ރުޅިވެރިކަމާއި ނަފްރަތު އުފައްދައިގެން ލިބޭނެ އެއްވެސް މަންފާއެއް ނެތް ނައިބު ރައީސް ހުސެއިން މުހައްމަދު ލަތީފު ވިދާޅުވެއްޖެއެވެ.

ލޯކަލް ކައުންސިލް އިންތިހާބު ކެމްޕެއިންގައި ޕީއެންސީގެ މާފަންނު ޖަގަހަ ހުޅުވަން ބޭއްވި ރަސްމިއްޔާތުގައި އެ މަނިކުފާނު ވިދާޅުވީ ޖަވާބުދާރީކުރުވުމުގެ ތެރެއިން މުޖުތަމައުގެ ތެރެއަށް ބަހެއް ދޫކޮށްލާ ނަމަ އެކަން ކުރަންޖެހޭނީ ވަރަށް ވިސްނާފައި ކަމަށާއި އެހެން ނޫނީ ޒާތީ ހަސަދަ އާއި ނަފްރަތާއި ރުޅިވެރިކަން އުފެދިގެންދާ ކަމަށެވެ.

ނައިބު ރައީސް ވިދާޅުވީ މަލްޓި ޕާޓީ ޑިމޮކްރަސީއެއްގައި ޖަވާބުދާރީ ކުރުވަންޖެހޭކަމަށާއި، އެއީ އަސާސީ ޙައްޤެއްކަމަށެވެ. އަދި އެ ޒިންމާ އަދާކުރަންޖެހޭނީ ވާދަވެރިންކަމަށާއި، ނަމަވެސް އެކަން ކުރަންޖެހޭނީ ރީތިގޮތުގައިކަމަށް ވިދާޅުވިއެވެ.

ޖާވާބުދާރީ ކުރުވަން ދައްކާ ވާހަތަކަކީ ޒިންމާދާރުކަމާއެކު ދައްކަންޖެހޭ ވާހަކަތަކެއްކަމަށް އެމަނިކުފާނު ވިދާޅުވިއެވެ. އަދި އޭގެ ސަބަބުން މުޖުތަމަޢުގެ ތެރޭގައި އިޖްތިމާޢީ ހަމަޖެހުން ގެއްލި، ނަފްރަތާއި ރުޅިވެރިކަމާއި ޒާތީ ހަސަދަ އުފެދުމަށް ޖާގަ ދެވިގެން ނުވާނެ ކަމަށް ވެސް އެމަނިކުފާނު ވިދާޅުވިއެވެ.

ނައިބު ރައީސް ވިދާޅުވި ގޮތުގައި "2008ގެ ކުރީކޮޅުގައި ރާއްޖޭގެ ސިޔާސީ މަޝްރަހުން ފެނުނު ކަންތައްތައް ހަނދާން ނައްތާލަން ޖެހެއެވެ.އަދި ސިޔާސީ މައިދާނުގައި އެފަދަ ކަންކަން ތަކުރާރުކުރަން ބޭނުންނުވާ ކަމަށް ވިދާޅޫވިއެވެ.

"މިއަދުގެ މި ޖީލުތަކަށް ބޭނުންވާ ވާހަކަތަކެއްނޫން އެއީކީ. ވެރިން ޖަވާބުދާރީކުރުވަން ދައްކާނެ ވާހަކަތައް ހުންނާނެ. ރައްޔިތުން ޤަބޫލުކުރާ ފެންވަރުގެ ވާހަކަތައް ހުންނާނެ. އެހެންނަމަވެސް އަޅުގަނޑު މިދެންނެވި އޭގެ ރީތިގޮތުގައި އެކަން ކޮށްދެއްވާށޭ." ނައިބު ރައީސް ވިދާޅުވިއެވެ.

މީގެ އިތުރުން ނައިބު ރައީސް ވިދާޅުވީ އަންނަން އޮތް ޖީލަށް ހެޔޮ ބަދަލެއް އަންނާނެ ގޮތަށް ސިޔާސަތުތައް ތަންފީޒުކުރަން ޕީއެންސީ ކައުންސިލަރުން ހޮވައިދިނުމަށް އެދިވަޑައިގަންނަވާ ކަމަށެވެ.

ނައިބުރައީސް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތަކީ ހާމަކަން ބޮޑުގޮތެއްގައި ރައްޔިތުންނަށް ޚިދުމަތް ކުރުންކަމަށާއި، ރައްޔިތުންނަށް ޖަވާބުދާރީވުމަށް އެމަނިކުފާނު އަބަދުވެސް އިރުޝާދު ދެއްވާކަމަށެވެ.

ރައީސް މުޢިއްޒު ވެރިކަމަށް ވަޑައިގަތީ ދިވެހީންގެ ރާއްޖެއަށް ބޭނުންވާ ތަރައްޤީގެ ކަންކަން ވަރަށް ސާފުވާނެހެން ފުރިހަމަ ޕްލޭނަކާއެކުގައި ކަމަށެވެ. އެގޮތުން މުޅި ރާއްޖޭގައިވެސް ހަމަޖެހުމާ، ރައްކާތެރިކަން އަދި ތަރައްޤީއާއެކު ކުރިއަށްދާން ރައީސް ބޭނުންފުޅުވެއްލައްވާކަން އެމަނިކުފާނު ފާހަގަކުރެއްވިއެވެ.