މިއަހަރުގެ ޓީ20 ވޯލްޑް ކަޕްގެ ގްރޫޕް ސްޓޭޖުގެ ފަހު މެޗުގައި، މުބާރާތް ބާއްވާ އެއް ގައުމު ކަމަށްވާ ސްރީލަންކާ ހަ ވިކެޓުން ބަލިކޮށް، ޒިމްބާބުވޭއިން ގްރޫޕް ބީގެ އެއްވަނަ ހޯދައިފިއެވެ. މި ކާމިޔާބީއާއެކު ޒިމްބާބުވޭއިން ވަނީ ސުޕަ އެއިޓަށް ދަތުރުކޮށްފައިވާ ވަރުގަދަ ޓީމުތަކަށް ނުރައްކާތެރި އިންޒާރެއް ދީފައެވެ.

މިދިޔަ ހަފްތާގައި އޮސްޓްރޭލިއާ ބަލިކޮށް މުޅި ދުނިޔެ ސިއްސުވާލި ޒިމްބާބުވޭ ޓީމުން، ބުރާސްފަތި ދުވަހުގެ މެޗުގައި 179 ރަންގެ އަމާޒެއް ފަހާލީ މެޗުގެ ތިން ބޯޅަ ބާކީ އޮއްވައެވެ. އެ ޓީމުގެ އޯޕަނަރ ބްރަޔަން ބެނެޓް ނުބައިނުވެ 63 ރަން ހެދިއިރު، ކެޕްޓަން ސިކަންދަރު ރަޒާ ވަނީ ހަލުވިކަމާއެކު 45 ރަން އެއްކޮށްފައެވެ.

ކޮލަމްބޯގެ އާރް. ޕްރޭމަދާސާ ސްޓޭޑިއަމްގައި ކުޅުނު މި މެޗުގެ ނަތީޖާއާއެކު، ދަނޑަށް އެއްވި ލަންކާގެ ގިނަ އަދަދެއްގެ ސަޕޯޓަރުންނަށް ވަނީ ބޮޑު މާޔޫސްކަމެއް ލިބިފައެވެ. މިއީ މި ފަހަރުގެ މުބާރާތުގައި ސްރީލަންކާ ބަލިވި ފުރަތަމަ މެޗެވެ. ނަމަވެސް، މި މެޗުގެ ކުރިންވެސް މި ދެ ޓީމަށް ވަނީ ސުޕަ އެއިޓްގެ ޖާގަ ކަށަވަރުވެފައެވެ.

ޒިމްބާބުވޭއިން ގްރޫޕް ސްޓޭޖުގައި ކުޅުނު ހަތަރު މެޗުގެ ތެރެއިން ތިން މެޗުން މޮޅުވިއިރު، އަންގާރަ ދުވަހު އަޔަލޭންޑާ ދެކޮޅަށް ކުޅެން އޮތް މެޗު ވާރޭގެ ސަބަބުން ވަނީ ކެންސަލްވެފައެވެ. މި ނަތީޖާތަކާއެކު ޒިމްބާބުވޭ ސުޕަ އެއިޓަށް ހޮވުނުއިރު، އޮސްޓްރޭލިއާ ވަނީ މުބާރާތުން ކަޓާފައެވެ.

މިދިޔަ ހޯމަ ދުވަހު އޮސްޓްރޭލިއާ ބަލިކޮށް ސުޕަ އެއިޓުން ޖާގަ ހޯދި ސްރީލަންކާ ޓީމުން މި މެޗުގައި ފުރަތަމަ ބެޓްކުރަން އަރައި، 7 ވިކެޓަށް 178 ރަން ހެދިއެވެ. ލަންކާ ޓީމުން އެންމެ ރަނގަޅަށް ކުޅުނީ 62 ރަން ހެދި އޯޕަނަރ ޕެތުމް ނިސަންކާއެވެ.

މިއަހަރުގެ ސުޕަ އެއިޓުން ޖާގަ ހޯދި ޓީމުތަކުގެ ތެރެއިން، ބައްރުގެ މުބާރާތެއް ކާމިޔާބުކޮށްގެން މި މަރުހަލާއަށް އައި ހަމައެކަނި ޓީމަކީ ޒިމްބާބުވޭއެވެ.

ސުޕަ އެއިޓްގެ ގްރޫޕް ދޭއްގައި ސްރީލަންކާ ވާދަކުރަން ޖެހޭނީ އިންގްލޭންޑް، ނިއުޒީލޭންޑް އަދި ޕާކިސްތާނާއެވެ. ޒިމްބާބުވޭ ހިމެނެނީ އިންޑިއާ، ސައުތު އެފްރިކާ އަދި ވެސްޓް އިންޑީޒްއާއެކު ގްރޫޕް އެކެއްގައެވެ. ކުރިއަށް އޮތް އާދިއްތަ ދުވަހު ސްރީލަންކާ އާއި އިންގްލޭންޑް ބައްދަލުކުރާއިރު، ހޯމަ ދުވަހު ޒިމްބާބުވޭ ނުކުންނާނީ ވެސްޓް އިންޑީޒްއާ ދެކޮޅަށެވެ.