އިރާނުގެ މުޒާހަރާތަކުގައި އެތައް ސަތޭކަ ބަޔަކު މަރުވުމާ ގުޅިގެން، އެމެރިކާއިން އިރާނާ ދެކޮޅަށް ވަރުގަދަ އަސްކަރީ ފިޔަވަޅުތަކެއް އެޅުމަށް ރައީސް ޓްރަމްޕް ވިސްނަވަމުންދާ ކަމަށް ވިދާޅުވެއްޖެއެވެ.

އިރާނުގެ ސަރުކާރާ ދެކޮޅަށް ކުރަމުންދާ މުޒާހަރާތަކަށް ތިން ހަފުތާ ވެފައިވާއިރު، އެމެރިކާގެ އަސްކަރިއްޔާއިން އިރާނާ މެދު "ވަރަށް ވަރުގަދަ ފިޔަވަޅުތަކެއް" އެޅުމާ މެދު ގޮތްތަކެއް ހޯދަމުންދާ ކަމަށް ރައީސް ޑޮނަލްޑް ޓްރަމްޕް ވަނީ ހާމަކުރައްވާފައެވެ.

އެމެރިކާގައި ހުންނަ ހިއުމަން ރައިޓްސް އެކްޓިވިސްޓް ނިއުސް އެޖެންސީ އިން ބުނާ ގޮތުގައި، އިރާނުގައި މިހާތަނަށް 500 އެއްހާ މުޒާހަރާވެރިންނާއި ސަލާމަތީ ބާރުތަކުގެ 48 މީހުން ވަނީ މަރުވެފައެވެ. ނަމަވެސް ބީބީސީއަށް މައުލޫމާތު ދިން ބައެއް ފަރާތްތަކުން ބުނާ ގޮތުގައި މަރުވި މީހުންގެ އަދަދު މިއަށްވުރެ މާ މަތިވުން އެކަށީގެންވެއެވެ.

މި މައްސަލައިގެ ތެރެއަށް ވަންނާނެ ކަމުގެ އިންޒާރު ޓްރަމްޕް ދެއްވާފައިވާއިރު، އާދީއްތަ ދުވަހު އޭނާ ވިދާޅުވީ އިރާނުގެ އޮފިޝަލުން އޭނާއަށް ގުޅުއްވައި މަޝްވަރާ ކުރުމަށް އެދިވަޑައިގެންފައިވާ ކަމަށެވެ. އެހެންނަމަވެސް، ބައްދަލުވުމެއް ބޭއްވުމުގެ ކުރިން ފިޔަވަޅު އަޅަން ޖެހިދާނެ ކަމަށްވެސް އޭނާ ވިދާޅުވިއެވެ.

އިރާނުގެ ލީޑަރުން މުޒާހަރާވެރިން ސިފަކުރައްވާފައިވަނީ "ހަރުކަށި ފަނާކުރަނިވި ބައެއްގެ" ގޮތުގައެވެ. އަދި ހޯމަ ދުވަހު ސަރުކާރަށް ތާއީދުކޮށް ބާއްވާ ހިނގާލުންތަކުގައި ބައިވެރިވުމަށް ސަރުކާރަށް ތާއީދުކުރާ ފަރާތްތަކަށް ވަނީ ގޮވާލާފައެވެ.

އެމެރިކާއާއި އިޒްރޭލުން އިރާނުގެ ހަމަޖެހުން ނަގާލުމަށް މަސައްކަތް ކުރަމުންދާ ކަމަށް ތުހުމަތުކޮށް، "އެމެރިކާއާއި އިޒްރޭލާ ދެކޮޅަށް ކުރި ގައުމީ ހަނގުރާމައިގައި" މަރުވި މީހުންނަކީ "ޝަހީދުން" ކަމަށް ކަނޑައަޅައި، އިރާނު ސަރުކާރުން ވަނީ ތިން ދުވަހުގެ ހިތާމަ ފާޅުކުރުން އިއުލާނުކޮށްފައެވެ.

މިދިޔަ ޑިސެމްބަރު މަހުގެ ފަހުކޮޅު އިރާނުގެ ފައިސާގެ އަގު ވަރަށް ބޮޑަށް ވެއްޓުމާ ގުޅިގެން ފެށުނު މި މުޒާހަރާތައް މިހާރު ވަނީ އިރާނުގެ އެންމެ މަތީ ލީޑަރު އާޔަތުﷲ އަލީ ޚާމަނާއީގެ ގާނޫނީ ހައިސިއްޔަތާ މެދު ސުވާލު އުފެދޭ ވަރުގެ ބޮޑު މައްސަލައަކަށް ބަދަލުވެފައެވެ.

އިރާނުގެ އޮފިޝަލުންނާ އެކު ބައްދަލުވުމެއް ބޭއްވުމަށް ތައްޔާރުވަމުންދާ ކަމަށް ޓްރަމްޕް ވިދާޅުވި ނަމަވެސް، އެމެރިކާއިން ވިސްނަމުންދާ އަސްކަރީ ފިޔަވަޅުތަކާއި ނުވަތަ މަޝްވަރާތަކާ ބެހޭ އެއްވެސް ތަފްސީލެއް އޭނާ އަދި ހާމައެއް ނުކުރައްވައެވެ.

ޓްރަމްޕް އިތުރަށް ވިދާޅުވި ގޮތުގައި، އިރާނުގެ ލީޑަރުން މަޝްވަރާ ކުރަން ބޭނުންވަނީ އެމެރިކާގެ ސަބަބުން ލިބެމުންދާ ގެއްލުންތަކާއި ފިއްތުންތަކަށް ކެތް ނުކުރެވިގެންނެވެ.

މީގެ އިތުރުން އީރާންގެ ކުރަމުންދާ މުޒާހަރާތަކާ ގުޅިގެން މުޒާހަރާގެ ބައިވެރިންނަށް އެހީވުމުގެ ނަމުގައި އެމެރިކާއިން އީރާނަށް އަރާފާނެތީ، ހައްދު ފަހަނަ އަޅާފައިވާ ނިރުބަވެރި އިޒްރޭލު ތައްޔާރީ ހާލަތަކަށް ގެނެސްފައިވާ ކަމަށްވެސް ރިޕޯޓް ބުނެއެވެ.