ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބާ ގުޅިގެން ވެރިކަންކުރާ ޕީއެންސީއަށް ތާއީދު ހޯދުމަށް ކުރިއަށް ގެންދާ ދޮރުން ދޮރަށް ކެމްޕޭނަށް ރައީސް ޑރ. މުހައްމަދު މުއިއްޒު ނުކުންނަވައިފިއެވެ.

ޕީއެންސީގެ ލީޑަރުގެ ހައިސިއްޔަތުން ރައީސް މުއިއްޒު މިއަދު މެންދުރު ވަނީ މާފަންނު ހުޅަނގު ދާއިރާގެ ބައެއް ގެތަކަށް ޒިޔާރަތް ކުރައްވައި ގިނަ ބަޔަކާ ބައްދަލުކުރައްވާފައި ކަމަށް އެ ޕާޓީން ބުންޏެވެ.

ރައީސް ޑރ. މުއިއްޒުގެ އަރިހުގައި ޑޯޓުޑޯ ހަރަކާތުގައި ދައުލަތުގެ ވަޒީރުންނާއި ޕީއެންސީގެ ލީޑަޝިޕްގެ ބޭފުޅުން ބައިވެރިވަޑައިގެންނެވިއެވެ. ޑޯޓުޑޯ ހަރަކާތުގައި ރައްޔިތުންގެ މަޖިލިހުގެ ވަރަށް ގިނަ މެމްބަރުން ވެސް ބައިވެރިވެވަޑައިގެންނެވިއެވެ.

މީގެ އިތުރުން އެ ޕާޓީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާފައިވާ މޫސާ އަލީ ޖަލީލް ވެސް ރައީސް މުއިއްޒުގެ އަރިހުގައި ގޭގެ އަށް ވަޑައިގެން ކެމްޕެއިން ކުރެއްވި އެވެ. 

ޕީއެންސީގެ ލީޑަޝިޕުން ބުނީ، ކުރިއަށް އޮތް ދުވަސްތަކުގައި ވެސް ރައީސް މާލޭގެ އެކި އަވަށްތަކުގެ ގޭގެ އަށް ވަޑައިގެން އެ ޕާޓީގެ ކެންޑިޑޭޓުންނަށް ތާއީދު ހޯއްދަވަން މަސައްކަތްޕުޅު ކުރައްވާނެ ކަމަށެވެ. 

އަންނަ އޭޕްރީލް 4 ގައި އޮންނަ ކައުންސިލް އިންތިހާބުގެ ކެމްޕެއިން ފޯރި ވަރަށް ބޮޑަށް ގަދަވެފައިވާ އިރު، އެންމެ ބޮޑު ވާދަވެރިކަމެއް އޮތް ކަމަށް ފެންނަނީ ޕީއެންސީ އާއި އިދިކޮޅު އެމްޑީޕީއާ ދެމެދުގައެވެ. 

ލޯކަލް ކައުންސިލް އިންތިހާބުގެ ކުރިން ކައުންސިލްގެ 28 ގޮނޑިއަކާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ 41 ގޮނޑިއެއް ޕީއެންސީއަށް ވަނީ ކަށަވަރުވެފައެވެ. މިއާއެކު، އިންތިހާބަކާ ނުލައި ޕީއެންސީއަށް ލިބުނު ގޮނޑިތަކުގެ އަދަދު 69 އަށް ވަނީ އަރައިފައެވެ. ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ ހިމަނައިގެން އެމްޑީޕީއަށް ލިބިފައިވަނީ އެންމެ ހަ ގޮނޑިއެވެ.

އަންނަ އޭޕްރީލް ހަތަރު ވަނަ ދުވަހު ބާއްވާ ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބުގައި ޕީއެންސީގެ ކެމްޕެއިން މެނޭޖަރު އިބްރާހިމް ފަލާހު ވިދާޅުވެފައި ވަނީ އެ ޕާޓީން މަދުވެގެން 800 ގޮނޑި ކާމިޔާބު ކުރާނެ ކަމަށެވެ.