އެމްޑީޕީގެ ލީޑަރޝިޕް ފެއިލްވެ، ޕާޓީ ބޮންސުންލާފައި އޮތުމުން ލީޑަރޝިޕްގެ ބޭފުޅުން ދައްކާ ވާހަކަ އާންމު މެންބަރުން މިހާރު ގަބޫލު ނުކުރާ ކަމަށް ނައިބު ހުސައިން މުހައްމަދު ލަތީފް ވިދާޅުވެއްޖެއެވެ.
ލޯކަލް ކައުންސިލް އިންތިޚާބުގައި ޕީއެންސީގެ ޓިކެޓުގައި މާފަންނު ދާއިރާތަކަށް ކުރިމަތިލައްވާ ކެންޑިޑޭޓުންގެ ކެމްޕޭން ހަރަކާތެއްގައި ވާހަކަފުޅު ދައްކަވަމުން ނައިބު ރައީސް ވިދާޅުވީ، ރައީސް އަބްދުﷲ ޔާމީންގެ ވެރިކަމުގައި ރާއްޖެއަށް ފައިދާހުރި ބޮޑު މަޝްރޫއެއް ގެންނަން މަސައްކަތް ކުރިއިރު، އެ މަޝްރޫއު ހުއްޓުވަން އެމްޑީޕީން ގައުމީ އަދި ބައިނަލް އަގުވާމީ ފެންވަރުގައި ބޮޑެތި އެންޓި ކެމްޕޭންތައް ހިންގި ކަމަށެވެ.
ނައިބުރައީސް ވިދާޅުވި ގޮތުގައި އެމްޑީޕީން އެގޮތަށް ކަންކުރުމުގެ ސަބަބުން ރާއްޖެ ތަރައްގީގައި ފަހަތަށް ޖެހި، ވާދަވެރި ގައުމުތައް ކުރިއަރައިގެން ދިޔަ އިރު، ދިވެހި ރައްޔިތުންނަށް އެކަމުން ލިބުނު އެއްވެސް ފައިދާއެއް ނެތެވެ.
އެމްޑީޕީގެ ލީޑާޝިޕްގެ ނިންމުންތައް ގޯސް ކަމަށާއި މިއަދުވެސް ލާމަރުކަޒީ ނިޒާމުގެ ވާހަކަ އެމްޑީޕީގެ ލީޑާޝިޕުން އެ ދައްކަނީ ހަމަޖެހޭ އުސޫލަކުން ނޫންކަން ފާހަގަ ކުރައްވާ ނައިބުރައީސް ވިދާޅުވީ އެމްޑީޕީގައި މިހާރު އޮތީ ފެއިލްވެފައިވާ ލީޑަޝިޕަކަށްވާތީ، އެމީހުން ދައްކަވާ ވާހަކަތައް އެ ޕާޓީގެ އާންމު މެންބަރުން ވެސް މިހާރު ގަބޫލުނުކުރާ ކަމަށެވެ.
"އެމްޑީޕީ ލީޑްޝިޕް ފެއިލްވެފަވާކަން އެޕާޓީގެ އާންމު މެންބަރުން ވެސް ގަބޫލުކުރޭ. ގައުމު ބައްޓަން ކުރުމުގެ އެބޭފުޅުން ވިސްނުން އިސްކުރަނީ އަބަދުވެސް އެބޭފުޅުންގެ އަމިއްލަ މަސްލަހަތުގައި ހުރި ކަންކަން ތަންފީޒުކުރުމަށޭ. ނައިބުރައީސް ވިދާޅުވިއެވެ.
މީގެ އިތުރުން ނައިބުރައީސް ވިދާޅުވީ އެމްޑީޕީގެ އިސް ބޭފުޅުން ބޭނުންވަނީ ރައްޔިތުންނަށް ހެޔޮކަމެއް ކޮށްދޭ ވެރިއަކު ހުންނަވާ މަންޒަރު ބަލަން ނޫން ކަމަށާއި، މިއީ ޕީއެންސީ އާއި އެމްޑީޕީގެ ފިކުރުގައި ހުރި އެންމެ ބޮޑު ތަފާތު ކަމަށެވެ.
ޕީއެންސީގެ ފަރާތުން ކުރަނީ އިހުލާސްތެރި މަސައްކަތް ތަކަކަށްވާތީ އޭގެ ނަތީޖާ ޕީއެންސީއަށް ފޮނިވާނެ ކަމަށާއި އެޕާޓީގެ ކެންޑިޑޭޓުންގެ ފަރާތުން ރައްޔިތުންނަށް ފެންނާނީ އިހުލާސްތެރި މަސައްކަތުގެ ހެޔޮ ނަތީޖާ ކަމަށް ނައިބު ރައީސް ވިދާޅުވިއެވެ.
