މިފްކޯ އިން ކުދި ކަންނެލި ގަންނަން ފެށުމަކީ ރަނގަޅު ފެށުމެއް ކަމަށް ބޮޑުކަންނެލި މަސްވެރިންގެ ޔޫނިއަން އިން ބުނެފި އެވެ.

ބޮޑުކަންނެލި މަސްވެރިންގެ ޔޫނިއަން އިން މީސް މީޑިއާގައި ކުރި ޕޯސްޓެއްގައި ބުނެފައިވަނީ ކުދި އަދި ރިޖެކްޓް ކަންނެލި މިފްކޯއަށް ގަންނަން ފެށުމަކީ ރަނގަޅު ފެށުމެއް ކަމުގައި ދެކޭ ކަމަށެވެ.

އެ ޔޫނިއަން އިން އިތުރަށް ބުނެފައިވަނީ މަޝްވަރާ ކުރެވުނު އަގު ކުދި އަދި ރިޖެކްޓް ކަންނެއްޔަށްދީ ސަރުކާރުގެ ރިޔާސީ ވަޢުދާއި އެއްގޮތަށް މިފްކޯއަށް ބޮޑުކަންނެލި ވީހާވެސް އަވަހަކަށް ގަންނަން ފެށާނެ ކަމަށް އުންމީފދު ކުރާ ކަމަށެވެ.

ބޮޑުކަންނެލީގެ މަސްވެރިންނަށް ދިމާވެފައިވާ ގޮންޖެހުންތަކަށް ހައްލެއް ހޯދައިދިނުމަށް ސަރުކާރުން ކުރައްވާ މަސައްކަތްތަކުގެ ތެރޭގައި ހިމަނައިގެން ކަނޑުއޮތްގިރި އޮޕަރޭޝަނަށް ގެނެސް ކަންނެލި ގަންނަން މިހާރުވަނީ ފަށާފައެވެ.

ކަނޑުއޮތްގިރި އޮޕަރޭޝަނަށް ގެނެސް ކަންނެލި ގަންނަން ފެށުމާއި ގުޅިގެން އެ ރަށުގައި ހުންނަވާ ދައުލަތުގެ މީޑިއާއަށް ދެއްވި ބަސްދީ ގަތުމެއްގައި ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމް ވިދާޅުވީ، ރާއްޖޭގެ މަސްވެރިކަމުގެ ސިނާއަތަށް ދިމާވެފައިވާ ގޮންޖެހުންތައް ހައްލުކޮށްދެއްވުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ.

 ކަނޑުއޮތްގިރިން ބޮޑު ކަންނެލި ގަންނަން ފަށާފައިވަނީ 15 ކިލޯއަށްވުރެ މަތީގެ ބޮޑުކަންނެއްޔަށް 25 ރުފިޔާގެ ރޭޓުންނެވެ. މީގެ އިތުރުން ކަނޑުއޮތްގިރިއަށް ކަޅުބިލަ މަސްވެސް މިހާރުވަނީ ގަންނަން ފަށާފައެވެ.