ދާއިމީ ކޯޗެއް ނެތި ކުޅެމުންދާ މެންޗެސްޓަރ ޔުނައިޓެޑް، މި ސީޒަނުގެ ދެވަނަ ކަޕް މުބާރާތުން ވެސް ކަޓައި، ބޮޑު ނާކާމިޔާބީއަކާ ކުރިމަތިލާން ޖެހިއްޖެއެވެ.

 އޯލްޑް ޓްރެފޯޑްގައި ކުޅުނު މި މެޗުން ޔުނައިޓެޑް ބަލިކޮށް، އެފް.އޭ ކަޕުން އެ ޓީމު ބޭރުކޮށްލުމުގައި އިސްދައުރެއް އަދާކުރީ އެ ޓީމުގެ ކުރީގެ ފޯވާޑް ޑެނީ ވެލްބެކެވެ.

ޔުނައިޓެޑްގެ ކުރީގެ ކޯޗު ސަރ އެލެކްސް ފާގަސަންގެ ކުރިމަތީގައި، އަދި ކުރީގެ ޓީމު ކުޅުންތެރިޔާ ޑަރެން ފްލެޗަރ ވަގުތީ ކޯޗަކަށް ހުއްޓާ، ވެލްބެކް ވަނީ ބްރައިޓަންގެ ދެވަނަ ލަނޑު ކާމިޔާބުކޮށްދީ އެ ޓީމު މުބާރާތުގެ ހަތަރުވަނަ ބުރަށް ގެންގޮސްދީފައެވެ. މިއީ އުމުރުން 35 އަހަރުގެ ވެލްބެކް ޔުނައިޓެޑް ކޮޅަށް ޖެހި އަށްވަނަ ލަނޑެވެ. އަދި މިއީ އޭނާ ކުރިން ކުޅުނު ދަނޑުގައި، ޒިޔާރަތްކުރި ޓީމެއްގެ ކުޅުންތެރިއެއްގެ ގޮތުގައި ހުރެ ކާމިޔާބުކުރި ހަވަނަ ލަނޑެވެ.

މެޗުގެ ފުރަތަމަ ހާފުގައި ބްރަޔަން ގްރޫޑާ ޖެހި ލަނޑުން ބްރައިޓަން ކުރީގައި އޮއްވައި، ވެލްބެކް ފޮނުވާލި ބާރު ހަމަލާ ގޯލުގެ މަތީ ދާގަނޑަށް އަމާޒުކޮށް، އެ ޓީމުގެ ލީޑު ފުޅާކޮށްދިނެވެ.

މެޗު ނިމެން ފަސް މިނެޓަށް ވެފައި ވަނިކޮށް ބެންޖަމިން ސެސްކޯ ބޮލުން ޖެހި ލަނޑުން ޔުނައިޓެޑަށް އުންމީދެއް ލިބުނު ނަމަވެސް، ފަހު މިނެޓުގައި ޔުނައިޓެޑްގެ ޒުވާން ކުޅުންތެރިޔާ ޝިއާ ލޭސީއަށް ރަތް ކާޑު ދެއްކުމުން އެ ޓީމަށް އިތުރު ހުރަސްތަކެއް ކުރިމަތިވިއެވެ.

މިއީ އެފް.އޭ ކަޕް 13 ފަހަރު ކާމިޔާބުކޮށްފައިވާ ޔުނައިޓެޑް އަތުން، ބްރައިޓަން މި މުބާރާތުގައި ހޯދި ފުރަތަމަ މޮޅެވެ.

މިއީ އީ.އެފް.އެލް ކަޕްގެ ދެވަނަ ބުރުގައި ލީގު ޓޫގެ ގްރިމްސްބީ އަތުން ބަލިވެ ކެޓުމަށްފަހު، ޔުނައިޓެޑަށް ކުރިމަތިވި އަނެއް ލަދުވެތި ނާކާމިޔާބީއެވެ. މިއާއެކު، 1981-82 ވަނަ އަހަރުގެ ފަހުން ފުރަތަމަ ފަހަރަށް، އިނގިރޭސި ދެ ކަޕް މުބާރާތުގެ ވެސް އެންމެ ކުރީކޮޅު ޔުނައިޓެޑް މިވަނީ ބޭރުވެފައެވެ.

ވަގުތީ ކޯޗެއްގެ ގޮތުގައި ފްލެޗަރ ހޭދަކުރި ދެ މެޗުގެ ތެރެއިން، ބާންލީއާ ދެކޮޅަށް ކުޅުނު މެޗު އެއްވަރުވުމާއި، އަމިއްލަ ދަނޑުގައި މި ލިބުނު ބައްޔަކީ ޔުނައިޓެޑްގެ މި ސީޒަން އިތުރަށް ގޯސްވަމުންދާކަމުގެ ނިޝާނެކެވެ. މި ނަތީޖާއާއެކު، މި ސީޒަނުގައި އެ ޓީމު ކުޅޭނީ އެންމެ 40 މެޗެވެ. މިއީ 1914-15 ވަނަ އަހަރަށްފަހު އެ ޓީމުން އެންމެ މަދު މެޗު ކުޅޭ ސީޒަނެވެ.