ސަރުކާރު ޖަވާބުދާރީ ކުރުވުމުގެ މަސައްކަތް ކުރަމުން އަންނީ މިސަރުކާރުގެ ތެރެއިން ކަމަށާއި އެމަކަށް އިތުރު ބައެއްގެ އެހީތެރިކަމެއް ބޭނުން ނުވާ ކަމަށް ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.

ޕީއެންސީގެ ޓިކެޓުގައި ގއ. ވިލިނގިލިން ވާދަކުރާ ކެންޑިޑޭޓުންގެ ކެމްޕެއިން އިފުތިތާހު ކުރުމުގެ ޖަލްސާގައި ވާހަކަ ދައްކަވަމުން ރައްޔިތުންގެ މަޖިލީހުގެ ބާރަށު ދާއިރާގެ މެމްބަރުކަން ވެސް ކުރައްވާ ޝުޖާއު ވިދާޅުވީ، ވިލިނގިލި ވިލިނގިއްޔަކަށް ވުމަށްޓަކައި" އެމްޑީޕީން މިހާތަނަށް ކުރި އެއްވެސް މަސައްކަތެއް ނެތް ކަމަށެވެ.

ވިލިނގިލީގެ ވަށައިގެންވާ މަގުތަކުން ފެނިވަޑައިގަތީ ކުރިން ޖަންގައްޔެއްގެ ގޮތުގައި އޮތް ތަނެއް ޕާކަކަށް ބަދަލުކޮށް، މަގުގައި ލައިޓުތައް ޖަހާފައިވާ މަންޒަރު ކަމަށާއި އެއީ ވިލިނގިލި ކައުންސިލްގެ ރައީސްގެ މަގާމަށް އަނެއްކާވެސް ވާދަކުރައްވާ ޕީއެންސީގެ ކެންޑިޑޭޓު ވިޝާލްގެ ލީޑަޝިޕްގެ މަސައްކަތް ކަމަށް ސުޖާއު ވިދާޅުވިއެވެ.

ސުޖާއު ވިދާޅުވި ގޮތުގައި ރައްޔިތުންގެ މަޖިލިހުގައި ވެސް އޮތީ މި ސަރުކާރުގެ ސުޕަމެޖޯރިޓީ ކަމަށް ވާއިރު، މަޖިލިހުގައި އިދިކޮޅު ފަރާތްތަކުން ސަރުކާރު ޖަވާބުދާރީ ކުރުވާ މަންޒަރެއް ނުފެނެއެވެ.

"އަޅުގަނޑުމެންގެ ސަރުކާރު އެބަ ޖަވާބުދާރީ ކުރުވަން މިހާރު. އެހެންވީމާ އަޅުގަނޑުމެންގެ ސަރުކާރު ޖަވާބުދާރީ ކުރުވާކަށް މި ވަގުތަކު އެހެން ބައެއްގެ އެހީތެރިކަމެއް ބޭނުމެއް" ސުޖާއު ވިދާޅުވިއެވެ.

މީގެ އިތުރުން ސުޖާއު ވިދާޅުވީ އެމްޑީޕީގެ ސަރުކާރުގައި 47 މިލިއަން ރުފިޔާ ބަޔަކަށް ދީގެން ވިލިނގިލީގައި ފެނަކައިގެ ބްރާންޗެއް ހަދަން ފެށި ނަމަވެސް އެ ތަން ހުރީ ވީރާނާވެފައި ކަމަށެވެ.

ކުރިއަށް އޮތް ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބުގައި އެމްޑީޕީ އަށް އެންމެ ގޮނޑިއެއް ވެސް ނުދިނުމަކީ ކޮންމެހެން ކުރަންޖެހޭ ކަމެއް ކަމަށް ޝުޖާއު ވިދާޅުވި އެވެ.

ސުޖާއު ވިދާޅުވީ މި ސަރުކާރުގައި މިވީ ދެ އަހަރުގެ ތެރޭގައި އެންމެ ބޮޑު ކާމިޔާބީއަކީ ދައުލަތް ނުދަރައި ހިފަހައްޓާލުން ކަމަށާއި ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިއިރު ލިބުނީ ހުސް ތޮށިގަނޑެއް ކަމަށެވެ. އަދި މުޅި މާލިއްޔާ އޮތީ ދަރުވާލާފައި ކަމަށް އޭނާ ވިދާޅުވިއެވެ.