ކުރިއަށް އޮތް ފަސް ދުވަހަކީ ރާއްޖެ ސަރަހައްދަށް ވަރަށް ބޮޑަށް ވައި ނުސާފުވެ ދުންފުހުގެ އަސަރު ވަރަށް ބޮޑަށް ކުރާނެ ދުވަސްތަކަކަށް ވާތީ ސަމާލުވުމަށް މެޓް އޮފީހުން އެދިއްޖެ އެވެ.

މެޓުން ބުނީ ދުންފުހުގެ އަސަރު މިއަދު މުޅި ރާއްޖެ އަށް، ހާއްސަކޮށް މެދުރާއްޖެތެރޭގެ ހިސާބުތަކަށް ކުރަމުންދާ ކަމަށެވެ. ދުރު ފެންނަ މިންވަރު މޫސުމާ ބެހޭ ރިޕޯޓުތަކުގައި ތިން ކިލޯމީޓަރަށް ވުރެ ދަށުން ރިޕޯޓް ކުރަމުންދާ ކަމަށް ވެސް މެޓުން ބުންޏެވެ.

އެންމެ ބޮޑަށް މިއަދު ދުންފުހުގެ އަސަރުކުރަނީ އުތުރާއި މެދުރާއްޖެތެރޭގެ ހިސާބުތަކަށެވެ. އެ ގޮތުން، މޫސުމާ ބެހޭ ރިޕޯޓުތަކުގައި ވާގޮތުން ދުރުފެންނަ މިންވަރު ތިން ކިލޯމީޓަރަށް ވުރެ ރިޕޯޓުކުރަމުންދާ ކަމަށް މެޓް އޮފީހުން ބުންޏެވެ.

ރާއްޖޭގެ ވައި ކޮލިޓީ މިވަގުތު ހުރީ 105 އަށްވުރެ މަތީގަ އެވެ. މިއީ އާންމު ސިއްހަތަށް ނުރައްކާތެރި ވަރެކެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވެސް ވަނީ އާންމު ސިއްހަތަށް ގެއްލުންވާ މިންވަރަށް ރާއްޖެ ސަރަހައްދުގެ ވައި ނުސާފުވުމާ ގުޅިގެން އެކަމަށް ސަމާލުވުމަށް މީގެކުރިން ވެސް އެދިފަ އެވެ.

ވައި ނުސާފުވުމުން ރައްކާތެރިކަމުގެ ފިޔަވަޅުތައް އަޅަން ސިއްހީ އިދާރާތަކުން އަބަދު ވެސް އިލްތިމާސްކުރެއެވެ. އެ ގޮތުން، ނުރައްކާތެރި ވަރަކަށް ވައި ނުސާފުވުމުން ނާޒުކު ހާލަތުގައިވާ މީހުންނާއި އެހެން މީހުންނަށް ވެސް ނޭވާލާ ނިޒާމުގެ މައްސަލަ ޖެހުމުގެ ފުރުސަތު ބޮޑު ކަމަށް އެޗްޕީއޭއިން ބުނެއެވެ.