ބަންގްލަދޭޝްގެ ބޮޑުވަޒީރުކަމާ ހަވާލުވެވަޑައިގަންނަވާނެ ކަމަށް ބެލެވޭ ތާރިގު ރަހުމާން، ގައުމީ އެއްބައިވަންތަކަމަށް އިލްތިމާސްކުރައްވައިފިއެވެ. ދާދިފަހުން ބޭއްވި ރައްޔިތުންގެ މަޖިލީހުގެ އިންތިޚާބުގައި ބަންގްލަދޭޝް ނޭޝަނަލިސްޓް ޕާޓީ (ބީ.އެން.ޕީ) އިން ހޯދި ބޮޑު ކާމިޔާބީ، އޭނާ ވަނީ ޑިމޮކްރަސީގެ ހައްގުގައި ގުރުބާނީތަކެއްވި ފަރާތްތަކަށް ހަދިޔާކުރައްވާފައެވެ.

"އަޅުގަނޑުމެންގެ ވިސްނުމާއި ޚިޔާލުތައް ތަފާތުވި ނަމަވެސް، ގައުމުގެ މަސްލަހަތަށްޓަކައި އެންމެން އެކަތިގަނޑަކަށް ވާންޖެހޭ،" އިންތިޚާބަށްފަހު ހޮނިހިރު ދުވަހު ދެއްވި ފުރަތަމަ ތަގުރީރުގައި ރަހުމާން ވިދާޅުވިއެވެ.

ބަންގްލަދޭޝްގެ އިލެކްޝަން ކޮމިޝަނުން މިދިޔަ ބުރާސްފަތި ދުވަހު ބޭއްވި ތާރީޚީ އިންތިޚާބުގެ ރަސްމީ ނަތީޖާ މިހާރު ވަނީ ގެޒެޓްކޮށްފައެވެ. އިލެކްޝަން ކޮމިޝަނުގެ ނަތީޖާތަކުން ދައްކާ ގޮތުގައި، މަޖިލީހުގެ 299 ގޮނޑީގެ ތެރެއިން ބީ.އެން.ޕީ ކޯލިޝަނުން ވަނީ 212 ގޮނޑި ކާމިޔާބުކޮށްފައެވެ. ޖަމާއަތު އިސްލާމީ އިސްވެ އޮތް ކޯލިޝަނަށް ލިބުނީ 77 ގޮނޑިއެވެ.

ޝައިޚް ހަސީނާގެ ސަރުކާރު ވައްޓާލުމުގައި އިސް ދައުރެއް އަދާކުރި ޒުވާން އެކްޓިވިސްޓުންގެ މައްޗަށް އެކުލެވޭ "ނޭޝަނަލް ސިޓިޒަން ޕާޓީ" އަށް، އެ ޕާޓީން ވާދަކުރި 30 ގޮނޑީގެ ތެރެއިން ކާމިޔާބު ކުރެވުނީ އެންމެ 6 ގޮނޑިއެވެ. މިއީ މަގުމަތީގެ މުޒާހަރާތަކުން ލިބޭ ތާއީދު، އިންތިޚާބީ ވޯޓަށް ބަދަލުކުރުމުގައި ހުރި ގޮންޖެހުންތައް ހާމަވެގެންދިޔަ ކަމެކެވެ.

ބަންގްލަދޭޝްގެ ވަގުތީ ސަރުކާރުގެ ވެރިޔާ މުހައްމަދު ޔޫނުސް، ބީ.އެން.ޕީ އަށް ލިބުނު ބޮޑު ކާމިޔާބީއަށް ތާރިގު ރަހުމާނަށް މަރުހަބާ ދަންނަވައި، އިންތިޚާބީ ސަރުކާރަކާ ވެރިކަން ހަވާލުކުރެއްވުމަށް ވަނީ ތައްޔާރުވެވަޑައިގެންފައެވެ. ނޯބެލް ސުލްހައިގެ އިނާމު ހާސިލުކުރައްވާފައިވާ، އުމުރުފުޅުން 85 އަހަރުގެ ޔޫނުސް ވިދާޅުވީ، ތާރިގު ރަހުމާންގެ ޒަޢާމަތުގައި ގައުމުގެ ހަމަޖެހުމާއި، އެންމެންގެ ބައިވެރިވުން ހިމެނޭ ތަރައްގީއަކަށް މަގުފަހިވެގެންދާނެ ކަމަށް އުންމީދުކުރައްވާ ކަމަށެވެ.