ސަރުކާރުން ކުރިއަށް ގެންދާ އާއިލީ ބޯހިޔާވަހިކަމުގެ މަޝްރޫޢު "ބޯހިޔާވަހިކަން އެންމެންނަށް" ގެ ދަށުން ފްލެޓަށް ކުރިމަތިލާން ހުޅުވާލާފައިވާއިރު، އޭގައި ހިމެނޭ ހިޔާ ވެށިފަހި ކެޓަގަރީ އަށް ހުށަހެޅުމުގައި އިމާރާތް ކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ލުޔެއް ދީފި އެވެ.

އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ބުނީ ހިޔާ ނުވަތަ ވެށިފަހި މަޝްރޫޢުއިން ފްލެޓް ލިބޭނެ ކަމުގެ ލިޔުން ލިބި، ފުލެޓް ނުލިބޭ ފަރާތްތަކަށް ޚާއްޞަ ކެޓަގަރީއަށް އެޕްލައި ކުރުމުގައި، ފުލެޓު ލިބޭނެ ކަމުގެ ލިޔުން ނެތްނަމަ، ފުލެޓް ލިބޭނެކަން ސާބިތުކޮށްދޭ އެހެން ލިޔުމެއް ހުށަހެޅިދާނެ ކަމަށެވެ.

މިނިސްޓްރީން ބުނި ގޮތުގައި ކަމާގުޅޭ އިދާރާއަކުން އާންމުކޮށްފައިވާ ލިސްޓަކުން ނުވަތަ ދޫކޮށްފައިވާ އެހެން ލިޔުމަކުން އެ މީހަކަށް ފްލެޓު ލިބޭނެކަން ކަށަވަރުވާ ނަމަ އެފަދަ މައުލޫމާތެއް ނުވަތަ ލިޔުމެއް ހުށަހެޅިދާނެ އެވެ.

ހިޔާ މަޝްރޫޢަކީ، 2017ވަނަ އަހަރު އޭރުގެ ސަރުކާރުން ކުރިއަށް ގެންދިޔަ މަޝްރޫޢެކެވެ. އަދި ވެށިފަހި މާލެ މަޝްރޫޢަކީ 2010ވަނަ އަހަރު، މާލޭގެ ރަށްވެހިންނަށް ޚާއްޞަކޮށް ކުރިއަށް ގެންދިޔަ މަޝްރޫޢެކެވެ.

ފްލެޓު ދޫކުރުމުގެ އުސޫލުގައިވާ ގޮތުން މާލެ ސަރަހައްދުން 7،900 ފްލެޓު ދޫކުރާނެ އެވެ. އޭގެ ތެރެއިން ހާއްސަ ކެޓަގަރީތަކަށް 2،400 ފްލެޓު ކަނޑައަޅާފައިވާއިރު އޭގައި ވަނީ ވެށިފަހި މާލެ އާއި ހިޔާ މަޝްރޫއުން ފްލެޓް ލިބޭނެ ކަމުގެ ލިޔުުން ލިބި، އެ ލިޔުމާ އެއްގޮތަށް ފްލެޓް ހަވާލުކޮށްފައި ނުވާ މީހުންނަށް 500 ފްލެޓެވެ.

ސަރުކާރުގެ "ބޯހިޔާވަހިކަން އެންމެންނަށް" މި ސިޔާސަތުގައި ފްލެޓަށް ހުޅުވާލިއިރު، ވެށިފަހި މާލެއާއި ހިޔާ މަޝްރޫޢުއިން ފުލެޓް ލިބޭނެކަމުގެ ލިޔުން ލިބި، އެ ލިޔުމާ އެއްގޮތަށް ފުލެޓް ޙަވާލުކޮށްފައިނުވާ ފަރާތްތަކުގެ ކެޓަގަރީ ވަނީ ހިމަނާފައެވެ. މި ކެޓަގަރީއިން 500 ފްލެޓް ދިނުމަށް ވަނީ ކަނޑައަޅާފައެވެ.