ދިވެހިރާއްޖޭގެ އިގްތިސާދުގެ މައި އެއް ތަނބު ކަމުގައިވާ މަސްވެރިކަމުގެ ސިނާއަތަށް ދިމާވެފައިވާ ގޮންޖެހުންތައް ހައްލުކުރުމަށް ސަރުކާރުން އަންނަނީ ވަރަށް ބޮޑު އިސްކަމެއް ދީގެން ގިނަގުނަ މަސައްކަތްތަކެއް ކުރަމުންނެވެ. މިގޮތުން، މަސްވެރިންގެ އެންމެ ބޮޑު އެއް ޝަކުވާ ކަމުގައިވާ މަސް ބޭރުކުރުމާއި، މަހަށް ހަމައަގު ހޯދައިދިނުމަށް ސަރުކާރުން މިހާރު ވަނީ އަމަލީ ފިޔަވަޅުތަކެއް އަޅަން ފަށާފައެވެ.

ނިމިގެންދިޔަ 2025 ވަނަ އަހަރަކީ، މަސްވެރިކަމުގެ ދާއިރާ ކުރިއެރުވުމަށް ސަރުކާރުން މުހިންމު ނިންމެވުންތަކެއް ނިންމާ، އެ ނިންމުންތައް ތަންފީޒު ކުރަން ފެށި އުންމީދީ އަހަރެކެވެ. މިއީ މަސްވެރިންނަށް ލިބިގެންދިޔަ ވަރަށް އުފާވެރި ޚަބަރުތަކެކެވެ.

މިފްކޯއިން ކަންނެލި ގަންނަން ފެށުން

މި ސިނާއަތަށް އައި އެންމެ ބޮޑު އެއް ބަދަލަކީ، މިފްކޯއަށް ބޮޑުކަންނެލި ގަތުމަށް ވާންޖެހޭ އެންމެހާ ތައްޔާރީތައް ނިންމައި، ކަނޑުއޮތްގިރި އޮޕަރޭޝަނަށް ގެނެސް މިހާރު ކަންނެލި ގަންނަން ފަށާފައިވުމެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދުފުޅުތަކުގެ ތެރޭގައި ހިމެނޭ މުހިންމު ކަމެކެވެ. މި ސިނާއަތަށް ދިމާވެފައިވާ މައްސަލަތަކުން އަރައިގަތުމަށްޓަކައި ސަރުކާރުން ޖުމްލަ 4.5 ބިލިއަން ރުފިޔާ އިންވެސްޓް ކުރުމަށް ވަނީ ނިންމާފައެވެ.

މަސް ގަންނަ އަގުތަކަށް އައި ބަދަލު

މަސްވެރިންނަށް ލިބޭ އާމްދަނީ އިތުރުކުރުމަށްޓަކައި މަސް ގަންނަ އަގުތަކަށް ވަނީ ހެޔޮ ބަދަލުތަކެއް ގެނެސްފައެވެ. އެގޮތުން ކަޅުބިލަ މަސް ގަންނަ އަގު ވަނީ ކިލޯއަކަށް 20 ރުފިޔާ އަށް ބަދަލުކޮށްފައެވެ. މިފްކޯއަށް ބޮޑުކަންނެލި ގަންނަން ފެށުމާއެކު އަގަކީ 80 ރުފިޔާ ކަމަށާއި، 'އޭ-ގްރޭޑް' ކަންނެލި ނަމަ ކިލޯއަކަށް 100 ރުފިޔާ ދިނުމަށް ހަމަ ޖެއްސުމަކީ ސަރުކާރުގެ އަމާޒެކެވެ. މީގެ އިތުރުން، މިފްކޯއަށް އެއްކިލޯ އަށް ވުރެ ބަރު މަސް މިހާރު ގަންނަން ފަށާފައިވަނީ 16 ރުފިޔާގެ ރޭޓުންނެވެ. މިފްކޯ އިން ކުދި ކަންނެލި ގަންނަން ފެށުމަކީ ރަނގަޅު ފެށުމެއް ކަމަށް ބޮޑުކަންނެލި މަސްވެރިންގެ ޔޫނިއަން އިން ވެސް ވަނީ ފާހަގަކޮށްފައެވެ.

ފައިސާ ދޫކުރުމާއި އިތުރު ލުއިތައް

މަސްވެރިންނަށް ދިމާވާ އެންމެ ބޮޑު އެއް ތަކުލީފަކީ ކިރާ މަހަށް ވަގުތުން ފައިސާ ނުލިބުމެވެ. ނަމަވެސް، މިހާރު ސަރުކާރުން ވަނީ ކިރާ މަހަށް 48 ގަޑިއިރު ތެރޭގައި ފައިސާ ދޫކުރަން ފަށާފައެވެ. މިގޮތުން، މިއަހަރުގެ ފުރަތަމަ 9 ދުވަހުގެ ތެރޭގައި އެކަނިވެސް މަސްވެރިންނަށް 10.4 މިލިޔަން ރުފިޔާ ވަނީ ދޫކޮށްފައެވެ. މީގެ އިތުރުން، މިފްކޯ އިން މަސްވެރިންނަށް ތެޔޮ ވިއްކާ އަގު ވެސް މިހާރު ވަނީ ހެޔޮކޮށްފައެވެ. ރައީސް ޑރ. މުހައްމަދު މުއިއްޒު ވައުދުވެވަޑައިގެންނެވި ގޮތަށް 48 ގަޑިއިރުގެ ތެރޭގައި މަސްވެރިންނަށް ފައިސާ ދޫކުރަން ފެށި ފަހުން މިދިޔަ އެއް އަހަރުގެ ތެރޭގައި 900 މިލިއަނަށް ވުރެ ގިނަ ރުފިޔާ ދޫކޮށްފައިވެއެވެ.

އިމާރާތް ކުރުމާއި ޓެކްނޮލޮޖީ

މަސްވެރިކަމުގެ އިންފްރާސްޓްރަކްޗާ ވަރުގަދަކުރުމުގެ ގޮތުން، ރާއްޖޭގައި މަސް ރައްކާކުރެވޭ ކެޕޭސިޓީ ދެގުނައަށް އިތުރުކުރުމުގެ މަސައްކަތް ދަނީ ކުރެވެމުންނެވެ. އަދި މަސްވެރިންނަށް ލުއިފަސޭހަ ކޮށްދިނުމުގެ ގޮތުން، ރާއްޖޭގެ އެކި ސަރަހައްދުތަކުގައި ހުރި އައިސް ޕްލާންޓުތަކުން އައިސް ލިބެން ހުރި މިންވަރު ވަގުތުން ބަލާލެވޭނެ އޮންލައިން ޕޯޓަލްއެއް ވެސް މިހާރު ވަނީ ތައާރަފް ކުރެވިފައެވެ.

މި ހުރިހާ ފިޔަވަޅުތަކަކީ ދިވެހި މަސްވެރިކަމުގެ ސިނާއަތް އާ އުސްމިންތަކަކަށް ގެންގޮސް، މަސްވެރިންގެ އިގްތިސާދީ ފުދުންތެރިކަން އިތުރުކުރުމަށް ސަރުކާރުން އަޅާފައިވާ މުހިންމު ފިޔަވަޅުތަކެކެވެ. މި ނިމުނު 2025 ވަނަ އަހަރާއި ފެށުނު 2026 ވަނަ އަހަރަކީ، މަސްވެރިކަމުގެ ދާއިރާ ކުރިއެރުވުމަށް ސަރުކާރުން މުހިންމު ނިންމެވުންތަކެއް ނިންމާ، އެ ނިންމެވުންތަކުގެ ފޮނި މީރުކަން މަސްވެރިންނަށް ލިބެން ފެށި އުންމީދީ އަހަރެކެވެ. މި ބަދަލުތަކާއެކު ދިވެހި މަސްވެރިކަން އައު އުސްމިންތަކަކަށް ވާސިލުވާނެކަމީ ޝައްކެއް އޮތް ކަމެއް ނޫނެވެ.