ޓީ20 ވޯލްޑް ކަޕްގެ ގްރޫޕް އޭގައި ކުޅުނު ފޯރިގަދަ މެޗުން، އެންމެ ފަހުގެ ޗެމްޕިއަން އިންޑިއާއިން 61 ރަނުން ޕާކިސްތާން ބަލިކޮށް، މުބާރާތުގެ ގަދަ އަށަކުން ޖާގަ ކަށަވަރުކޮށްފިއެވެ.

އާރް. ޕްރޭމަދާސާ ސްޓޭޑިއަމްގައި އާދީއްތަ ދުވަހު ކުޅުނު މި މެޗުގައި އިޝާން ކިޝަން ހަލުވިކަމާއެކު ހެދި 77 ރަނާއެކު އިންޑިއާއިން ވަނީ 7 ވިކެޓަށް 175 ރަން ހަދާފައެވެ. ކިޝަން ނުބައިވުމާ ހަމައަށް އިންޑިއާގެ ދުވެލި ބާރުކޮށް އޮތް ނަމަވެސް، ޕާކިސްތާނުގެ ސްޕިން ބޯލަރުން ވަނީ އިންޑިއާގެ ރަން ރޭޓް ވަކިވަރެއްގައި ހިފަހައްޓާފައެވެ.

ޖަވާބުގައި ކުޅެން އެރި ޕާކިސްތާނުގެ ހުރިހާ ކުޅުންތެރިން 18 ވަނަ އޯވަރުގެ ތެރޭގައި 114 ރަނަށް ނުބައިކޮށް، މުބާރާތް ބާއްވާ އެއް ގައުމު ކަމަށްވާ އިންޑިއާއިން ވަނީ ޖެހިޖެހިގެން ތިންވަނަ މޮޅު ހޯދާފައެވެ.

މި މެޗު ކުރިއަށް ގޮސްފައިވަނީ، ސަލާމަތީ ސަބަބުތަކަށްޓަކައި ބަންގްލަދޭޝް ޓީމު އިންޑިއާއަށް ދަތުރުކުރުމަށް އިންކާރު ކުރުމާ ގުޅިގެން، އެގައުމާ އެކީގައި ސޮލިޑަރިޓީ ފާޅުކުރުމުގެ ގޮތުން މެޗު ބޮއިކޮޓް ކުރަން ޕާކިސްތާނުން ކުރިން ނިންމި ނިންމުން ބަދަލުކުރުމަށްފަހުއެވެ. ބަންގްލަދޭޝްގެ ބަދަލުގައި މި މުބާރާތުގައި ކުޅެމުންދަނީ ސްކޮޓްލޭންޑެވެ. ނަމަވެސް، މެޗުގެ ގުރުއަތުލުމުގެ (ޓޮސް) ވަގުތުގައި ޕާކިސްތާނުގެ ކެޕްޓަން ސަލްމާން އަލީ އާގާ އާއި އިންޑިއާގެ ކެޕްޓަން ސޫރިޔާކުމާރު ޔާދަވް ސަލާމްކޮށްފައެއް ނުވެއެވެ.

ބަނޑުގެ ބައްޔެއްގެ ސަބަބުން ފުރަތަމަ ދެ މެޗުގައި ނުކުޅެވުނު އަބީޝެކް ޝަރުމާ މި މެޗުގައި ކުޅުނު ނަމަވެސް، އޭނާއަށް މާ އެދެވޭ ކުޅުމެއް ނުދެއްކުނެވެ. ޕާކިސްތާނުގެ ކެޕްޓަން ސަލްމާން އަމިއްލައަށް އޯވަރު ފަށައިގެން ގެނައި ބަދަލާއެކު، ޓީ20 ރޭންކިންގެ އެއްވަނައިގައި އޮތް އަބީޝެކް ވަނީ އެލް.ބީ.ޑަބްލިއު ވެގެން ނުބައިވެފައެވެ.

ޕާކިސްތާނުން ވަނީ ފުރަތަމަ ހަ އޯވަރުގެ ތެރޭގައި އިންޑިއާގެ ރަން ހެދުމުގެ ދުވެލި މަޑުކުރުމަށް ތިން ސްޕިން ބޯލަރުން ބޭނުންކޮށްފައެވެ. ހަ އޯވަރު ނިމުނުއިރު އިންޑިއާއަށް ހެދުނީ 52 ރަން ކަމަށްވުމުން، ޕާކިސްތާނުގެ އެ ރޭވުން ކޮންމެވެސް ވަރަކަށް ކާމިޔާބުވިކަން ފާހަގަކުރެވެއެވެ.