮޑެތި ޓެރިފްތަކަކީ ޤާނޫނީ ގޮތުން ނެގޭނެ ޓެރިފްތަކެއް ނޫން ކަމަށް އެ ޤައުމުގެ އެންމެ މަތީ ކޯޓުން ވަނީ ނިންމާފައެވެ.

އެމެރިކާގެ ސުޕްރީމް ކޯޓުގެ ނުވަ ފަނޑިޔާތުންގެ ތެރެއިން ހަ ފަނޑިޔާރުންގެ ރަޢުޔަކީ ޤައުމުތަކުން އެތެރެކުރާ މުދަލުން އެ ފަދަ ޓެރިފެއް ނެގުމަކީ ރައީސްގެ ޙައިޘިއްޔަތުން ޓްރަމްޕްއަށް ލިބިވަޑައިގަންނަވާ ބާރެއް ނޫން ކަމަށެވެ. އެ ޓެރިފްތައް ކަނޑައަޅާފައި ވަނީ އިންޓަނޭޝަަނަލް އެމަޖެންޖީ އެކޮނޮމިކް ޕަވަރސް އެކްޓް (އައިއީއީޕީއޭ)ގެ ދަށުންނެވެ. ނަމަވެސް ސުޕްރީމް ކޯޓުން ބުނީ 1977ވަނަ އަހަރުގެ މި ޤާނޫނުގެ ދަށުން ރައީސްއަކަށް އެ ގޮތަށް ޓެރިފް ކަނޑަނޭޅޭނެ ކަމަށާއި، ޓެކްސްއާއި ޓެރިފް ކަނޑައެޅޭނީ ހަމަ އެކަނި ޤާނޫނު ހަދާ މަޖިލީހަށް ކަމަށެވެ.