އިއްޔެ ރާއްޖެ އައި 11،000 އަށްވުރެ ގިނަ ފަތުރުވެރިންނާއެކު އަނެއްކާވެސް އެއް ދުވަސް ތެރޭގައި އެންމެ ގިނަ ފަތުރުވެރިން އައުމުގެ ރެކޯޑް ހަދައިފިއެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން ހޮނިހިރު ދުވަހު ރާއްޖެއަށް ވަނީ 11,136 ފަތުރުވެރިން ޒިޔާރަތްކޮށްފައެވެ.

ފަތުރުވެރިކަމާ ބެހޭ ވުޒާރާއިން އެންމެ ފަހުން ނެރެފައިވާ ޑެއިލީ އަޕްޑޭޓު ރިޕޯޓުގައިވާގޮތުން އަހަރުގެ މިހާތަނަށް ރާއްޖެއަށް ވަނީ 349,990 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި 325,277 ފަތުރުވެރިންނާއަޅާ ބަލާއިރު %7 އިތުރު އަދަދެކެވެ. ތަފާސްހިސާބުތައް ދައްކާގޮތުން ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 8,943 ފަތުރުވެރިން އާދެއެވެ.

ރާއްޖެއަށް ދުވާލެއްގެ މައްޗަށް އަންނަ ފަތުރުވެރިންގެ އަދަދުތައް މައްޗަށް ޖެހިލާފައިވާއިރު، ވެލާނާ އެއާޕޯޓްގެ އާ އިންޓަނޭޝަނަލް ޓާމިނަލްއާއެކު ރާއްޖެއަށް އަންނަ ފަތުރުވެރިންގެ އަދަދުތައް އިތުރުވާނެ ކަމަށް މީގެ ކުރިންވެސް އަންދާޒާ ކޮށްފައި ވެއެވެ.

ރާއްޖެއަށް މިހާރު އެންމެ ގިނަ އަދަދަކަށް ފަތުރުވެރިން ޒިޔާރަތްކުރަނީ ޗައިނާއިންނެވެ. އެޤައުމުން ރާއްޖެއަށް 49,704 ފަތުރުވެރިންވަނީ ޒިޔާރަތްކޮށްފައެވެ. ދެވަނައަށް އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ ރަޝިއާއިންނެވެ. އެޤައުމުން ރާއްޖެއަށް އައި ފަތުރުވެރިންގެ އަދަދު ވަނީ 40,141 އަށް އަރާފައެވެ. 34,320 ފަތުރުވެރިންނާއެކު 3ވަނަ އަށް އެންމެ ގިނަ އަދަދަކަށް ފަތުރުވެރިން ރާއްޖެއަށް އަންނަ ޤައުމަކީ އިޓަލީވިލާތެވެ.

ރާއްޖޭގެ މަރުކަޒީ ބޭންކް، އެމްއެމްއޭގެ ރިޕޯޓަކުން ދައްކާގޮތުން މި އަހަރު ރާއްޖެއަށް 2.4 މިލިއަން ފަތުރުވެރިން އަންނާނެ ކަމަށް އަންދާޒާ ކުރެވެއެވެ. އަދި ވެލާނާ އެއަޕޯޓްގެ އައު ޓަރމިނަލްގެ ހުރިހާ ހިދުމަތެއް ބޭނުންކުރަން ފެށި މިކަމުގެ ހެޔޮ އަސަރު، ފަތުރުވެރިންގެ އަދަދުން ބޮޑަށް ފެންނަން ފަށާނެކަމަށް ބެލެވެނީ މި އަހަރު ކަމަށް ފޯކާސްޓްތަކުގައި ވެއެވެ.