1967 ވަނަ އަހަރަށްފަހު ފުރަތަމަ ފަހަރަށް، ހިފާފައިވާ ހުޅަނގު އައްސޭރީގެ ބިންތައް ރަޖިސްޓްރީ ކުރުމުގެ މަސައްކަތް އަލުން ފެށުމަށް އިސްރާއީލުން ނިންމި ނިންމުމަކީ، ބައިނަލްއަގުވާމީ ގާނޫނުތަކާ ހިލާފަށް ފަލަސްތީނު މީހުންގެ ބިންތައް އަތުލައި، އެމީހުން ގެދޮރުން ބޭރުކުރުމަށް މަގުފަހިވާނެ ކަމެއް ކަމަށް އިސްރާއީލުގެ އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނެފިއެވެ.

ގާތްގަނޑަކަށް ފަސްދޮޅަސް އަހަރަށްފަހު ބިންތައް ރަޖިސްޓްރީ ކުރުމުގެ މި ނިޒާމު އަލުން އިއާދަކޮށްފައިވަނީ، ހަރުކަށި ފިކުރުގެ ފިނޭންސް މިނިސްޓަރު ބެޒަލްއެލް ސްމޮޓްރިޗް، ޖަސްޓިސް މިނިސްޓަރު ޔާރިވް ލެވިން އަދި ޑިފެންސް މިނިސްޓަރު އިސްރާއީލް ކަޓްޒް ހުށަހެޅުއްވި ހުށަހެޅުމަކަށް މިދިޔަ އާދީއްތަ ދުވަހު އެ ގައުމުގެ ސަރުކާރުން ހުއްދަ ދިނުމާ ގުޅިގެންނެވެ.

އަސްކަރީ އަމުރުތައް މެދުވެރިކޮށް އިސްރާއީލުން ފަލަސްތީނުގެ ބިންތައް ފޭރުން މިހާރުވެސް އިތުރުވެފައިވާއިރު، 2025 ވަނަ އަހަރު މި އަމަލުތައް ވަނީ ރެކޯޑް މިންވަރަކަށް މައްޗަށް ގޮސްފައެވެ. ނަމަވެސް، މި އާ ފިޔަވަޅާއެކު "ފަލަސްތީނުގެ ބިންތައް ފޭރިގަތުން ނިޒާމީކޮށް، އިސްރާއީލުގެ އާބާދީތައް ފުޅާކުރުމަށާއި އެޕާތައިޑް (ނަސްލީ ތަފާތުކުރުމުގެ) ނިޒާމު ވަރުގަދަކުރުމަށް" ގާނޫނީ މަގެއް ކޮށިގެންދާނެ ކަމަށް، ބިމާއި ބޯހިޔާވަހިކަމުގެ ހައްގުތަކަށް މަސައްކަތްކުރާ އިސްރާއީލުގެ ޖަމާއަތެއް ކަމަށްވާ 'ބިމްކޮމް' އިން ނެރުނު ބަޔާނެއްގައި ބުނެފައިވެއެވެ.

1968 ވަނަ އަހަރު، އިސްރާއީލުގެ އިސްތިއުމާރީ ބާރުތަކުން ވަނީ ޣައްޒާ އާއި ހުޅަނގު އައްސޭރީގެ ބިންތައް ރަޖިސްޓްރީ ކުރުމުގެ ގިނަ މަރުހަލާތަކެއް ހުއްޓުވާފައެވެ. މީގެ ސަބަބުން ފަލަސްތީނު މީހުންނަށް އާއިލީ ތަރިކައިގެ ގޮތުގައި ލިބޭ ބިންތަކުގެ މިލްކުވެރިކަން ސާބިތުކޮށްދިނުމަށް ވަރަށް ބޮޑެތި ދަތިތަކަކާ ކުރިމަތިވިއެވެ.

އިސްރާއީލުން އާބާދީތައް ހެދުމާ ދެކޮޅަށް މަސައްކަތްކުރާ 'ޕީސް ނައު' ޖަމާއަތުން ބުނި ގޮތުގައި، އަލުން ފެށި މި ބިން ރަޖިސްޓްރީ ކުރުމުގެ މަސައްކަތަކީ ފަލަސްތީނުގެ ބިންތައް ފުރިހަމައަށް އިސްރާއީލުގެ ދަށަށް ގެނައުމަށް (ފުލް އެނެކްސޭޝަން) ހިންގާ އިސްތިއުމާރީ އަމަލެކެވެ.