އިނގިރޭސިވިލާތުގެ ކުރީގެ ޝާހީ މެންބަރު ޕްރިންސް އެންޑްރޫ، ދައުލަތުގެ މަގާމެއްގައި ހުންނަވައި ނޭދެވޭ އަމަލުތަކެއް ހިންގެވިކަމުގެ ތުހުމަތުގައި ހައްޔަރުކޮށްފިއެވެ.

ތޭމްސް ވެލީ ފުލުހުން ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ، ހިނގަމުންދާ ތަހުގީގުގެ ތެރެއިން، ނޯފޯކް ސަރަހައްދަށް ނިސްބަތްވާ އުމުރުން 60 އަހަރުގެ ފިރިހެނަކު މިއަދު (19 ފެބްރުއަރީގައި) ހައްޔަރުކޮށްފައިވާ ކަމަށެވެ. އަދި މި މައްސަލައާ ގުޅިގެން ބާކްޝަޔަރ އާއި ނޯފޯކްގެ ބައެއް ތަންތަން ބަލައި ފާސްކުރަމުންދާ ކަމަށާއި، ހައްޔަރުކުރެވުނު މީހާ މިވަގުތު ހުރީ ފުލުހުންގެ ބެލުމުގެ ދަށުގައި ކަމަށްވެސް އެ ބަޔާނުގައިވެއެވެ.

އެންޑްރޫ ހައްޔަރުކުރުމާ ގުޅިގެން ރަސްގެފާނު ޗާލްސް ވިދާޅުވީ، އެމަނިކުފާނުގެ ކޮއްކޯފުޅާ ގުޅޭގޮތުން ކުރިއަށްދާ ތަހުގީގުގައި ގާނޫނީ އިޖުރާއަތްތައް އޭގެ އެންމެ ފުރިހަމަ ގޮތުގައި ހިނގަންވާނެ ކަމަށެވެ.

ފުލުހުން އެންޑްރޫގެ މައްސަލަ ބަލަން ފަށާފައިވަނީ، އެމެރިކާގެ ކަމާބެހޭ ފަރާތްތަކުން އާންމުކުރި، އަގުވެއްޓިފައިވާ ފައިނޭންޝިއަރ ޖެފްރީ އެޕްސްޓީންއާ ގުޅޭ 3 މިލިއަނަށްވުރެ ގިނަ ޞަފުޙާގެ ލިޔެކިޔުންތަކުން ފެންމަތިވި ސީރިއަސް ތުހުމަތުތަކަކާ ގުޅިގެންނެވެ.

އެ ލިޔުންތަކުން ހާމަވާ ގޮތުގައި، އިނގިރޭސިވިލާތުގެ ވިޔަފާރި މަންދޫބެއްގެ ގޮތުގައި އެންޑްރޫ ކުރެއްވި ރަސްމީ ދަތުރުފުޅުތަކުގައި ވިއެޓްނާމާއި ސިންގަޕޫރު ފަދަ ގައުމުތަކާ ގުޅޭގޮތުން ތައްޔާރުކޮށްފައިވާ ރިޕޯޓްތައް، 2010 ވަނަ އަހަރު އޭނާ ވަނީ އެޕްސްޓީންއާ ހިއްސާކުރައްވާފައެވެ.

މީގެ އިތުރުން، އަފްޣާނިސްތާނުގެ ހެލްމަންޑް ޕްރޮވިންސްގައި ހުރި އިންވެސްޓްމަންޓް ފުރުސަތުތަކާ ގުޅޭގޮތުން އެޕްސްޓީންގެ ލަފަޔަކަށް އެދިވަޑައިގެން ފޮނުއްވާފައިވާ ސިއްރު މެމޯއެއްވެސް އެ ފައިލްތަކުގެ ތެރޭގައި ހިމެނެއެވެ.

އެސިސްޓަންޓް ޗީފް ކޮންސްޓަބަލް އޮލިވަރ ރައިޓް ވިދާޅުވީ، މި މައްސަލައިގައި ކުރެވޭ ތުހުމަތުތަކަށް ބެލުމަށްފަހު، ދައުލަތުގެ މަގާމެއްގައި ހުންނަވައި ނޭދެވޭ އަމަލުތަކެއް ހިންގެވިކަމުގެ މައްސަލަ މިހާރު ރަސްމީކޮށް ތަހުގީގު ކުރަން ފަށާފައިވާ ކަމަށެވެ.

އެންޑްރޫ ހައްޔަރުކޮށްފައި މިވަނީ، އޭނާއާ ގުޅޭގޮތުން ފުލުހުން ހިންގާ އެއްވެސް ތަހުގީގަކަށް ޝާހީ އާއިލާއިން ފުރިހަމައަށް އެއްބާރުލުން ދޭނެކަމަށް މިދިޔަ ހަފުތާގައި ވައުދުވެފައި ވަނިކޮށެވެ.